އަލަށް ގާއިމު ކުރާ ކޯލްޑް ސްޓޯރޭޖްތައް ގާއިމުކޮށް ނިމުމާއެކު، ދިވެހިރާއްޖޭގައި 23،500 ޓަނުގެ ރޯމަސް ރައްކާ ކުރުމުގެ ގާބިލުކަން ލިބިގެންދާނެކަން ފިޝަރީޒް މިނިސްޓްރީން ހާމަކޮށްފި އެވެ.
އެ މިނިސްޓްރީގެ ރަސްމީ އެކްސް އެކައުންޓްގައި މިހާރު އާންމުކޮށްފައިވާ ޑޭޓާއިން ދައްކާގޮތުގައި، ޅ. ފެލިވަރުގައި 4،000 ޓަނުގެ ކޯލްޑް ސްޓޯރޭޖެއް އަދި ގދ. ތިނަދޫގައި 1،000 ޓަނުގެ ކޯލްޑް ސްޓޯރޭޖެއް ގާއިމުކުރުމުގެ މަސައްކަތް ދަނީ ކުރަމުންނެވެ.
ޓެންޑަރ މަރުހަލާގައި ހުރި މަޝްރޫއުތަކަށް ބަލާއިރު، މ. މުލަކުގައި 500 ޓަނުގެ ކޯލްޑް ސްޓޯރޭޖެއް އަދި ގއ. ކޫއްޑޫގައި 4،000 ޓަނުގެ ކޯލްޑް ސްޓޯރޭޖެއް ގާއިމުކުރުމުގެ މަސައްކަތް ފާހަނގަކޮށްފައި ވެއެވެ.
މީގެ އިތުރުުން، ހއ. އިހަވަންދޫގައި 500 ޓަނުގެ ކޯލްޑް ސްޓޯރޭޖަކާއި، ދ. އަތޮޅުގައި 1،500 ޓަނުގެ ކޯލްޑް ސްޓޯރޭޖަކާއި، ގދ. ފިޔޯރީގައި 3،000 ޓަނުގެ ކޯލްޑް ސްޓޯރޭޖެއް ގާއިމުކުރުމަށް ރޭވިފައިވާކަން އެ ޑޭޓާއިން ދައްކައެވެ. ދ. މާދެލި އަދި ގދ. ފިޔޯރީގައި ކޯލްޑް ސްޓޯރޭޖް ފެސިލިޓީސް ތަރައްޤީކޮށް ފައިނޭންސް ކުރުމަށް ޗައިނާގެ ޑޮންގްފަންގް އިލެކްޓްރިކް އިންޓަރނޭޝަނަލް ކޯޕަރޭޝަނާއެކު މިމަހުގެ 14 ވަނަ ދުވަހު ފިޝަރީޒް މިނިސްޓްރީން ވަނީ ސޮއިކޮށްފަ އެވެ.
ފިޝަރީޒް މިނިސްޓްރީން ބުނީ، ދިވެހިރާއްޖޭގެ މަސްވެރިން ބާނާ ކަޅުބިލަމަހުގެ މިންވަރު އިތުރުކުރުމަށާއި، މަސް ރައްކާކުރާ މިންވަރު އިތުރުކުރުމަށް ކުރިޔަށްގެންދިއުމަށް ހަމަޖެހިފައިވާ މި މަޝްރޫޢުތަކާއެކު ދިވެހިރާއްޖޭގައި 23،500 ޓަނުގެ ރޯމަސް ރައްކާ ކުރެވޭނެ ގާބިލުކަން ލިބިގެންދާނެކަމަށެވެ.