މިއަަހަރުގެ މަސްވެރިންގެ ދުވަސް ފާހަގަކުރުމަށް ރ. ވާދޫގައި މަސްރޭހެއް ބާއްވަން އެ ރަށު ކައުންސިލުން ނިންމައިފި އެވެ.
މަސްވެރިންގެ ދުވަހުގެ މުނާސަބަތުގައިމަސްރޭހެއް ބޭއްވުމަށް ކައުންސިލުން ނިންމީ މަސްވެރިކަމުން ނަފާ ހޯދުމަށް ރައްޔިތުން ޝައުޤުވެރިކުރުވައި، މަސްވެރިކަން ކުރިއެރުވުމުގެ މަގުސަދުގަ އެވެ، މި މަސްރޭސް އޮންނާނީ ޑިސެމްބަރ 07 ވާ ހޮނިހިރު ދުވަހުގެ ހެނދުނު 7:00 އިން ހަވީރު 17:00 އަށް ކަމަށް ކައުންސިލުން ބުނެފައި ވެއެވެ.
މިރޭހުގައި ބައިވެރިވުމުގެ ފުރުސަތު މިހާރު ކައުންސިލުން ވަނީ ހުޅުވާލާފަ އެވެ. މިރޭހުގައި ބައިވެރިވުމަށް ބޭނުންވާ ފަރާތްތަކުން 2024 ނޮވެމްބަރ 28 ވާ ބުރާސްފަތި ދުވަހުގެ ހެނދުނު 10:00 ގެ ކުރިން އެކަމަށް އެދޭ ފޯމު، ފުރިހަމަ ކުރުމަށްފަހު، ހުށަހަޅަން ޖެހެނީ ކައުންސިލް އިދާރާއަށެވެ.
ވާދޫ ކައުންސިލުން ބުނީ މި މަސްރޭސް ވާދަވެރި މުބާރާތެއްގެ ގޮތުގައި ކުރިޔަށް ގެންދަން ބޭނުންވާކަމަށާއި، ވާދޫގެ ރަށްވެހިންނާއ،ި ވާދޫގައި ދިރިއުޅޭ ފަރާތްތަކުގެ
އިތުރުން ރަށުން ބޭރު ފަރާތެއް ނުވަތަ ފަރާތްތަކެއްވެސް ޓިމްތަކުގައި ބައިވެރި ކުރެވިދާނެކަމަށެވެ. އެހެންނަމަވެސް ޓީމުގެ މަސްއޫލުވެރިފަރާތް ކަމުގައި ވާންވާނީ ވާދޫގައި ރަޖިސްޓްރީކޮށްފައިވާ ވާދޫގެ ރައްވެއްސެއްކަމަށް ކައުންސިލުން ބުނެފައި ވެއެވެ. މިމުބާރާތުގައި ބައިވެރިވާ ޓީމެއްގައި ބައިވެރިވެވޭނީ ގިނަވެގެން 5 މީހުންނަށްކަމަށްވެސް ކައުންސިލުން ބުނެފައި ވެއެވެ.
ކައުންސިލުން ބުނީ މި މަސްރޭހުން ވަނަ ވަނައަށް އަންނަ ޓީމްތަކަށް ފައިސާގެ އިނާމު ހުށަހަޅާފައިވާކަމަށެެވެ. އެގޮތުން، 1 ވަނައަށްދާ ޓީމަށް 5000 ރުފިޔާ، 2 ވަނައަށްދާ ޓީމަށް 3000 ރުފިޔާ އަދި 3 ވަނައަށްދާ ޓީމަށް 1500 ރުފިޔާގެ ފައިސާގެ އިނާމެއް ހުށަހަޅާފައި ވެއެވެ. އަދި. މަސްރޭހުގައި އެންމެ ބޮޑުމަސް ބާނާ ފަރާތަކަށް 500 ރުފިޔާގެ ފައިސާގެ އިނާމެއް ދިނުމަށްވެސް ކައުންސިލުން ނިންމާފައި ވެއެވެ.
މަސްރޭސް ސްޕޮންސަރ ކުރުމަށާއި، އެކިވަނަތަކަށް އިނާމް ހުށަހެޅުމުގެ ފުރުސަތު ޑިސެމްބަރ 05 ވާ ބުރާސްފަތި ދުވަހުގެ 14:00 ގެ ނިޔަލަށް ކައުންސިލުން ވަނީ ހުޅުވާލާފަ އެވެ.
މަސްރޭހާ ގުޅިގެން އެއްވެސް މަޢުލޫމާތެއް ސާފުކުރަން ބޭނުންވާނަމަ، ކައުންސިލް އިދާރާއަށް ގޮސް ނުވަތަ އެ އިދާރާގެ ނަންބަރު 4000299 ފޯނަށް ގުޅައިގެން ނުވަތަ info@vaadhoo.gov.mv އަށް މެއިލް ކޮށްގެންް މައުލޫމާތު ސާފުކުރެވޭނެ އިންތިޒާމު ހަމަޖައްސާފައިވާކަމަށް ކައުންސިލުން ބުނެފައި ވެއެވެ.