ބާރަށުގައި މަސްވެރިކަމަށް ޚާއްސަ ޖެޓީއެއް ހައްދަވައި ދެއްވާނެކަމަށް ރައޢިސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ، އިއްޔެ ބާރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
”އާދެ، އަޅުގަނޑުމެން ރަށަށް އަރައިގެން އައިއިރުގައި، އެ ޖެޓީ އޮތް ހާލު، ހަމަ އަޅުގަނޑުމެން އެންމެންވެސް ދުށިން. އަޅުގަނޑަށް މަޢުލޫމާތު ލިބެނީ، ކުރީގައި އެ ޖެޓީ ހެދި ފަހުން މިދިޔަ ދުވަސްތަކުގައި މާބޮޑު އަޅައިލުމެއް ނެތީމަ އެއޮތީ ހަލާކުވެފައިކަން. އިރާދަކުރެއްވިއްޔާ ހަމަ ވަޢުދުވީ ގޮތަށް، އެ މަސައްކަތް ކޮށްދޭނެ ވާހަކަ ދަންނަވަން. އަދި އެ ޖެޓީ ހަދާއިރު، މަސްވެރިކަމަށް ވަކިން ޖެޓީއެއް އިރާދަކުރެއްވިއްޔާ ހަދައިދޭނަން.“ ރައީސް ވިދާޅުވި އެވެ.
ޖެޓީއެއް އަޅުވާނެ ވާހަކަ ވިދާޅުވި ނަމަވެސް އެކަމުގެ ތަފުސީލެއް ނުދެއްވައެވެ. ރައީސްގެ ދިގު ވާހަކަފުޅުގައި މަސްވެރިންނާއި ގުޅޭ އިތުރުވާހަކަ އެއް ވިދާޅެއް ނުވެއެވެ.