ވައިގަދަވެ ކަނޑުތައް ގަދަވާނެކަމަށް ލަފާކޮށް ހެނދުނު މުޅި ރާއްޖެއަށް ނެރުނު ސަމާލު މިރޭ 09:00 އާ ހަމަޔަށް ދަންމާލައިފި އެވެ.
މޫސުމާ ބެހޭ ގައުމީ އިދާރާއިން މޫސުން ގޯސްވެ، އެންމެ ފުރަތަމަ މުޅި ރާއްޖެއަށް ހުދު ސަމާލު ނެރުނީ ހެނދުނު 10:00 ގައެވެ. ހުދު ސަމާލުގެ ވަގުތު މެންދުރު ފަހު 03:00 އަށް ހަމަވުމާއެކު، މިހާރު ވަނީ، އެސަމާލުގެ ވަގުތު 09:00 އާ ހަމަޔަށް ދަންމާލާފަ އެވެ.
މެޓް އޮފީހުން ބުނީ ސަމާލު ދަންމާލާފައިވާ ވަގުތުތަކުގައި، ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖެހޭނެކަމަށެވެ. އަދި، ކަނޑުތައް ގަދަވާނެކަމަށް ލަފާކުރެވޭކަމަށެވެ.
ވައިގަދަވެ، ކަނޑުތައް ގަދަވާނެކަމަށް ލަފާކުރެވޭތީ، ކަނޑުދަތުރުކުރާ ފަރާތްތަކުން މޫސުމަށް ސަމާލުވުމަށް މެޓް އޮފީހުން ވަނީ އިލްތިމާސްކޮށްފަ އެވެ.