މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމުގެ ދަށުން މިއަހަރު ކުރިޔަށްގެންދަން ނިންމާފައިވާ ބޭސިކް މެރިކަލްޗަރ ކޯހުގެ ފުރަތަމަ ބެޗުގައި ބައިވެރިވުމުގެ ފުރުސަތު ހުޅުވާލައިފި އެވެ.
ފިޝަރީޒް މިނިސްޓްރީން ބުނީ، އަސާސީ މެރިކަލްޗަރ ހުނަރުތައް ދަސްކޮށްދިނުމަށް ހިންގާ މިއަހަރުގެ ފުރަތަމަ ކޯސް 26 އޭޕްރިލްއިން 8 މެއިގެ ނިޔަލަށް ކުރިޔަށްގެންދަން ނިންމައި ކޯހުގައި ބައިވެރިވުމުގެ ފުރުސަތު މިހާރު ހުޅުވާލާފައިވާކަމަށެވެ. މި ކޯހުގައި ބައިވެރިވާން ބޭނުންވާ ފަރާތްތަކުން 15 އޭޕްރިލް 2025 ވަނަ ދުވަހުގެ 14.00ގެ ކުރިން ކޯހުގައި ބައިވެރިވުމަށް ކަނޑައަޅާފައިވާ ފޯމު ފުރިހަމަ ކުރެއްވުމަށްފަހު، އައިޑީކާޑުގެ ކޮޕީއާ އެކު މޯލްޑިވްސް މެރިން ރިސާރޗް އިންސްޓިޓިއުޓަށް ހުށަހެޅުމަށް މިނިސްޓްރީން އެދިފައި ވެއެވެ. ފޯމު އީމެއިލް ކުރަން ބޭނުންވާ ފަރާތްތަކަށް [email protected] އަށް ފޯމް މެއިލް ކުރެވިދާނެއެވެ.
ކޯސް ހިންގަން ނިންމާފައިވަނީ ފަނަރަ ފަރާތަކަށް އަމާޒުކޮށްނެވެ. އެހެންކަމުން ކޯހުގައި ބައިވެރިވުމަށް 15 ފަރާތަށްވުރެ އިތުރަށް ފޯމު ހުށަހަޅާފައިވާނަމަ، ބައިވެރިން ހޮވާނީ ފޯމު ހުށަހަޅާ ތަރުތީބުންކަމަށް މިނިސްޓްރީން ބުނެފައި ވެއެވެ. 14 ދުވަހުގެ މި ކޯހުގެ ކިޔެވުން ކުރިޔަށްގެންދަނީ ކ. މާނިޔާފުށީގައި ކަމަށްވުމާއެކު، ކޯހުގެ މުއްދަތުގައި ބައިވެރިން ތިބުމަށް ހަމަޖެހިފައިވަނީވެސް ކ. މަނިޔަފުށީގައެވެ. އަދި، ކޯހުގެ ބޭނުމަށް މާލެއާއި މަނިޔަފުއްޓާ ދެމެދު ކުރާ ދަތުރުތަކާއި ބައިވެރިންގެ ހުރުމާއި ކެއުމުގެ އިންތިޒާމް މެރިން ރިސަރޗް އިންސްޓިޓިއުޓުގެ ފަރާތުން ހަމަޖައްސައިދޭނެކަމަށްވެސް މިނިސްޓްރީން ބުނެފައި ވެއެވެ.
ބޭސިކް މެރިކަލްޗަރ ކޯހަކީ، ވަރލްޑް ބޭންކުގެ އެހީގައި ފިޝަރީޒްް މިނިސްޓްރީން ހިންގާ ޓްރާންސްފޯމް ޕްރޮޖެކްޓުގެ ދަަށުން މޯލްޑިވްސް މެރިން ރިސާރޗް އިންސްޓިޓިއުޓުން ކުރިޔަށްގެންދާ ކޯހެކެވެ. ރާއްޖޭގައި މެރިކަލްޗަރ ސިނާއަތެއް ތައާރަފްކޮށް ތަރައްޤީކުރުމަށް ބޭނުންވާ ދިވެހި ފަންނުވެރިން އުފެއްދުމުގެ މަގުސަދުގައި ކުރިޔަށްގެންދާ މިކޯހުގައި އެކުއަކަލްޗަރގެ ނިޒާމުތަކާއި، ދިރޭ ކާނާ އާލާކުރުމާއި، ފާނަޔާއި ހުއިފިލަނޑަޔާއި ދިވެހި މާގަނޑުމަސް އަދި އިތާމުތް އާލާކުރުމާއި، އާލާ ކުރާ ބާވަތްތަކަށް ޖެހޭ ބަލިތައް ދެނެގަނެ ބަލިތަކުން ރައްކާތެރިކުރުމާއި، މެރިކަލްޗަރ މަސައްކަތްތައް ކުރުމުގައި ތިމާވެށްޓަށް ގެއްލުން ކުޑަވާގޮތަށް އެ މަސައްކަތް ކުރުމާ ގުޅޭގޮތުން މައުލޫމާތު ދިނުމުގެ އިތުރުން، ފާނަޔާއި ހުއިފިލަނޑާ އަދި މާގަނޑުމަސް އާލާކުރުމުގެ އަމަލީ ތަޖުރިބާ ކޯހުގެ ބައިވެރިންނަށް ފޯރުކޮށްދެއެވެ.
މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމަކީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ”ހަފުތާ 14“ ގެ މަގުޗާޓުގައި ހިމަނައިގެން، މެރިކަލްޗަރ ތަރައްޤީކޮށް ރާއްޖޭގެ އެކި ކަންކޮޅުތަކުގައި ދިރިއުޅޭ ފަރާތްތަކަށް، ރަށްރަށާއި ކައިރިން އާމްދަނީއާއި ވަޒީފާގެ އިތުރު ފުރުޞަތުތައް ފަހިކޮށް، ރާއްޖޭގައި ކުރެވޭ އިޤްތިޞާދީ މަސައްކަތްތައް އިތުރަށް ފުޅާކޮށް ސިންދަފާތުކުރުމުގެ މަގުސަދުގައި ފެށި ޕްރޮގްރާމެކެވެ. މިހާތަނަށް އާއިރު މި ޕްރޮގްރާމްގެ ދަށުން 26 ފަރާތެއް ތަމްރީންކޮށްފައި ވެއެވެ.
ދިވެހިރާއްޖޭގައި މެރިކަލްޗަރ ސިނާއަތެއް ޤާއިމުކޮށް ތަރައްޤީ ކުރުމުގެ ގޮތުން ފިޝަރީޒް މިނިސްޓްރީން ދަނީ ގިނަ މަސައްކަތްތަކެއް ކުރަމުންނެވެ. އޭގެ ތެރޭގައި، މެރިކަލްޗަރކުރުމަށް ޝައުޤުވެރިވާ ފަރާތްތަކަށް މޫދު ކޮށްޓާއި ދިރޭ ކުދި ފާނަ ވިއްކުމުގެ ޕްރޮގްރާމް ހިމެނެއެވެ. މޫދު ކޮށްޓާއި ދިރޭ ކުދި ފާނަ އަމިއްލަ ފަރާތްތަކަށް ލިބޭނޭ އިންތިޒާމު ހަމަޖައްސައިދެނީ ފާނަ ބޮޑުކޮށްގެން މެރިކަލްޗރގެ ވިޔަފާރި ކުރުމަށް މަގު ފަހިކޮށްދިނުމުގެ ގޮތުންނެވެ.
މެރިކަލްޗަރ ވަކި ސިނާއަތެއްގެ ގޮތުގައި ކަނޑައެޅުމަށް ސަރުކާރުން ކުރަމުންދާ މަސައްކަތުގެ ތެރެއިން، މެރިކަލްޗަރ ތަރައްޤީކުރުމަށް 4 ޒޯނެއް ކަނޑައެޅުމުގެ އިތުރުން، މަނިޔަފުށްޓާއި ގާތްގަނޑަކަށް 2 ކިލޯމީޓަރު ދުރުގައި އޮންނަ ފަޅެއް، މެރިކަލްޗަރ ކުރުމަށް މިހާރު ވަނީ ކަނޑައަޅާފަ އެވެ. އަދި، މެރިކަލްޗަރގެ ސިނާޢަތު، ބާރު ދުވެއްޔެއްގައި ކުރިއެރުވުމަށްޓަކައި، މެރިކަލްޗަރ ޒޯންތަކުގައި ހަރަކާތްތެރިވާ ފޮރިން އިންވެސްޓަރުންނަށް ގިނަގުނަ ލުއިތަކެއް ދިނުމަށްވެސް ސަރުކާރުން ވަނީ ނިންމާފަ އެވެ. މީގެ އިތުރުން ދުބާއީގެ އަކުއަރ ބްރިޖް ގްރޫޕުގެ އެހީގައި ގއ. މާނާގަލާގައި މަލްޓި ސްޕީޝީޒް ހެޗަރީއެއް ގާއިމްކުރުމުގެ މަސައްކަތްވެސް ދަނީ ކުރަމުންނެވެ.