މަސްވެރިންނަށް މިފްކޯއިން މަސްގަތް ބިލުތަކުގެ ތެރެއިން މިދިޔަ ޖެނުއަރީ މަހުގެ ސާދަ ވަނަ ދުވަހުގެ ނިޔަލަށް ދޭން ހުރި ފައިސާ މިއަދު ދައްކާނެކަމަށް މިފްކޯއިން ބުނެފި އެވެ.
މިފްކޯއިން ދެންމެ އެމިނިސްޓްރީގެ ރަސްމީ އެކްސް ގައި ހިއްސާ ކުރި މެސެޖެއްގައި ބުނެފައިވަނީ މަސްވެރިންނަށް ދޫކުރަމުންގެންދާ ފައިސާގެ ތެރެއިން 14 ޖަނަވަރީ 2024 ގެ ނިޔަލަށް ހުރި ބިލުތަކުގެ ފައިސާ މިއަދު ދައްކާ ނިންމާނެ ކަމަށެވެ. އަދި މަސްވެރިން ދެމުންދާ އެއްބާރުލުމަށް ޝުކުރު އަދާކޮށްފައި ވެއެވެ.
”މިކަމުގައި މަސްވެރިންގެ ފަރާތުން މިފްކޯއަށް ލިބޭ އެއްބާރުލެއްވުމަށް މިފްކޯގެ ސީއީއޯ އަދި މެނޭޖްމަންޓުގެ ފަރާތުން ޝުކުރުދަންނަވަން.“ މިފްކޯގެ މެސެޖުގައި ވެއެވެ.
މިފްކޯއިން 14 ޖެނުއަރީގެ ނިޔަލަށް ހުރި ބިލުތަކަށް މަސްވެރިންނަށް ފައިސާ ދޫކުރާނެކަމަށް ބުނި ނަމަވެސް އެއީ ކިހާވަރެއްކަން އާންމުކޮށްފައެއް ނުވެއެވެ. މީގެ ކުރިން ފައިސާ ދޫކުރި އިރުވެސް ފައިސާ ޖަމާކޮށްފައިވަނީ މަސްވެރިން ތެލަށާއި އައިސް ކްރެޑިޓަށް ނަގާފައިވާ ބިލުތަކަށް ފައިސާ އުނިކުރުމަށް ފަހުގަ އެވެ.
މީގެ ކުރިން މިނިސްޓްރީން ވަނީ މިއަދު ތިރީސް މިލިއަން ރުފިޔާ މަސްވެރިންނަށް ޖަމާކުރާނެކަމަށް ބުނެފަ އެވެ. އަދި މަސްވެރިންނަށް ދޭން ހުރި ފައިސާގެ ބެކްލޮގް އަންނަ މަހުގެ ފަހެއްގެ ނިޔަލަށް ދައްކާ ޚަލާސް ކުރާނެކަމަށެވެ.