ރާއްޖޭގެ އުތުރުގެ އަތޮޅުތަކުގެ ކަނޑުތައް މިއަދު ގަދަވާނެކަމަށް މޫސުމާބެހޭ ގައުމީ އިދާރާއިން ލަފާކޮށްފި އެވެ.
އެ އިދާރާއިން ވަނީ އެ ސަރަހައްދަށް ހުދު ސަމާލެއްވެސް ނެރެފައެވެ. މެންދުރު 12:30 އާ ހަމަޔަަށް އެ އުތުރުގެ އަތޮޅުތަކަށް ނެރެފައިވާ ސަމާލުގައި ބުނެފައިވަނީ، ގަޑިއަކު 19 މޭލާއި 24 މޭލުގެ ބާރުމިނުގައި ވައިޖެހި ކަނޑުތައް ގަދަވާނެކަމަށެވެ.
މޫސުމާ ބެހޭ ގައުމީ އިދާރާއިން އިއްޔެ ބުނީ ރާއްޖެ ސަރަހައްދުގައި ހުޅަނގު މޫސުމް ބާރުގަދަވާނެކަމަށް ބެލެވޭތީ، ކުރިޔަށް އޮތް ފަސް ދުވަހު އުތުރާއި މެދު ރާއްޖެތެރޭގެ ބައެއް އަތޮޅުތަކަށް ވައިގަދަވެ، ކަނޑު ގަދަވެ، އުދަ އަރާނެކަމަށް ލަފާކުރެވޭކަމަށެވެ. އަދި، އުތުުރާއި މެދުރާއްޖެތެރޭގެ ބައެއް ރަށްތަކަށް މި މުއްދައްތުގައި ވިއްސާރަކޮށް ގުގުރުން އެކަށިގެންވާކަމަށް މޫސުމާބެހޭ ގައުމީ އިދާރާއިން ބުނެފައި ވެއެވެ.
ވައިގަދަވެ ކަނޑުތައް ގަދަވާނެކަމަށް ލަފާކުރެވޭތީ، ކަނޑުދަތުރުކުރާ ފަރާތްތަކުން ދަތުރަށް ފެށުމުގެކުރިން މޫސުމާބެހޭ އެންމެ ފަހުގެ މައުލޫމާތު ހޯދުމަށް މޫސުމާ ބެހޭ ގައުމީ އިދާރާއިން އިލްތިމާސްކޮށްފައި ވެއެވެ.
މުޅި ރާއްޖެއަށް މިހާރުވަނީ ހުޅަނގު މޫސުން ފެށިފައެވެ. މިމަހުގެ 7 ވަނަ ދުވަހު ދެކުނުގެ އަތޮޅުތަކަށް ހުޅަނގު މޫސުން ފެށިފައިވާއިރު، މެދު ރާއްޖެ ތެރޭގެ ރަށްތަކަށް ހުޅަނގު މޫސުން ފެށުނީ މި މަހުގެ 12 ވަނަ ދުވަހުއެވެ. އަދި ރާއްޖޭގެ އުތުރުގެ އަތޮޅުތަކަށް ހުޅަނގު މޫސުން ފެށުނީ މިމަހުގެ 21 ވަނަ ދުވަހުއެވެ.