24 ގަޑިއިރު ތެރޭ ހުއްޓުމެއް ނެތި ރާއްޖޭގެ ކަނޑުގެ ސަރަހައްދު ބެލެހެއްޓޭނެ ނިޒާމް މި މަސް ތެރޭގައި ގާއިމު ކުރައްވާނެ ކަަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރ. މީދޫގެ ރައްޔިތުންނާއެކު ބޭއްވި ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ރާއްޖޭގެ ކަނޑުގެ ޚާއްޞަ އިގުތިޞާދީ ސަރަހައްދު ބިޔަ އިރުގައި އެ ސަރަހައްދު އަމިއްލައަށް ބެލެހެއްޓޭނެ ގާބިލުކަމެއް މިހާރު ނެތް ކަމަށެވެ. އަދި އިގްތިސާދު ފުޅާކުރަން، ހާއްސަކޮށް މަސްވެރިކަން ފުޅާ ކުރެވެން އޮތް ބިޔަބޮޑު ސަރަހައްދު ނުބެލެއްޓޭ ކަަމަށާއި އެއީ ކެޕޭސިޓީ ޒަމާނުއްސުރެ އޮތް ވަރު ކަމަށް ވިދާޅުވިއެވެ.
”މި ބޮޑު ސަރަހައްދުން އެހެން ބަޔަކު ވަދެ ބޭނުމެއް ކުރިޔަސް ހަގީގަތުގައި ކުރާނެ ކަމެއް ނެތް. ނުރައްކަލެއް އަޔަސް އެހެން ބައެއްގެ އެހީތެރިކަން ހޯދައިގެން ނޫނީ ކުރެވޭނެ އެއްވެސް ކަމެއް ނެތް.“ ރައީސް ވިދާޅުވި އެވެ.
ރައީސް ވިދާޅުވީ ހަގީގީ އަމިއްލަ ފައިމައްޗަށް ތެެދުވުމުގެ މަސައްކަތް މިހާތަނަށް ކުރެވިފައިވާ ނުވާކަމަށެވެ. އެހެންކަމުން އެ ސަރަހައްދުގެ ސަރަހައްދު ބެލެހެއްޓޭނެ އިންތިޒާމުތަކެއް ހަމަޖައްސަމުން އަންނަކަމަށާއި، އިރާދަކުރެއްވިއްޔާ މިމަހުގެ ތެރޭގައި 24 ގަޑިއިރު ތެރޭ ހުއްޓުމެއް ނެތި ރާއްޖޭގެ ކަނޑުގެ މި ސަރަހައްދު ބެލެހެއްޓޭނެ ނިޒާމް މި މަސް ތެރޭގައި ގާއިމުކުރައްވާނެކަމަށް ރައީސް ވިދާޅުވި އެވެ.
ރައީސް ވިދާޅުވީ، މި ނިޒާމު ގާއިމުކުރެވުމުން ދިވެހި ގައުމު ބެެލެހެއްޓޭ ކަމުގެ އިހުސާސް ކުރެވި، އަމިއްލަ ވަންތަކަމާއި މިނިވަންކަން އިހުސާސްވެގެން ދާނެ ކަަމަށެވެ. އަދި އެހެން ބައެއްގެ ބާރުވެރިކަމާއި އެހީތެރިކަމަށް ނުގޮސް މި ގައުމު ބެލެހެއްޓޭނެ ކަމުގެ ޔަގީންކަން ލިބިގެންދާނެކަމަށެވެ.