މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އަށް މަސްވެރިން ވިއްކާ މަހަށް، މަސްކިރާތާ 48 ގަޑީއިރުގެތެރޭގައި ފައިސާ ދޫކުރަން ފެށިފަހުން މިހާތަނަށް ގާތްގަނޑަކަށް 385 މިލިއަން ރުފިޔާ ދޫކޮށްފައިވާކަމަށް ރައީސުލްޖުމްހޫރިއްޔާ މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ”ރައްޔިތުންނާ އެކު“ މި ނަމުގައި ރައީސުލްޖުމްހުރިއްޔާގެ އޮފީހުން އަލަށް ފެށި ޕޮޑްކާސްޓްގައި ވާހަކަފުޅު ދައްކަވަމުންނެވެ.
މަސްވެރިން މަސްކިރާތާ 48 ގަޑީއިރުގެ ތެރޭގައި ފައިސާދޫކުރުމަކީ އެމަނިކުފާނުގެ ރިޔާސީ ވައުދެއްކަން ފާހަގަކުރައްވައި، މިދިޔަ ޑިސެންބަރުމަހު އެވައުދު ތަންފީޒްކުރަންފެށިފަހުން މިހާތަނަށް މެދުނުކެނޑި ގަވައިދުން ފައިސާދޫކުރަމުން އަންނަކަމަށް ވިދާޅުވިއެވެ. އަދި އެ ވައުދު ތަންފީޒްކުރަން ފެށިފަހުން މިހާތަނަށް ގާތްގަނޑަކަށް 385 މިލިއަން ރުފިޔާ މަސްވެރިންނަށް ދޫކޮށްފައިވާކަމަށް ރައީސް ވިދާޅުވި އެވެ.
މިފްކޯއިން މަސްވެރިންނަށް ދައްކަން ހުރި ދަރަނި ދައްކާ ޚަލާސްކުރުމަށްފަހު، 48ގަޑީއިރުގެތެރޭގައި ފައިސާދޫކުރަން ފެށީ މިދިޔަ އަހަރުގެ ޑިސެންބަރުމަހުގެ 10 ވަނަ ދުވަހުއެވެ. ސަރުކާރުން ބަންދުވަހެއް ނަމަވެސް މަސްވެރިންނަށް ދަނީ ފައިސާދޫކުރަމުންނެވެ. ގަވައިދުން ފައިސާ ދޫކުރަން ފެށިފަހުން މަސްވެރިކަމަށް ނިކުންނަ އޮޑިފަހަރުގެ އަދަދު އިތުރުވެ މަސްވެރިކަމަށް ނިކުންނަ ޒުވާނުންގެ އަދަދުވެސް ވަނީ އިތުރުވެފައެވެ.
”ރައްޔިތުންނާ އެކު“ ޕޮޑްކާސްޓްގައި ރައީސް ދެއްކެވި ވާހަަކަފުޅުގައި، ރާއްޖޭގެ ކޮންމެ އަތޮޅެއްގައި އެސްޓީއޯ ރޭޓުން ތެޔޮ ވިއްކޭނެ ނިޒާމް ގާއިމުކުރުމަށް ސަރުކާރުން ކުރަމުންދާ މަސައްކަތްތަކަށްވެސް އަލިއަޅުއްވާލެއްވިއެވެ. އެގޮތުން، މިއަހަރު ތެރޭގައި ރާއްޖޭގެ ކޮންމެ އަތޮޅެއްގައި މަދުވެގެން އެއް ރަށުގައި އެސްޓީއޯގެ ރޭޓުގައި ތެޔޮލިބޭނެ އިންތިޒާމު ގާއިމުކުރެއްވިގެންދާނެކަމުގެ ޔަގީންކަން ދެއްވިއެވެ. ރައީސް ވިދާޅުވީ އަގުހެޔޮކޮށް މަސްވެރިންނަށް ތެޔޮ ލިބޭނެ އިންތިޒާމު ހަމަޖެހިގެންދިއުމަކީ ވަރަށް މުހިންމުކަމެއްގެގޮތުގައި ދެކިވަޑައިގަންނަވާކަމަށެވެ. އެހެންކަމުން އެސްޓީއޯގެ ތެޔޮ ސްކިޑްތައް އަތޮޅުތެރޭގައި ގާއިމުކުރެވިގެންދިއުމާއެކު މަސްވެރިންނަށް އެސްޓީއޯގެ ބޭސް ރޭޓުގައި ޑީސަލް ލިބިގެންދާނެކަމަށް އެމަނިކުފާނު ވިދާޅުވި އެވެ.