ފިޝަރީޒް މިނިސްޓަރު، އަހްމަދު ޝިޔާމް މާދަމާ އޮންނަ ރައްޔިތުންގެ މަޖިލީހުގެ ޖަލްސާއަށް ހާޒިރުކުރަން އެޖެންޑާކޮށްފި އެވެ.
މިނިސްޓަރު މާދަމާ މަޖިލީހަށް ހާޒިރުކުރަނީ މަރަދޫ ދާއިރާގެ އެމްޑީޕީ މެންބަރު އަހްމަދު ދީދީ އައްޑޫސިޓީ ފިޝަރީޒް ކޮމްޕްލެކްސްއާގުޅޭގޮތުން ހުށަހަޅުއްވާފައިވާ ސުވާލުކުރުމަށެވެ.
މެމްބަރު އަހްމަދު ދީދީ މިނިސްޓަރަށް ހުށަހެޅުއްވި ސުވާލުގައި، އައްޑޫސިޓީ ފިޝަރީޒް ކޮމްޕްލެކްސްގެ ކެޕޭސިޓީ ބޮޑު ކުރުމަކީ މިސަރުކާރުގެ ވައުދަަކަށްވެފައި، އަދި، އެއީ މަސްވެރިން ވަރަށް ބޮޑަށް ބޭނުންވެފައިވާކަމަށްކަށްވީހިނދު އެ މަސައްކަތްފެށޭނީ ކޮންތާރީޚެއްގައިތޯ ސާފުކުރައްވަން އެދިވަޑައިގެންފައި ވެއެވެ.
ފިޝަރީޒް މިނިސްޓަރު މަޖިލީހަށް ހާޒިރުކުރަން އެޖެންޑާކޮށްފައި މިވަނީ، މިފްކޯއިން މަސްވެރިން އަތުން ދަރަންޏަށްނެގި ފައިސާ ނުދީ އެއްމަސްވެފައިވާއިރު، މިނިސްޓަރު އެކަމާއަޅާނުލައްވައި އަދި މަސްވެރިންގެ ހައްގުގައި އެއްވެސް އެއްޗެއް ވިދާޅުނުވާކަމަށްބުނެ ،މަސްވެރިން އެކިމަންސަތަކުގައި ކަންބޮޑުވުންފާޅުކުރަމުންދާ ދަނޑިވަޅެއްގައެވެ. އަދި ތެލާއި އައިސްލިބުމުގެ ދަތިކަމާހުރެ ގިނަ އޮޑިފަހަރު މަހަށްނުފުރި މަސްވެރިން ދަތިއުދަނގޫތަކާ ތަހައްމަލުކުރަމުންދާ ދަނޑިވަޅެއްގައެވެ.