މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީން މިއަދު އޮޑިފަހަރުން ގަތް މަހަށްވާ ފައިސާ 48 ގަޑީއިރުގެ ތެރޭގައި ދޫކުރާނެކަމުގެ ޔަގީންކަން އެކުންފުނިން ދީފި އެވެ.
އެކުންފުނިން މިހެން ބުނެފައި މިވަނީ، އީިދު ދުވަހާއި ވަޅު އީދު ދުވަހު އެކުންފުނިން މަސްގަނެފައި ނުވާތީ، މިފްކޯއިން 48 ގަޑީއިރުން ފައިސާ ދެއްކުމުގައި މެދުކެނޑުމެއް އައިކަމަށް ބެލެވި، ބައެއް ފަރާތްތަކަށް އޮޅުން އަރާފާނެތީ އެކަން ސާފުކޮށްދިނުމުގެ ގޮތުންކަމަށް ބެލެވެއެވެ. މާރޗްމަހުގެ 30 ވަނަ ދުވަހާއި 31 ވަނަ ދުވަހު މިފްކޯއިން މަސް ގަނެފައިނުވާތީ، 48 ގަޑީއިރުގެ ޕްލޭންގެ ދަށުން މިއަދު ފައިސާދޫކޮށްފައެއް ނުވެއެވެ. އަދި މާދަމާވެސް އޮޑިފަހަރަށް ފައިސާ ދޫނުކުރާނެއެވެ.
މިފްކޯއިން 48 ގަޑީއިރުން ފައިސާ ދޫކުރަން ފެށިފަހުން ކޮންމެ ހަފުތާއެއްގެވެސް އާދީއްތަ ދުވަސް ފިޔަވައި، އެހެން ހުރިހައި ދުވަހެއްގައި ފައިސާ ޖަމާކުރުމަށްފަހު، އޭގެ ތަފުސީލު އިނގޭނެހެން މިފްކޯގެ ސޯޝަލް މީޑިއާ އެކައުންޓްތަކުގައި ހިއްސާކޮށް، އަދި ބަރާބަރަށް މީޑިއާތަކާވެސް ދަނީ ހިއްސާކުރަމުންނެވެ. އާދީއްތަދުވަހު ފައިސާ ދޫނުކުރަނީ ހުކުރުދުވަހަކީ އާދައިގެ މަތިން މިފްކޯއިން މަސްގަންނަ ދުވަހަކަށް ނުވާތީ އެދުވަހާ ދިމާވާ ޕެއިމެންޓެއް ނެތުމުންވެ.
މިފްކޯއިން މިރޭ މީޑިއާތަކާ ހިއްސާކުރި މެސެޖެއްގައި ބުނެފައިވަނީ، އީދާ ދިމާކޮށް މަސްވެރިން ”ބްރޭކް“ އެއް ނަގާފައިވާތީ، މިފްކޯގެ ފެސިލިޓީތަކުން މަރޗް 30 އަދި 31 ދުވަހު މަސް ނުގަންނަަކަމަށެވެ. އަދި އީދު ”ބްރޭކް“ އަށްފަހު މިއަދު އޮޑިފަހަރުން މަސްކިރާފައިވާކަމަށާއި، އާންމު އުސޫލާ އެއްގޮތަށް 48ގަޑީއިރުގެ ތެރޭގައި މިއަދު ގަތް މަހަށް ފައިސާ ދޫކުރާނެކަމަށް މިފްކޯއިން ބުނެފައި ވެއެވެ.
“ މިއަދުގެ ޕެއިމެންޓް 48 ގަޑީއިރުގެ ތެރޭގައި ދައްކާނަން. އެއީ، މާދަމާ ނޫން އަނެއްދުވަހު. މަސް ވިއްކި އޮޑިފަހަރުތަކުގެ ހުރިހައި ބިލްތަކެއް އަހަރުމެންނަށް ލިބުނުހާ އަވަހަކަށް އެ ފައިސާ ދޫކުރެވޭނެ.“ މިފްކޯއިން ބުނެފައި ވެއެވެ.
މަސްވެރިން ނުވަތަ އޮޑިފަހަރުން ގަންނަ މަހަށްވާ ފައިސާ 48ގަޑީއިރުގެ ތެރޭގައި ދައްކަން ފަށާފައިވަނީ މިދިޔަ އަހަރުގެ ޑިސެންބަރުމަހުގެ 10 ވަނަ ދުވަހުން ފެށިގެންނެވެ. އެދުވަހުން ފެށިގެން މަސްވެރިންނަށް ގަވައިދުން ދަނީ ފައިސާ ދޫކުރަމުންނެވެ. ފައިސާ ބަރާބަރަށް ދޫކުރަން ފެށުމާއެކު މަހަށް ނިކުންނަ އޮޑިފަހަރާއި، އަދި މަސްވެރިކަމުން ދުރުވި ބައެއް ޒުވާނުން މަހަށް ނިކުންނަ އަދަދު ވަނީ އިތުުރުވެފައެވެ. އެހެންނަމަވެސް ރޯދަމަހު މަސްވެރިކަމުގައި ގެންގުޅޭ އާދަކާދަ ނުވަތަ ޘަގާފަތާ އެއްގޮތަށް ރޯދައިގެ ފުރަތަމަ ދުވަސްކޮޅު އަދި ފަހު ދިހައެއްގައި މަހަށް ނިކުންނަ މިންވަރު ދަށްކަމުން، ރޯދަ މަހު މިފްކޯއަށް ލިބުނު މަހުގެ އަދަދުވަނީ އޭގެކުރީ މަހާ އަޅާ ބަލާއިރު ދަށްވެފަ އެވެ.
އީދަށްފަހު ރާއްޖޭގެ ގިނަ އޮޑިފަހަރު މިރޭ އަދި މާދަމާރޭ މަހަށް ނިކުންނާނެއެވެ. އެއާއެކު މިފްކޯއަށް މަސް ލިބޭ މިންވަރުވެސް ނިސްބަތުން އިތުރުވެގެންދާނެކަމަށް ބެލެވެއެވެ.