ކުޅުދުއްފުށި ސިޓީ އޮޑިއެހެލާ ސަރަހައްދުގައި ވީރާނާވުމަށް ދޫކޮށްލާފައިވާ އޮޑި ދޯނިފަހަރު ނެގުމަށް، ސިޓީ ކައުންސިލުން މުހުލަތެއް ދީފި އެވެ.
މިކަމާގުޅެ ގޮތުން ކުޅުދުއްފުށީ ކައުންސިލް އިދާރާއިން އާންމުކޮށްފައިވާ އިއުލާނެއްގައި ބުނެފައިވަނީ، އެ ސިޓީގެ އޮޑިއެހާލާ ސަރަހައްދު އެންމެ އެދެވޭ ގޮތެއްގައި ބޭނުންކުރެވޭނެ އިންތިޒާމެއް ހަމަޖެއްސުމަށް ކުރަމުންދާ މަސައްކަތުގެ ތެރެއިން، މަރާމާތުގެ މަސައްކަތެއް ކުރިޔަށް ނުދާ އަދި ވީރާނާވުމަށް ދޫކޮށްލާފައިވާ އޮޑީ ދޯނިފަހަރު ނެގުމުގެ މަސައްކަތް އެ އިދާރާއިން ދަނީ ކުރަމުންނެވެ.
ސިޓީ ކައުންސިލުން ވަނީ މަރާމާތުގެ މަސައްކަތެއް ކުރިޔަށް ނުދާ އަދި ވީރާނާވުމަށް ދޫކޮށްލާފައިވާ އޮޑީ ދޯނިފަހަރުގެ ތެރެއިން ނެގުމަށް ހަމަޖެހިފައިވާ ދޯނިތަކުގެ ފޮޓޯތައްވެސް އިއުލާނާއެކު އާންމުކޮށްފަ އެވެ. ކައުންސިލުން ބުނީ، އާންމުކޮށްފައިވާ ފޮޓޯތަކުގައިވާ އޮޑިފަހަރުތައް މިއަދުން ފެށިގެން 30 ދުވަސްތެރޭގައި ނަގައި ބިންސާފުކުރުމުގެ ފުރުސަތު ވެރިފަރާތްތަކަށްދޭ ކަަމަށެވެ.
ކައުންސިލުން ބުނީ އޮޑިފަހަރު ނެގުމަށް ދީފައިވާ މުހުލަތުގައި، ނުނަގައިފިނަމަ، އެ އޮޑިފަހަރުތަކަކީ ވީރާނާވުމަށް ދޫކޮށްލާފައިވާ އޮޑިފަހަރުތަކެއް ކަމަށްބަލާ، ”ބަނދަރު ބެލެހެއްޓުމާބެހޭ ގަވާއިދު –2024/R-73“ ގެ 32 އަދި 33 ވަނަ މާއްދާގެ ދަށުން އިތުރު އެންގުމަކާއި ނުލާ އެ އޮޑިފަަހަރުތައް ނަގާ، ނައްތާލާނެކަމަށެވެ.