ސަރުކާރުގެ މަސްކުންފުނި، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން މަސްވެރިން އަތުން ދަރަންޏަށް ނެގި މަހަށްވާ ފައިސާގެ ބައެއް ބިލުތައް ދައްކައިފި އެވެ.
މިފްކޯގެ ތިން ފެސިލިޓީކަމަށްވާ އައްޑޫ ފިޝަރީޒް ކޮމްޕްލެކްސް(އޭއެފްސީ)، ކޫއްޑޫ ފިޝަރީޒް ކޮމްޕްލެކްސް(ކޭއެފްސީ) އަދި ފެލިވަރު ފިޝަރީޒް ކޮމްޕްލެކްސް(އެފްއެފްސީ) އަށް، އޮކްޓޯބަރުމަހުގެ 28 ވަނަ ދުވަހުން ފެށިގެން ނޮވެންބަރު މަހުގެ 26 ވަނަ ދުވަހުގެ ނިޔަލަށް ވިއްކި މަހަށްވާ ފައިސާ ނުވަތަ އެއް މަސްދުވަހުގެ ފައިސާ އެ ކުންފުނިން ބަރާބަރަށް ދައްކަމުން އައިސްފައެއް ނުވެއެވެ. އެހެންކަމުން 1 މަހުގެ ”ބެކްލޮގް“ ގައި ނުވަތަ ދަރަނީގެ ގޮތުގައި، މަސްވެރިންނަށް މިފްކޯއިން ދައްކަން އޮތީ 53.4 މިލިއަން ރުފިޔާއެވެ.
މަސްވެރިންނަށް މިފްކޯއިން ދައްކަންޖެހޭ ފައިސާ ނުދީ އެއް މަސް ފާއިތުވެ، މަސްވެރިން އެކި މަންސަތަކުގައި ކަނބޮޑުވުން ފާޅުކޮށް ޝަކުވާކުރަމުން ދަނިކޮށް އިއްޔެ މިފްކޯއިން ވަނީ، ”ބެކްލޮގް“ގަ ހުރި ބައެއް ބިލުތަކަށް ފައިސާ ދައްކާފައެވެ. އެގޮތުން ފައިސާ ދައްކާފައިވަނީ، އޮކްޓޯބަރުމަހުގެ 28 ވަނަ ދުވަހުން ފެށިގެން ނޮވެންބަރު މަހުގެ 15ވަނަ ދުވަހުގެ ނިޔަލަށް މިފްކޯގެ ފެސިލިޓީތަކަށް މަސްވެރިން ވިއްކި 1،919 މެޓްރިކް ޓަނުގެ މަހަށްވާ ފައިސާ އެވެ. މި19 ދުވަހުގެ ފައިސާ ދައްކާފައި މިވަނީ މަސްވެރިން މިފްކޯގެ ފެސިލިޓީތަކުން ނަގާފައިވާ އައިސް އަދި ތެލަށްވާ 5.7 މިލިއަން ރުފިޔާ އުނިކުރުމަށްފަހު، 22.9 މިލިއަން ރުފިޔާ އެވެ. އެ އުނިކުރި ފައިސާއަކީ މަސްވެރިން މިފްކޯއާއެކު ކުރި ވިޔަފާރީގެ މުއާމަލާތަކުން މިފްކޯއަށް ނުވަތަ ސަރުކާރަށް ސީދާގޮތެއްގައި ލިބުނު އާމްދަނީއެކެވެ.
1 މަހުގެ ”ބެކްލޮގް“ ގެ ތެރެއިން ބާކީއޮތް 11 ދުވަހަށް ދައްކަންޖެހޭ 30.4 މިލިއަން ރުފިޔާ ދައްކާނެ ދުވަހެއް މިފްކޯއިން ބުނެފައެއް ނުވެއެވެ.
މަސްވެރިން އަތުން ގަންނަ މަހަށް މިފްކޯއިން ފަހަކަށް އައިސް ފައިސާ ދޫކުރަމުންދާދިއުން ލަސް ކުރަމުންދާތީ، މަސްވެރިން މިފްކޯއަށް މަސް ކިރަނީ ވަރަށް މަދުންނެވެ. އެވެރެޖްކޮށް ބަލާއިރު އެއީ ހަފުތާއަކަށް 250 މެޓްރިކް ޓަނުގެ މަހެވެ. މިފްކޯއަށް އޮންނަ ބަރޯސާ ގެއްލި، ގިނަ މަސްވެރިން މިހާރު މަސް ވިއްކަމުންދަނީ ޕްރައިވެޓް ކުންފުނި ތަކަށެވެ.