މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން ފާއިތުވެ ދިޔަ ތިން މަސް ދުވަސްތޭރޭގައި މަސްވެރިންނަށް 320 މިލިއަން ރުފިޔާ ދޫކޮށްފި އެވެ.
މިފްކޯއިން އާންމުކޮށްފައިވާ ތަފާސް ހިސާބުތަކަށް ބަލާއިރު، މިދިޔަ އަހަރުގެ ޑިސެންބަރު މަހުގެ 10 ވަނަ ދުވަހުން ފެށިގެން މިއަހަރުގެ މަރޗް މަހުގެ 10 ވަނަ ދުވަހުގެ ނިޔަލަށް އެކުންފުންޏަށް މަސް ވިއްކި 4،737 އޮޑިއަކަށް 320،612،080ރ(ތިންސަތޭކަ ވިހި މިލިއަން ހަލައްކަ ބާރަހާސް އަށްޑިހަ ރުފިޔާ) ދޫކޮށްފައި ވެއެވެ.
މިފްކޯއިން މަސްވެރިންނަށް ދައްކަން އޮތް 38 މިލިއަން ރުފިޔާގެ ”ބެކްލޮގް“ ޚަލާސްކޮށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް މަސްކިރާތާ 48 ގަޑީއިރުގެތެރޭގައި އޮޑިފަހަރަށް ފައިސާ ދޫކުރަން ފެށީ މިދިޔަ އަހަރުގެ މަސްވެރިންގެ ދުވަހު އެވެ. 48 ގަޑީއިރު ފައިސާދޫކުރަން ފެށިތާ އިއްޔެއަށް ތިން މަސްވެފައިވާއިރު މިފްކޯއިން ދަނީ ބަރާބަރަށް މަސްވެރިންނަށް ފައިސާ ދޫކުރަމުންނެވެ.
މަސްވެރިންނަށް ފައިސާ ދޫކުރަމުންދަނީ ބޭންކް އޮފް މޯލްޑިވްސް އާއި ފިނޭންސް މިނިސްޓްރީއާ މިފްކޯއާ ދެމެދު ވެވުނު އެއްބަސްވުމުގެދަށުންނެވެ. ސަރުކާރުންވަނީ މަސްވެރިންނަށް މެދުނުކެނޑި ފައިސާ ދޫކުރަމުންދާނެކަމުގެ ޔަގީންކަންދީފަ އެވެ.