މ. މުލީގައި މަސް ކަނޑާ އަށްޓެއް ހަދައިދޭނެ ފަރާތެއް ހޯދުމުގެ މަސައްކަތް ފަށައިފި އެވެ.
މުލީ ކައުންސިލުން އިއްޔެ ވަނީ، މި މަސައްކަތް ކުރުމަށް ބޭނުންވާ ފަރާތްތަކަށް ބީލަން ހުށަހެޅުމުގެ ފުރުސަތު ހުޅުވާލާފަ އެވެ. ބީލަން ހުށަހެޅެނީ އަމިއްލަ ފަރުދުންގެ ވިޔަފާރީގެ ޤާނޫނުގެ ދަށުން ރަޖިސްޓްރީ ކޮށްފައިވާ ފަރާތްތަކަށާއި، ވިޔަފާރި ރަޖިސްޓްރީ ކުރުމުގެ ޤާނޫނުގެ ދަށުން ރަޖިސްޓްރީ ކޮށްފައިވާ ފަރާތްތަކަށެވެ.
މިމަސައްކަތް ކޮށްދިނުމަށް ޝައުގުވެރިވާ ފަރާތްތަކުން، އެކަމަށް ކަނޑައަޅާފައިވާ ރަޖިސްޓްރޭޝަން ފޯމް ފުރިހަމަކުރުމަށްފަހު މާރޗް 12 ވާ ހޯމަ ދުވަހުގެ 11:00 ގެ ކުރިން [email protected] އަށް އީމެއިލް ކުރުމަށް ކައުންސިލުން އެދިފައި ވެއެވެ. ރަޖިސްޓްރޭޝަން ޝީޓް ގެޒެޓުން ޑައުންލޯޑްކޮށްލެވިދާނެއެވެ. އަދި ކައުންސިލް އިދާރާގެ ކައުންޓަރުންވެސް ފޯމް ލިބެން އެބަހުއްޓެވެ.
ކައުންސިލުން ބުނީ، މި މަސައްކަތަށް ރަޖިސްޓްރީކުރާ ފަރާތްތަކަށް މަޢުލޫމާތު ދިނުމުގެ ބައްދަލުވުމެއް މާރޗް 13 ވަނަ ދުވަހުގެ 11:00ގައި ބާއްވާނެކަމަށެވެ. ބީލަން ހުށަހެޅުން އޮންނާނީ އޭޕްރިލް 07 ވަނަ ދުވަހުގެ 13:00ގައި ކައުންސިލް އިދާރާގަ އެވެ. ބީލަން ހުށަހެޅުމަށް ރަޖިސްޓްރީ ނުކުރާ ފަރާތްތަކާއި ގަޑިޖެހުމަށްފަހު ހުށަހަޅާ ބީލަންތައް ބަލައިނުގަންނާނެކަމަށް ކައުންސިލުން ބުނެފައި ވެއެވެ.
މުލީ ކައުންސިލުން ބުނީ މަސް ކަނޑާ އަށި ހަދަންޖެހެނީ، އެ އިދާރާއިންދޭ ކުރެހުމާއި މަޢުލޫމާތާއި އެއްގޮތަށް އަމިއްލަ ތަކެތީގައި ކަމަށެވެ.