އއ. ފެރިދޫ ބަނދަރުގެ ހުޅަނގު ތޮށީގައި އަޅާފައިވާ އޮޑިދޯނި ފަހަރު އެހެން ދިމާލަކަށް ބަދަލު ކުރަން އެރަށު ކައުންސިލުން އަންގައިފި އެވެ.
މިކަމާއި ގުޅޭގޮތުން އިއްޔެ ފެރިދޫ ކައުންސިލުން އާންމުކޮށްފައިވާ އިއުލާނެއްގައި ބުނެފައިވަނީ، އެރަށުގެ ބަނދަރު ބޮޑު ކުރުމުގެ މަޝްރޫޢުގެ އަމަލީ މަސައްކަތް ފެށިގެން ކުރިއަށްދާތީ، ބަނދަރަށް ބޮޑުކުރެވޭ ބަޔާއި މިހާރުގެ ބަނދަރާއި ގުޅުވާލުމަށްޓަކައި، މިހާރުގެ ބަނދަރުގެ ހުޅަނގު ތޮށީގެ ބޮޑުބައެއްގެ ބޮލޮކްތައް ކައިރި މުސްތަޤްބަލެއްގައި ނައްޓާލަންޖެހޭކަަމަށެވެ. އެހެންކަމުން، މިހާރުގެ ބަނދަރުގެ ހުޅަނގު ތޮށީގައި އަޅާފައިވާ އޮޑިދޯނިފަހަރު، ބަނދަރުހެނދުމުގެ މަސައްކަތަށް ދަތިނުވާނެގޮތަށް، ރައްކާތެރި އެހެން ދިމާލަކަށް ބަދަލުކުރުމަށް ކައުންސިލުން އަންގާކަމަށެވެ.
އެ އިއުލާނުގައި އިތުރަށް ބުނެފައިވަނީ، ބަނދަރު ބޮޑުކުރުމުގެ މަސައްކަތް ކުރިއަށް ދާއިރު، ބަނދަރު ބޭނުންކުރާ ފަރާތްތަކާއި އޮޑިދޯނި ފަހަރު ގެންގުޅޭ ފަރާތްތަކަށް އަދި ޢާއްމު ރައްޔިތުންނަށް، ލަފާފުރުމާއި އަދި އެނޫންވެސް ގޮތްގޮތުން، އެކިއެކި ދަތިތައް ދިމާވުމަކީ އެކަށީގެންވާ ކަމެއްކަމަށެވެ. އަދި ރަށުގެ ތަރައްޤީއަށް ކުރިޔަށްގެންދާ މި މަޝްރޫއުގެ މަސައްކަތް ހިނގަމުންދާއިރު، އެންމެހާ ރައްޔިތުން ކެތްތެރިކަމާއި އެކު ފުރިހަމަ އެއްބާރުލުމާއި އެހީތެރިކަން ކައުންސިލަށާއި، މަޝްރޫޢު ހިންގާ ފަރާތަށް ދިނުމަށް ކައުންސިލުން އެދިފައި ވެއެވެ.
ފެރިދޫ ބަނދަރު އަޕްގްރޭޑް ކުރުމުގެ މަސައްކަތް އެއްއަހަރު ދުވަހުގެ ތެރޭގައި ނިންމާގޮތަށް އެމްޓީސީސީއަށް ހަވާލުކޮށްފައިވަނީ މިދިޔަ އަހަރުގެ ޖެނުއަރީމަހުގެ ސޯޅަވަނަ ދުވަހު އެވެ. އެމްޓީސީސީއަށް މަޝްރޫއު އެވޯޑްކޮށްފައިވަނީ 50.8 މިލިއަން ރުފިޔާއަށެވެ. މި މަޝްރޫއުގެ ދަށުން ބަނދަރު ފުން ކުރުމާއި، އައު ބަނދަރު ފުން ކުރުމާއި، ނެރު ފުންކުރުމާއި، ބްރޭކްވޯޓަރ ޖެހުމާއި، ސޭންޑްފިލް ބްރޭކްވޯޓާ ޖެހުމާއި، ރިވެޓްމެންޓް ޖެހުމުގެ އިތުރުން ސްކޯރިން އެޕްރޮން ޖެހުމާއި، މޫރިންގ ރިންގް ހަރުކުރުމާއި، މަގު ބައްތި އަދި ޕޭމަންޓް ހެދުން ހިމެނެއެވެ.