ފެލިވަރުގައި ދުވާލަކު 100 ޓަނުގެ މަސް ޕްރޮސެސްކުރެވޭ ފެސިލިޓީއެއް ތަރައްގީ ކުރަން ސަރުކާރުން ނިންމައިފި އެވެ.
މި ފެސިލިޓީ ގާއިމުކުރަނީ، ދިވެހިރާއްޖޭގައި މަސް ލޭންޑިންގ، ޕްރޮސެސިންގ އެންޑް ސްޓޯރޭޖް ފެސިލިޓީސް ތަރައްޤީކޮށް ފައިނޭންސް ކުރުމަށް ޗައިނާގެ ޑޮންގްފަންގް އިލެކްޓްރިކް އިންޓަރނޭޝަނަލް ކޯޕަރޭޝަނާއެކު މިއަދު ފިޝަރީޒް މިނިސްޓްރީން ސޮއިކުރި އެއްބަސްވުމުގެ ދަށުންނެވެ. މިިނިސްޓަރު އަހްމަދު ޝިޔާމް ސޮއިކުރެއްވި މިއެއްބަސްވުމުގެ ދަށުން، ދ. މާދެލި، ގދ، ފިޔޯއަރީ އަދި ޅ. ފެލިވަރުގައި މަސްވެރިކަމާ ގުޅުންހުރި މުހިންމު މަޝްރޫއުތަކެއް ކުރިޔަށް ގެންދިއުމަށް ވަނީ ހަމަޖެހިފައި ވެއެވެ.
މި އެއްބަސްވުމުގެ ދަށުން ފެލިވަރުގައި 38 އަހަރު ވެފައިވާ ކޭނަރީގެ ބަދަލުގައި ދުވާލަކު 100 ޓަނުގެ ޕްރޮސެސިން ފެސިލިޓީއެއް ތަރައްގީ ކުރުމަށް ހަމަޖެހިފަވާކަމަށް ފިޝަރީޒް މިނިސްޓްރީން ބުނެފައި ވެއެވެ.
މިއެއްބަސްވުމުގެ ދަށުން މާދެލީގައި ދެ ފިޔަވައްސަކަށް ބަހާލައިގެން މަޝްރޫއުތައް ކުރިޔަށްގެންދިއުމަށް ހަމަޖެހިފައިވާކަމަށް ފިޝަރީޒް މިނިސްޓްރީން ބުނެފައިވެއެވެ. އެގޮތުން، ފުރަތަމަ މަރުހަލާގައި ހާބަރު ތަރައްގީކުރުމާއި، ލޭންޑިން ފެސިލިޓީތަކާއި، އެކޮމޮޑޭޝަންތަކާއި، މަގުތަކާއި، 1،500 ޓަނުގެ ކޯލްޑް ސްޓޯރޭޖާއި، ބްރައިން، އަދި ބްލާސްޓް ފްރީޒިންގ ފެސިލިޓީއެއް ގާއިމުކުރުން ހިމެނެއެވެ. އަދި، ދެވަނަ ފިޔަވަހީގެ މަސައްކަތުގެތެރެއިން ދުވާލަކު 50 ޓަނުގެ މަސް ޕްރޮސެސިން ފެސިލިޓީއެއް ތަރައްގީ ކުރުމަށް ވަނީ ނިންމާފަ އެވެ.
މި އެއްބަސްވުމުގެ ދަށުން، ހިންގުމަށް ހަމަޖެހިފައިވާ މަޝްރޫއުތަކުގެ ތެރޭގައި ގދ. ފިޔޯރީގައި، 3،000 ޓަނުގެ ކޯލްޑް ސްޓޯރޭޖްއެއް ގާއިމުކޮށް، ބްރައިން، އަދި ބްލާސްޓް ފްރީޒިން ފެސިލިޓީއެއް ގާއިމުކުރުން ހިމެނެއެވެ. އަދި، ދުވާލަކު 100 ޓަނުގެ މަސް ޕްރޮސެސިން ފެސިލިޓީއަކާއި، މަހުގެ ކާނާ އުފައްދާ ޕްލާންޓެއްގެ އިތުރުން ރިހާކުރު އުފައްދާ ފެސިލިޓީއެއް ހިމަނާފައިވާ ކަމަށް ފިޝަރީޒް މިނިސްޓްރީން ބުނެފައި ވެއެވެ.
މި އެއްބަސްވުމުގެ ދަށުން 18 މަސް ދުވަހުގެ ތެރޭގައި މި ތިން ރަށުގެ މަސް ފެކްޓްރީގެ މަސައްކަތް ނިންމާ އޮޕަރޭޝަނަށް ގެންނަންޖެހެ އެވެ. މި މަޝްރޫއަށް 225 މިލިއަން ޑޮލަރު ހަރަދުވެދާނެ ކަމަށް ސަރުކާރުން ލަފާކުރެ އެވެ.