މާލެ ސިޓީ ކައުންސިލްގެ ބެލުމުގެ ދަށުގައިވާ މަސްމާރުކޭޓުގެ ދިޔަދޮވި ނައްޓާ އައު ދިޔަދޮވި ހަރުކޮށްދޭނެ ފަރާތެއް ހޯދުމަށް ސިޓީ ކައުންސިލުން ބީލަމަށް ހުޅުވާލައިފި އެވެ.
ބީލަމަށް ހުޅުވާލާ ސިޓީ ކައުންސިލުން އިއްޔެ އާންމުކުރި އިއުލާނުގައިވާގޮތުން ބީލަމުގައި ބައިވެރިވެވޭނީ ދިވެހި ކުންފުނި، ޕާޓްނާޝިޕް، ލޯކަލް އިންވެސްޓްމެންޓް އަދި ވިޔަފާރިކުރުމުގެ ހުއްދަ ލިބިފައިވާ ފަރާތްތަކަށެވެ. ދައުލަތުގެ ޕްރޮކިއުމެންޓް ބީލަމަކާއި ގުޅިގެން ސަސްޕެންޑް ކުރެވިފައިވާ ފަރާތްތަކަށް ބީލަމުގައި ބައިވެރި ނުވެވޭނެކަމަށް އިއުލާނުގައި ބުނެފައި ވެއެވެ.
ސިޓީ ކައުންސިލުން ބުނީ މި މަސައްކަތަށް ޝައުގުވެރިވާ ފަރާތްތަކަށް މިމަހުގެ 10 ވަނަ ދުވަހުގެ 10:30ގައި މައުލޫމާތު ދިނުމުގެ ބައްދަލުވުމެއް ކައުންސިލްގެ ޕްރޮކިއުމަންޓް ސެކްޝަނަށް ބާއްވާނެކަމަށެވެ. އަދި، ބީލަން ހުށަހެޅުން އޮންނާނީ މިމަހުގެ 17 ވަނަ ދުވަހު 10:30ގައި ކައުންސިލްގެ ޕްރޮކިއުމަންޓް ސެކްޝަނުގައި ކަމަށް ކައުންސިލުން ބުނެފައި ވެއެވެ. މައުލޫމާތު ސާފުކުރުމުގެ ބައްދަލުވުމުގައި ބައިވެރިނުވާ ފަރާތްތަކާއި ގަޑިޖެހުމުގެ ފަހުން ބީލަން ހުށަހަޅަން ހާޒިރުވާ ފަރާތަތަކުގެ އާންދާސީ ހިސާބު ބަލައި ނުގަންނާނެކަމަށްވެސް ކައުންސިލުން ބުނެފައި ވެއެވެ.
މި ބީލަމުގައި ހިމެނޭ މަސައްކަތްތަކުގެ ތެރޭގައި މަސް މާރުކޭޓްގެ ސެކެންޑް ފްލޯރގެ ބޮޑުތަކުރުފާނު މަގަށްވާ ފުރާޅާއި، ހަވީރީ މަގަށްހުރި ފުރާޅުގެ ބައެއްގައި ހަރުކޮށްފައިވާ ދިޔަދޮވިތައް ނައްޓައި އަލުން އާ ދިޔަދޮވި ހަރުކުރުމާއި، މަސް މާރުކޭޓްގެ ފުރާޅުގައި ހިމެނޭ 6 ބައިގެ ޖުމްލަ 350 ފޫޓްގެ ދިގުމިނުގެ ޓިނު ދިޔަދޮވި ހަރުކުރުމާއި، މިހާރު ހަރުކޮށްފައި ހުރި ހަލާކުވެފައިވާ ޕްލާސްޓިކް ދިޔަދޮވިތައް ނައްޓާ އެތަން ސާފުކުރުމަށްފަހު އާ ދިޔަދޮވި ހަރުކުރުމާއި، ދިޔަދޮވީގެ ދެކޮޅުގައި 4 އިންޗީގެ ދިޔަދޮވި ހޮޅި ހަރުކުރުން ހިމެނެއެވެ. އަދި މިހާރު ހަލާކުވެފައިވާ ދިޔަދޮވީގެ ބައިތަކާއި، ދިޔަދޮވީގެ ހޮޅިތައް ނައްޓާ ސާފުކުރުމާއި، މިހާރު ދިޔަދޮވި ހަރުކުރަން އަޅާފަހުރި ދިޔަދޮވި ހޮޅިތައް ނައްޓާ ސާފުކުރުން ހިމެނެއެވެ.
މި މަސައްކަތަށް ބީލަން އެވޯޑްކުރާނީ ހުށަހަޅާފައިވާ ބީލަންތައް ކައުންސިލުން އިވެލުއޭޓްކުރުމަށްފަހުއެވެ. އިވެލުއޭޓްކުރަނީ ޕޮއިންޓް ދީގެންނެވެ. އެގޮތުން މަސައްކަތުގެ އަގަށް 70 ޕޮއިންޓް، މަސައްކަތް ނިންމުމަށް ހޭދަކުރާ މުއްދަތަށް 20 ޕޮއިންޓް އަދި މަސައްކަތުގެ ތަޖުރިބާއަށް 10 ޕޮއިންޓް ކަނޑައަޅާފައި ވެއެވެ.