މިއަހަރުގެ ޖެނުއަރީ މަހު ރާއްޖެއިން 4،512.3 މެޓްރިކް ޓަނުގެ މަސް އެކްސްޕޯޓްކޮށްފައިވާ ކަމަށް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކައިފި އެވެ.
އެމްއެމްއޭގެ ހިސާބުތަކުން ދައްކާގޮތުގައި، މިއަހަރުގެ ޖެނުއަރީ މަހު ރާއްޖެއިން ބޭރުކޮށްފައިވަނީ 4،512.3 މެޓްރިކް ޓަނުގެ މަހެވެ. އަދި މިދިޔަ އަހަރުގެ ޖެނުއަރީ މަހު ރާއްޖެއިން ބޭރުކޮށްފައިވަނީ 8،574.1 މެޓްރިކް ޓަނުގެ މަހެވެ. އެހެންކަމުން ރާއްޖެއިން މިއަހަރުގެ ޖެނުއަރީ މަހު މަސް އެކްސްޕޯޓްކުރި މިންވަރު މިވަނީ ވަރަށް ބޮޑު ތަނުން ދަށްވެފަ އެވެ. އެއީ، މިދިޔަ އަހަރުގެ ޖެނުއަރީ މަހާ އަޅާބަލާއިރު %47.4ގެ ދަށްވުމެކެވެ.
ޖުމްލަކޮށް ބަލާއިރު، ފިނިކުރި ނުވަތަ ގަނޑުކުރި ތާޒާ މަހުގެ 3،703.3 މެޓްރިކް ޓަނުގެ މަސް ބޭރުކޮށްފައި ވެއެވެ. އޭގެތެރޭގައި، 2،213.9 މެޓްރިކް ޓަނުގެ ކަޅުބިލަ މަސް، 1،472.5 މެޓްރިކް ޓަނުގެ މަސް، އަދި 16.9 މެޓްރިކް ޓަނުގެ އެހެނިހެން ވައްތަރުގެ ޓޫނާ އެކްސްޕޯޓްކޮށްފައި ވެއެވެ.
ޓޫނާ ނޫން ދެން އެހެން ބާވަތްތަކުގެ ތާޒާ މަހަށް ބަލާއިރު މިމުއްދަތުގައި 71.3 މެޓްރިކްޓަނުގެ މަސް ބޭރުކޮށްފައި ވެއެވެ. މީގެ އިތުރުން މަސްދަޅު އަދި ޕޯޗްޑްގެ ގޮތުގައި 664.6 މެޓްރިކް ޓަނުގެ މަސް ޖެނުއަރީ މަހު ރާޢްޖެއިން ބޭރުކޮށްފައިވެ އެވެ.
ޕްރޮސެސްޑްކޮށްގެން ބޭރުކުރި މަހަށް ބަލާއިރު، 62.5 މެޓްރިކް ޓަނުގެ ޓޫނާ އަދި އެހެނިހެން ބާވަތްތަކުގެ މަހުގެ 73.2 މެޓްރިކް ޓަނު މަސް ބޭރުކޮށްފައި ވެއެވެ.
ކަސްޓަމްސްގެ ތަފާސް ހިސާބުތައް ދައްކާގޮތުންނަމަ، މިއަހަރުގެ ޖެނުއަރީ މަހު 145 މިލިއަން ރުފިޔާގެ މަހާއި މަހުގެ ބާވަތްތައް ރާއްޖެއިން އެކްސްޕޯޓް ކޮށްފައި ވެއެވެ.