ރާއްޖޭގެ ސަރަހައްދަށް ގާނޫނާ ޚިލާފަށް ވަދެ އުޅުނު ބޭރުގެ ބޯޓެއް އަތުލައިގަނެފި އެވެ.
މޯލްޑިވްސް ނެޝަނަލް ޑިފެންސް ފޯރސް(އެމްއެންޑީއެފް) އިން ބުނީ، އެ ބޯޓު އަތުލައިގަތީ، އެމްއެންޑީއެފް އެއަރ ކޯރ އާއި، އެމްއެންޑީއެފް ކޯސްޓްގާޑުން ގުޅިގެން ރާއްޖޭގެ އުތުރުގެ ސަރަހައްދު ބެލެހެއްޓުމަށް ހިންގި ޚާއްޞަ އޮޕަރޭޝަނެއްގައި ކަމަށެވެ. މި ބޯޓް ލޮކޭޓްކޮށްފައިވަނީ އެއަރ ކޯގެ ޑްރޯންގެ އެހީގައި ކަމަށް އެމްއެންޑީއެފްއިން ބުނެފައި ވެއެވެ. އަތުލައިގަތް މި ބޯޓަކީ ކޮން ގައުމަކަށް ނިސްބަތްވާ ބޯޓެއްކަމެއް އެމްއެންޑީއެފްއިން ހާމަކޮށްފައެއް ނުވެއެވެ.
އެމްއެންޑީއެފްއިން ބުނީ، އެ ބޯޓް ކޯސްޓްގާޑުން އިންޓަރސެޕްޓް ކުރުމަށްފަހު މިހާރު ކޯސްޓްގާޑްގެ ބެލުމުގެ ދަށަ ގެންގޮސްފައިވާކަމަށެވެ.
މީގެ ކުރިންވެސް ރާއްޖޭގެ ކަނޑުގެ ސަރަހައްދުގައި މަސްވެރިކަންކުރަން އުޅެނިކޮށް އަވަށްޓެރި ގައުމުތަކުގެ ބޯޓްތައް ހިފަހައްޓާ، ޖޫރިމަނާކޮށްފައި ވެއެވެ. އަދި ބައެއް ހާލަތްތަކުގައި ބޯޓުތައް ދައުލަތަށް ނަގާފައިވެސް އެބަހުއްޓެވެ.