އޮޑިފަހަރުތަކުން، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އަށް ކިރުވި މަހަށްވާ ފައިސާ މި ހަފުތާގެ ތެރޭގައި ދެއްކޭނެ އިންތިޒާމު ހަމަޖައްސާނެކަމަށް އެކުންފުނިން ބުނެފައިވާއިރު، މިއަދު މިއީ ހިނގަމުން މިދާ ހަފުތާގެ އެންމެ ފަހު ދުވަހު އެވެ.
މިފްކޯއިން މިމަހުގެ 21 ވަނަ ދުވަހު ބުނެފައިވަނީ، މަސްވެރިންނަށް ދޭން ”ޕެންޑިންގ“ގަ ހުރި ފައިސާ ވީ އެންމެ އަވަހަކަށް ހޯދައި މި ހަފުތާގައި ޖަމާކުރެވޭތޯ، އެކުންފުނިން ކެނޑިނޭޅި މަސައްކަތް ކުރަމުންދާކަމަށެވެ. އަދި، އަމާޒަކީ މި ހަފުތާގެ ތެރޭގައި އޮޑިވެރިންނަށް ފައިސާ ޖަމާކުރެވޭނެގޮތް ހަމަޖެއްސުން ކަމަށް ބުނެފައި ވެއެވެ. އެހެންނަމަވެސް، މިއަދު މިއީ ފައިސާ ދޫކުރަން ބުނި ހަފުތާގެ ފަހުދުވަސްކަމަށްވެފައި، މިކަމުގެ އަޕްޑޭޓް ހޯދާލުމަށް މި ނޫހުން ގުޅާލުމުން އެކުންފުނިން ޖަވާބުދާރީއެއް ނުވެއެވެ. ސަރުކާރަށްވެސް ފިޝަރީޒް މިނިސްޓްރީއަށްވެސް އަދި މިފްކޯއަށްވެސް ފައިސާ ދޫކުރާނެ އަދި ދޫކުރެވޭނެ ދުވަހެއް ކެރިގެން ބުނަން ނުކެރުނެވެ. ހައްތާވެސް ބުނަނީ، ފައިސާ ހޯދަން މަސައްކަތްކުރާ ވާހަކަ އެވެ.
މިފްކޯއިން އެންމެ ފަހުން މަސްވެރިންނަށް ފައިސާ ދޫކޮށްފައިވަނީ، ސެޕްޓެންބަރުމަހުގެ 29 ވަނަ ދުވަހު އެވެ. އެދުވަހު ދޫކޮށްފައިވަނީ، 24 އޮގަސްޓުން 26 ސެޕްޓެމްބަރު މަހުގެ ނިޔަލަށް ގަތް މަހަށްވާ 17,350,903ރ (ސަތާރަ މިލިއަން ތިން ލައްކަ ފަންސާސް ހާސް ނުވަ ސަތޭކަ 3 ރުފިޔާ) އެވެ.
މިފްކޯއިން އާންމުކޮށްފައިވާ މައުލޫމާތުތަކަށް ބަލާއިރު، 28 ސެޕްޓެމްބަރުން އޮކްޓޯބަރު މަހުގެ 14 އާ ހަމަޔަށް މިފްކޯގެ ފެސިލިޓީތަށާއި ބޯޓްތަކަށް އޮޑިފަހަރުން ކިރި، 882.32 މެޓްރިކް ޓަނުގެ މަހަށްވާ 9.1 މިލިއަން ރުފިޔާގެ ދަރަނި އެކުންފުނިން މަސްވެރިންނަށް ދައްކަން ޖެހެއެެވެ. އަދި، 15 އޮކްޓޯބަރުން އިއްޔެގެ ނިޔަލަށް ކިރުވި މަހުގެ އަދަދާއި، އެ މަހަށްވާ ފައިސާގެ އަދަދު އަދި މިފްކޯއިން ހާމަކޮށްފައެއް ނުވެއެވެ. އެހެންކަމުން27 އޮކްޓޯބަރުން ފެށިގެން އިއްޔެގެ ނިޔަލަށް މިފްކޯއިން މަސްވެރިންނަށް ދައްކަން ޖެހޭ ދަރަނީގެ ޖުމްލަ އަދަދު ސާފެއް ނުވެއެވެ.