ދިވެހިރާއްޖޭގެ ހުރިހައި އަތޮޅަކުން މަސްވެރިންނަށާއި، އާންމު ރައްޔިތުންނަށް ހެޔޮ އަގުގައި ތެޔޮ ލިބޭނެ އިންތިޒާމު ހަމަޖެއްސުމުގެ މަސައްކަތް ސްޓޭޓް ޓްރޭޑިންގް އޯގަނައިޒޭޝަން(އެސްޓީއޯ)އިން ފަށައިފި އެވެ.
ކޮންމެ އަތޮޅަކުން އަސާސީ ރޭޓެއްގައި ތެޔޮ ލިބޭނެ އިންތިޒާމު ހަމަޖެއްސުމަށް، ”ފިއުލު ސްޓޯރޭޖްތައް“ ގާއިމްކުރުމުގެ މަޝްރޫޢު އިފްތިތާހުކުރުމަށް މިއަދު ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން، އެސްޓީއޯގެ މެނޭޖިންގ ޑިރެކްޓަރު ޝިމާދު އިބްރާހީމް ވިދާޅުވީ، މި ފެއްޓެވި މަޝްރޫއަކީ ރާއްޖޭގެ ކޮންމެ އަތޮޅެއްގަ މަދުވެގެން އެއް ރަށެއްގައި އެސްޓީއޯގެ ޝެޑް ރޭޓުން އާންމު ރައްޔިތުންނާއި މަސްވެރިންނަށް ތެޔޮ ފޯރުކޮށްދެވޭނެ އިންތިޒާމު ހަމަޖެއްސުމުގެ މަޝްރޫއުކަމަށެވެ. އެގޮތުން، މި މަޝްރޫއުގެ ދަށުން 2026 ވަނަ އަހަރުގެ ފެބްރުއަރީމަހުގެ ނިޔަލަށް އެސްޓީއޯއިން މިހާރު ކަނޑައަޅާފައިވާ 19 ރަށަކުން ތެޔޮ ލިބޭނެ އިންތިޒާމު ހަމަޖައްސަވާނެކަމުގެ ޔަގީކަން ދެއްވި އެވެ.
އެސްޓީއޯއިން ތެލުގެ ޚިދުމަތް ދިނުމަށް ކަނޑައަޅާފައިވާ ރަށްތައް:
- ހއ. އިހަވަންދޫ
- ހދ. ހަނިމާދޫ
- ށ. މިލަންދޫ
- ނ. މަނަދޫ
- ރ. ދުވާފަރު
- ބ. ތުޅާދޫ
- ޅ. ފެލިވަރު
- އއ. މަތިވެރި
- އދ. މާމިގިލި/މަހިބަދޫ
- ވ. ފެލިދޫ
- މ. މުލައް
- ފ ނިލަންދޫ
- ދ. ކުޑަކުވަދޫ
- ތ. ހިރިލަންދޫ
- ލ. ގަން
- ގއ. ކޫއްޑޫ
- ގދ. ފަރެސްމާތޮޑާ
- ފުވައްމުލައް ސިޓީ
- އައްޑޫ ސިޓީ، ހުޅުދޫ
ޝިމާދު ވިދާޅުވީ، މަސްވެރިން އެންމެ ގިނަ ސަރަހައްދަކީ މާލެ ސަރަހައްދުކަމަށްވުމާއެކު މިދިޔަ ޖޫންމަހުގައި ހުޅުމާލޭގައި ހުންނަ ފިއުލް ސަޕްލައި މޯލްޑިވްސް(އެފްއެސްއެމް)ގެ ޝެޑް އިން މަސްވެރިންނަށް ހެޔޮ އަގުގައި ތެޔޮ ވިއްކޭނެ އިންތިޒާމު ހަމަޖައްސާފައިވާކަމަށާއި، މިވަގުތުވެސް ކޫއްޑޫ ފިޝަރީޒް ކޮމްޕްލެކްސް(ކޭއެފްސީ) އާއި ފެލިވަރު ފިޝަރީޒް ކޮމްޕްލެކްސް(އެފްއެފްސީ) އޮން މިހާރުވެސް މަސްވެރިންނަށް ހެޔޮ އަގުގައި ތެޔޮ ލިބޭނެގޮތް ހަމަޖައްސާފައިވާކަމަށެވެ. އަދި، އެދެ ފެސިލިޓީގަވެސް މިވަގުތު އެސްޓީއޯގެ ސެޓްއަޕް ގާއިމުވެފައި ނެތުމާއެކު، އެތަނުގައި އެސްޓީއޯގެ ސެޓްއަޕް ގާއިމުކުރުމަށް ބޭނުންވާ ބިން ހަމަޖައްސައިދިނުމަށް ފިޝަރީޒް މިނިސްޓްރީގެ އެހީތެރިކަމަށް ޝިމާދު އެދިވަޑައިގެންނެވި އެވެ. މީގެ އިތުރުން ޝިމާދު ވަނީ އަތޮޅުތެރޭގައި ”ފިއުލް ސްޓޯރޭޖް“ ގާއިމުކުރުމުގެ މަސައްކަތުގައި މިނިސްޓްރީ އޮފް ސިޓީސް، ލޯކަލް ގަވަންމަންޓް އެންޑް ޕަބްލިކް ވާރކސްގެ އެހީތެރިކަމަށްވެސް އެދިވަޑައިގެންފަ އެވެ.
ޝިމާދު ވިދާޅުވީ މިހާރުވެސް ބައެއް ރަށްރަށުން މިމަޝްރޫއަށް ބޭނުންވާ ބިންތައް ބަނދަރު ކައިރިން ހަމަޖައްސައިދީފައިވާކަމަށެވެ. އަދި އަމާޒަކީ 2026 ގެ ކުރިން މިހާރު ކަނޑައަޅާފައިވާ ރަށްތަކުގައި ސެޓްއަޕް ގާއިމުކޮށް މަސްވެރިންނާއި އާންމު ރައްޔިތުންނަށް ހެޔޮ އަގުގައި ތެޔޮ ފޯރުކޮށްދިނުންކަމަށާއި، އަދި މަސްވެރިކަމުގެ ސިނާއަތު ތަރައްގީވަމުން އަންނަމުންދާ މިންވަރަށް ބަލައި މި މަޝްރޫއުގެ ދަށުން އިތުރު ރަށްތަކުގައިވެސް ތެޔޮ ލިބޭނެ ނިޒާމު ގާއިމުކުރުންކަމަށެވެ.
މި މަޝްރޫއު މިވަގުތު ކުރިޔަށްގެންދަން ނިންމާފައިވަނީ މޯބައިލް އޮފީހެއް ކޮންމެ ރަށެއްގައި ގާއިމުކޮށް، ކޮންޓެއިނަރުގެ ޒަރީއާއިން ކަނޑައަޅާފައިވާ ރަށްތަކަށް ތެޔޮ ފޯރުކޮށްދޭ މޮޑެލްއަކަށެވެ. ގޭބިސީތަކާއި ދުރުގައި ވީހާވެސް ބަދަރާއި ގާތުން މި ޚިދުމަތް ފޯރުކޮށްދޭން ނިންމާފައިވަނީ ސިޓީ މިނިސްޓްރީގެ އެހީތެރިކަމާއެކުގަ އެވެ. މި ޚިދުމަތުގައި ބޭނުންކުރަނީ 40 ފޫޓްގެ ކޮންޓެއިނަރުކަމަށް އެސްޓީއޯއިން މައުލޫމާތު ދެއެވެ. އަދި ސިވިލް މަސައްކަތަށް، އެ ރަށަކުން ކޮންޓްރެކްޓް އުސޫލުން މީހުން ނެގުމަށްވެސް އެސްޓޯއިން ވިސްނާފައި ވެއެވެ.
”ތާނގީ ބަނުމަކީ، ދުވަސްތަކެއް ނަގާނެ. އަދި ޚަރަދު ބޮޑު ކަމަކަށްވާތީ، ”ފިއުލް ސްކިޑް“ އެއީ ކޮންޓެއިނާގެ ޒަރީއާއިން އެތަންތާނގަ(ރަށްރަށުގަ) ރަނގަޅު ”ސެޓްއަޕް“ އެއް ގާއިމުކޮށް، އެ ސެޓްއަޕް އިން މަސްވެރިންނަށް ތެޔި ފޯރުކޮށްދިނުން އެ ސަރަހައްދުގައި.“ އެސްޓީއޯގެ އެމްޑީ ވިދާޅުވި އެވެ.
ތެލަކީ އަސާސީ ޚިދުމަތެއްގެ ގޮތުގައި ކަނޑައަޅައި، ރާއްޖޭގެ ކޮންމެ އަތޮޅެއްގައި މަދުވެގެން އެއް ރަށުގައި އެސްޓީއޯގެ ރޭޓުގައި އާންމު ރައްޔިތުންނަށް ޕެޓްރޯލާއި ޑީސަލް ލިބޭނެ ފަސޭހަ އިންތިޒާމެއް ހަމަޖެއްސެވުމަކީ ރައީސުލްޖުމްހުރިއްޔާ ޑރ. މުހައްމަދު މުޢިއްޒުގެ ރިޔާސީ ވަޢުދުފުޅެކެވެ. މިއަދުގެ ރަސްމިއްޔާތުގައި ބައިވެރިވަޑައިގެން، މި މަޝްރޫއު އިފްތިތާހުކޮށްދެއްވީ ރައީސުލްޖުމްހޫރިއްޔާ އެވެ. މި ރަސްމިއްޔާތުގައި ދައުލަތުގެ ބައެއް ވަޒީރުންނާއި އެސްޓީއޯގެ އިސްވެރިންނާއި މުވައްޒަފުން ބައިވެރިވަޑައިގެންނެވި އެވެ.
އެސްޓީއޯއިން ރާއްޖޭގެ ހުރިހައި އަތޮޅަކުން ތެޔޮ ލިބޭނެ އިންތިޒާމު ހަމަޖެއްސުމުގެ މަސައްކަތް ފަށާފައި މިވަނީ، އެސްޓީއޯ މެދުވެރިކޮށް މިފްކޯއިން މަސްވެރިންނަށް ދޫކުރަމުންދާ ތެޔޮ ކޮންޓްރޯލްކޮށްގެން ވިއްކަމުންދާތީ އެކަމާ މަސްވެރިން ނުރުން ފާޅުކުރަމުންދާ ދަނޑިވަޅެއްގަ އެވެ. އެސްޓީއޯއިން ނަގާ ތެލަށް މިފްކޯއިން ބަރާބަރަށް ފައިސާ ދައްކަމުން ނުދާ މައްސަލައިގައި ހުރިހައި ތަކްލީފެއް އުފުލަން ޖެހިފައިވަނީ މަސްވެެރިންނަށެވެ. މިވަގުތު މަސްވެރިންނަށް މިފްކޯއިން ދޫކުރަނީ 1،000 ލީޓަރުގެ ތެލެވެ. އަދި މިފްކޯގެ ބޯޓު ފަހަރުންވެސް މިހާރު ތެލެއް ނުވިއްކަ އެވެ. މިކަމާހުރެ، އެކަށީގެންވާ މިންވަރަށް ތެޔޮ ނުލިބޭތީ ވަރަށް ގިނަ އޮޑި ފަހަރަށް މަހަށްފުރަން ވަނީ ދަތިކަމަކަށްވެފަ އެވެ. އެސްޓީއޯއިން މި ފެށި މަޝްރޫއާއެކު މަސްވެރިންނަށް މިހާރު ތެޔޮ ލިބުމުގައި ހުރި ދަތިތަކަށް ހައްލެއް އަންނާނެކަމަށް ބެލެވެއެވެ.