ރާއްޖޭގެ މަސްވެރިކަމުގެ ސިނާއަތަކީ ރާއްޖޭގެ އިގުތިޞާދަށް އެންމެ ބޮޑު އާމްދަނީއެއް ވަންނަ ސިނާއަތައް ހައްދަވާނެކަމަށް ފިޝަރީޒް މިނިސްޓަރ އަހްމަދު ޝިޔާމް ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ރައީސުލްޖުމްހޫރިއްޔާ ހަނިމާދޫއަށް ކުރެއްވި ދަތުރުފުޅުގައި އެރަށުގެ ރައްޔިތުންނާއެކު ބޭއްވެވި ބައްދަލުވުމުގައި ވާހަކަ ދައްކަވަމުންނެވެ.
މިނިސްޓަރުގެ ވާހަކަފުޅުގައި، މިސަރުކާރުގެ ވިސްނުން ހުރީ މަސްވެރިކަން އިޔާދަކުރެއްވުމަށްކަން ފާހަނގަ ކުރައްވައި، ރައީސް ޑރ. މުހައްމަދު މުއިއްޒު އެކަމުގައި ގެންގުޅުއްވާ ތަޞައްވުރު ހާމަކުރެއްވި އެވެ. އެގޮތުން ރައީސްގެ ތަސައްވުރަކީ އެމަނިކުފާނުގެ ފަސް އަހަރުގެ ޒައާމަތުގައި ރާއްޖޭގެ މަސްވެރި ސިނާއަތަކީ ރާއްޖޭގެ އިގުތިޞާދަށް އެންމެ ބޮޑު އާމްދަނީ ހޯދައި، ދިވެހި ރައްޔިތުންނަށް އެންމެ ގިނަ ވަޒީފާގެ ފުރުސަތު ފަހި ސިނާއަތަކަށް މަސްވެރިކަމުގެ ސިނާއަތު ހެއްދެވުން ކަމުގައި ވިދާޅުވި އެވެ. މަސްވެރިކަމުގެ ސިނާއަތަށް ގޮންޖެހުންތައް ހުރިކަން ފާހަނގަ ކުރައްވައި މިނިސްޓަރ ވިދާޅުވީ މަސްވެރިކަމުގެ ސިނާއަތް އިޔާދަވެގެންދާ ޒައާމަތަކަށް ޑރ. މުއިއްޒުގެ ފަސް އަހަރުގެ ޒަމާއަތް ވެގެންދާނެކަމަށެވެ.
މިނިސްޓަރ ވިދާޅުވީ ސަރުކާރާއި ހަވާލުވީ އިރު މަސްވެރިންގެ ސިނާއަތުގައި އޮތީ ތިން ކަންބޮޑުވުމެއް ކަމަށެވެ. އެއީ، މަސްވެރިން ބާނާ މަސްކިރުވުމުން ފައިސާ ނުލިބޭ މައްސަލަ ނުވަތަ ފައިސާ ދިނުން ލަސްވާ މައްސަލައާއި، އައިސް ލިބުމުގައި މަސްވެރިންނަށް ދަތިވާ މައްސަލައާއި، މަސްބާނައިގެން ގޮސް މަސްކިރުވޭނެ ގޮތް(ސްޓޯރޭޖް ކެޕޭސިޓީ) ނެތުމުން އެތައް ޓަނެއްގެ މަސް ހިފައިގެން މަސްވެރިން ފަޅުގައި ކިއުގަ ތިބެންޖެހޭ މައްސަލަ ކަމަށެވެ. މި މައްސަލަތައް ހައްލު ކުރަން ރައީސުލްޖުމްހޫރިއްޔާ މަސައްކަތް ކުރައްވަމަުން ގެންދަވާ ކަމަށާއި، އެމަނިކުފާނުގެ ޒައާމަތުގައި އެކަން ހައްލުކޮށްދެއްވާނެކަމުގެ ޔަގީންކަން އެބައޮތް ކަމަށް މިނިސްޓަރު ވިދާޅުވި އެވެ.
”ރައީސުލްޖުމްހޫރިއްޔާ މިވަނީ މި ހުރިހާ ކަމަކަށްވެސް އެމަނިކުފާނުގެ ފަސް އަހަރުގެ ޒައާމަތުގައި ހައްލު ގެނެސްދެއްވާނެކަމުގެ ޔަގީންކަން މަސްވެރިންގެ އާއިލާތަކަށް، މަސްވެރިންގެ ކޮމިއުނިޓީއަށް، ދިވެހި ރައްޔިތުންނަށް އެޔަގީންކަން ދެއްވާފައި. ފުރަތަމަ ދުވަހުއްސުރެ އެކަން ހައްލު ކުރުމަށް މިދަނީ މަސައްކަތް ކުރަމުން.“ މިނިސްޓަރު ވިދާޅުވި އެވެ.
ސަރުކާރުން މަސްވެރިންނަށް ވައުދުވެފައިވާ ގޮތުގެ މަތިން، މިފްކޯއިން މިއަދު ވަނީ ފައިސާ ޖަމާކޮށްފަ އެވެ. ސަރުކާރުން 30 މިލިއަން ރުފިޔާ ދޭން ބުނި ނަމަވެސް މިއަދު ޖަމާކޮށްފައިވަނީ ވައުދުވީ ވަރަށްވުރެ ފަސް މިލިއަން ރުފިޔާ އިތުރަށެވެ. މިއަދު ޖަމާކުރި 35 މިލިއަން ރުފިޔާއާއި މިދިޔަ ބުދަ ދުވަހު ދޫކުރި ފައިސާ ހިމެނޭހެން ޖުމްލަ 105 މިލިއަން ރުފިޔާ މިހާތަނަށް ވަނީ ޖަމާކޮށްދީފަ އެވެ.
މިއަދު ދޫކުރި ފައިސާއާއެކު މަސްވެރިންނަށް ފާއިތުވި ނޮވެމްބަރު 17 ވަނަ ދުވަހުން ފެށިގެން ޖުމްލަ 561 މިލިއަން ރުފިޔާ ސަރުކާރުން މިވަނީ ދޫކޮށްފަ އެވެ. މި ފައިސާ ގުނާފައިވަނީ މަސްވެރިން ކްރެޑިޓަށް ނަގާފައިހުރި ތެލަށާއި އައިހަށް ދެވިފައިވާ ފައިސާ ހިމަނައިގެންނެވެ.