މިިއަހަރުގެ ޖެނުއަރީ މަހާ އަޅާ ކިޔާއިރު މިއަހަރުގެ ފެބްރުއަރީ މަހު މަސް އެކްސްޕޯޓްކުރި މިންވަރު ބޮޑުތަނުން އިތުުރުވެފައިވާކަން ކަސްޓަމްސްގެ ތަފާސްހިސާބުތަކުން ދައްކައިފި އެވެ.
ކަސްޓަމްސްއިން އިއްޔެ އާންމުކޮށްފައިވާ ފެބްރުއަރީމަހުގެ އިމްޕޯޓް އެކްސްޕޯޓް ތަފާސް ހިސާބުތައް ދައްކާގޮތުން ފެބްރުއަރީމަހު 223 މިލިއަން ރުފިޔާގެ މުދާ އެކްސްޕޯޓްކޮށްފައިވާއިރު، އެންމެ ގިނަ އަދަދަކަށް އެކްސްޕޯޓްކޮށްފައިވަނީ މަހާއި މަހުގެ އުފެއްދުންތަކެވެ.
ފެބްރުއަރީ މަހު އެންމެ ގިނަ އަދަދަކަށް މަސް ބޭރުކޮށްފައިވަނީ ގަނޑުކޮށްގެން ނުވަތަ ފިނިކުރި ރޯަމަހުގެ ގޮތުގަ އެވެ. އެގޮތުން، އެމަހު ގަނޑުކުރި އަދި ފިނިކުރި ކަޅުބިލަމަހާއި ރީނދޫ އުރަހެލި ކަންނެލި ހިމެނޭހެން 151 މިލިއަން ރުފިޔާގެ ރޯމަސް އެކްސްޕޯޓްކޮށްފައިވާކަން ކަސްޓަމްސްގެ ތަފާސް ހިސާބުތަކުން ދައްކައެވެ. މިދިޔަ ޖެނުއަރީމަހު އެކްސްޕޯޓްކޮށްފައިވަނީ 92 މިލިއަން ރުފިޔާގެ ރޯމަހެވެ. އެހެންކަމުން ދެމަސް އަޅާކިޔާއިރު މިއީ 59 މިލިއަން ރުފިޔާގެ އިތުރުވުމެކެވެ.
ފެބްރުއަރީ މަހު އެންމެ ގިނައިން އެކްސްޕޯޓްކޮށްފައިވަނީ ގަނޑުކުރި ކަޅުބިލަމަހެވެ. ފެބްރުއަރީ މަހު 114 މިލިއަން ރުފިޔާގެ ގަނޑުކުރި ކަޅުބިލަމަސް އެކްސްޕޯޓްކޮށްފައިވާއިރު ޖެނުއަރީމަހު އެކްސްޕޯޓްކޮށްފައިވަނީ 73 މިލިއަން ރުފިޔާގެ ގަނޑުކުރި ކަޅުބިލަ މަހެވެ. ދެ މަސްއަޅާކިޔާއިރު މިއީ 41 މިލިއަން ރުފިޔާގެ އިތުރުވުމެކެވެ.
ޖެނުއަރީ މަހާ އަޅާކިޔާއިރު ފެބްރުއަރީމަހު ކަންނެލި މަސް ބޭރުކުރި މިންވަރު ވެސް ވަނީ އިތުރުވެފަ އެވެ. ޖެނުއަރީމަހު، ގަނޑުކުރި ރީނދޫއުރަހަ ކަންނެއްޔާއި، ފިނިކުރި ތާޒާ ކަންނެލި މަސް(ކަނޑާ ޕެކްކޮށްފައި) ހިމެނޭހެން 19 މިލިއަން ރުފިޔާގެ ކަންނެލި މަސް އެކްސްޕޯކޮށްފައިވާއިރު، ފެބްރުއަރީމަހު އެކްސްޕޯޓްކޮށްފައިވަނީ 37 މިލިއަން ރުފިޔާގެ ކަންނެލި މަހެވެ. މިއީ، 18 މިލިއަން ރުފިޔާގެ އިތުރުވުމެކެވެ.
މަސް ދަޅު އެކްސްޕޯޓް ދަށްވެފައިވަނިކޮށް ފެބްރުއަރީ މަހު ވަނީ މަސްދަޅު އެކްސްޕޯޓް ކުރި އަދަދު މައްޗަށް ޖެހިލާފަ އެވެ. ޖެނުއަރީމަހު 29 މިލިއަން ރުފިޔާގެ މަސްދަޅު ބޭރުކޮށްފައިވާއިރު، ފެބްރުއަރީ މަހު 36 މިލިއަން ރުފިޔާގެ މަސް ދަޅު ބޭރުކޮށްފައި ވެއެވެ. މިއީ،7 މިލިއަން ރުފިޔާގެ އިތުރުވުމެކެވެ.
ފެބްރުއަރީ މަހު މަސްއެކްސްޕޯޓްކުރި ގައުމުތަކަށް ބަލާއިރު ލިސްޓުގެ އެންމެ ކުރީގައިއޮތީ ތައިލޭންޑެވެ. ދެވަނައަށް އެންމެ ގިނައިން މަސް އެކްސްޕޯޓްކޮށްފައިވަނީ އިނގިރޭސިވިލާތަށެވެ. ތިންވަނަައިގައި އިންޑިއާ އޮތްއިރު ހަތަރުވަނައިގަ އޮތީ ވިއެޓްނާމެވެ. ފަސްވަނައިގައޮތީ ބަންގްލަދޭޝްއެވެ.