މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމްގެ ދަށުން ބޭސިކް މެރިކަލްޗަރ ޓްރެއިނިންގ ކޯހެއް ފަށައިފި އެވެ.
މި ތަމްރީން ޕްރޮގްރާމް ފަށާފައިވަނީ އިއްޔެ ކ. މަނިޔަފުށީގައެވެ. އަންނަ ނޮވެންބަރު މަހުގެ 12 ވަނަ ދުވަހުގެ ނިޔަލަށް ކުރިޔަށްގެންދާ މި ކޯހުގައި 14 ފަރާތަކުން ބައިވެރިވި އެވެ. ކ. މަނިޔަފުށީގައި ކުރިޔަށްގެންދާ މި ކޯހުގެ އިންތިޒާމު ހަމަޖައްސަނީ، މޯލްޑިވްސް މެރިން ރިސާރޗް އިންސްޓިޓިއުޓުންނެވެ.
މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމަކީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ”ހަފުތާ 14“ ގެ މަގުޗާޓުގައި ހިމަނައިގެން، މެރިކަލްޗަރ ތަރައްޤީކޮށް ރާއްޖޭގެ އެކި ކަންކޮޅުތަކުގައި ދިރިއުޅޭ ފަރާތްތަކަށް، ރަށްރަށާއި ކައިރިން އާމްދަނީއާއި ވަޒީފާގެ އިތުރު ފުރުޞަތުތައް ފަހިކޮށް، ރާއްޖޭގައި ކުރެވޭ އިޤްތިޞާދީ މަސައްކަތްތައް އިތުރަށް ފުޅާކޮށް ސިންދަފާތުކުރުމުގެ މަގުސަދުގައި، މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އާއި މޯލްޑިވްސް މެރިން ރިސާރޗް އިންސްޓިޓިއުޓް ގުޅިގެން ކުރިޔަށްގެންދާ ޕްރޮގްރާމެކެވެ.
މި ޕްރޮގްރާމްގެ ދަށުން، ފަރުމަސް އާލާކުރުމަށް ބޭނުންވާ ހެޗަރީތައް ޤާއިމުކުރާނެ ގޮތާއި އެކުއަކަލްޗަރގެ ހުނަރުތައް ޒުވާނުންނަށް ދަސްކޮށްދިނުމުގެ ފުރަތަމަ ތަމްރީން ޕްރޮގްރާމް ކުރިޔަށްގެންދިޔައީ މިދިޔަ ފެބްރުއަރީ މަހުގެ 8 އިން 21 ވަނަ ދުވަހުގެ ނިޔަލަށެވެ. އެ ތަމްރީނު ޕްރޮގްރާމްގައި ރާއްޖޭގެ އެކި ސަރަހައްދުތަކުން 15 މީހުން ބައިވެރިވެއެވެ.