މިފްކޯއަށް މަސްވެރިން އަތުން ގަތް މަހަށް ފައިސާ ނުދައްކާތާ އެއް ހަފުތާ ވެއްޖެ ކަމަށް މަސްވެރިން ބުނެފި އެވެ.
މިކަމުގެ ކަންބޮޑުވުން ފާޅުކޮށް މަސްވެރިން ބުނީ، ކުރިން ފަހަރުވެސް މިފްކޯއިން ފައިސާ ދިނީ މަސްވެރިން އާދޭސްކުރާތާ އެތަކެއް ދުވަހުން ކަމަށެވެ. އަދި ބައިބަޔަށް ބަހާލައިގެން ފައިސާ ދިނީމައި ދަރަނިތައް ދައްކާފައި ދިރިއުޅުމުގެ ކަންކަމަށް ކުރިޔަށް ކުރަންޖެހޭ ކަންތައްތަކަށް ވަރަށް ދަތިވި ކަމަށެވެ.
ސަރުކާރުގައި ފައިސާނެތް ކަމަށް ބުނެ ކުރީގެ ”ބެކްލޮގް“ ޚަލާސް ކުރުމަށްފަހު ހަފުތާއިން ހަފުތާއަށް ބިލުތަކަށް ފައިސާ ދޫކުރާނެކަމަށް ސަރުކާރުން ބުނި ނަމަވެސް މިފްކޯއިން އެއްވެސް ވަރަކަށް ފައިސާ ދޫނުކުރާތާ ހަފުތާއެއް ވެއްޖެ ކަމަށް މަސްވެރިން ބުންޏެވެ.
”ވާނުވާއެއް ހަމަ އެއްގޮތަކަށްވެސް ނޭނގޭ. ކޮންމެ ފަހަރަކު އަހަރުން ރުޅިއައިސް ހަޅޭއް ލަވައިގެން ފައިސާކޮޅެއް މިދެނީ. މިފްކޯއަށް އަސްލު ސަލާން ޖަހާކަށް ނުޖެހޭ. އަހަރުމެންގެ ފައިސާ ހޯދަން މި ބުނަނީ. ކޮންމެ ފަހަރަކު ކޫއްޑޫއަށް އައިސް މަސް ކިރާލީމައި ޓިކެޓެއް މިދެނީ. މީ ދެން ބޮޑުވަރު. ސަރުކާރުގައި ލާރި ނެތޭ ބުންޏަސް އަހަރުމެން ގަބޫލެއް ނުކުރާނަން.“ މަސްވެރިއަކު ބުންޏެވެ.
އެހެން މަސްވެރިއަކު ބުނީ މަސްވެރިންނަށް ފައިސާ ދޭންވީމައި ސަރުކާރުގައި ފައިސާ ނުހުންނަ ކަމަށާއ،ި ސަރުކާރުން ބޭނުންހައި ކަމެއް ކުރަން ފައިސާ ހުންނަ ކަމަށެވެ.
”ރައީސް ބޭނުންވީމައި ދަތުރުކުރަނީ… ބޮޑު ޚަރަދުކޮށްފައި ޖަލްސާ ބާއްވަނީ… އަހަރުމެންނަށް ދޭންވީމައި ލާރިއެއް ނެތް. އެއްވެސް ގޮތަކަށް ސަރުކާރުން މިކިޔާ އެއްޗެއް ދެކޮޅު ނުޖެހޭ. މިހާރު މިއީ ރޯދަ މަސް ކަމެއް އެމީހުންނަކަށް ނޭނގޭ. އަހަރުމެންގެ ހާލަތު އިނގޭނަމަ އަހަރުމެންގެ ފައިސާކޮޅު ދިނީސް.“ ރުޅިއައިސްފައި ހުރި މަސްވެރިއަކު ބުންޏެވެ.
މަސްވެރިން ބުނީ މިފްކޯއިން ބިލުތަކަށް ފައިސާ ނުދައްކާ ދުވަސްތައް ދިގު ދަންމާނަމަ، އަނެއްކާވެސް އިހުތިޖާޖުކުރަން ނިކުންނާނެކަމަށެވެ.
މަސްވެރިން މިފްކޯއަށް މަސް ކިރާތާ ސާޅީސް އަށްގަޑީއިރުގެ ތެރޭގައި ފައިސާ ދޫކުރުމަކީ ޑރ. މުއިއްޒުގެ ރިޔާސީ ވައުދެކެވެ. އެހެންނަމަވެސް ސަރުކާރާއި ހަވާލުވީ އިރު، އިގުތިސާދު ހީނަރުވެފައި އޮތުމުގެ ސަބަބުންނާއި، ކުރީ ސަރުކާރުން ވާރުތަވީ ”ބެކްލޮގް“ އާއެކު މަސްވެރިންނަށް ފައިސާ ދޫކުރަން ދަތިވިއެވެ. އެހެންނަވަމެސް އެފައިސާ އެކި ދުވަސްވަރަށް ބަހާލައިގެން ސަރުކާރުން ދައްކާ ޚަލާސްކުރި އެވެ.