މަސްދޯނިފަހަރުގައި ލޮނުފެނުން މަސް ފިނިކުރާ ނިޒާމު (އާރްއެސްޑަބްލިޔު) ގާއިމުކުރުމުގެ މަޝްރޫއާ ގުޅޭ މައުލޫމާތު ސެޝަނެއް ށ. ކޮމަންޑޫގައި ބާއްވައިފި އެވެ.
ފިޝަރީޒް މިނިސްޓްރީން ބުނާގޮތުގައި، ކޮމަންޑޫ ކައުންސިލް އިދާރާގައި އިއްޔެ ބޭއްވި މި ސެޝަން ކުރިޔަށް ގެންދިޔައީ އެ މިނިސްޓްރީގެ އާރްއެސްޑަބްލިއު ޕްރޮޖެކްޓް މެނޭޖްމެންޓް ޔުނިޓްގެ ފަރާތުންނެވެ. ކައުންސިލް މެންބަރުންނާއި އެރަށުގެ މަސްވެރިން ބައިވެރިވި މި ސެޝަންގައި އާރްއެސްޑަބްލިއު ނިޒާމާއި، އެނިޒާމު އެޅުމަށް ހަމަޖައްސައިދޭ ލުއި ލޯނާބެހޭ މައުލޫމާތު ހިއްސާކޮށްފައި ވެއެވެ. އަދި، މަސްވެރިން ބާނާމަހުގެ ކުއަލިޓީ ހިފެހެއްޓުމުގައި އާރްއެސްޑަބްލިއުގެ މުހިންމުކަމާމެދު މަޝްވަރާކުރައްވާފައިވާކަމަށް މިނިސްޓްރީން ބުނެފައި ވެއެވެ.
ހަތަރު އަތޮޅެއްގައި މިނިސްޓްރީގެ ޓީމްތަކުން ކުރަމުންދާ ދަތުރތަކުގެ މައިގަނޑު އަމާޒަކީ ސެއާރްއެސްޑަބްލިއު އެޅުމަށް ދޫކުރާ ލުއި ލޯނަށް އެދި ހުށަހެޅުމަށް ބޭނުންވާ އޮޑިވެރިންނަށް އެހީތެރިކަން ފޯރުކޮށްދިނުމާއި، އެކަމާއި ގުޅޭ މުހިންމު މައުލޫމާތުތައް ގާތުން މަސްވެރިންނަށް ފޯރުކޮށްދިނުމެވެ. މިނިސްޓްރީގެ އާރްއެސްޑަބްލިއު ޕްރޮޖެކްޓް މެނޭޖްމެންޓް ޔުނިޓްގެ ފަރާތުންވަނީ، ތ. ހިރިލަންދޫ އަދި ވޭމަންޑޫގައިވެސް މިފަދަ ސެޝަންތައް ކުރިޔަށް ގެންގޮސްފަ އެވެ. އަދި މިކަމާއި ގުޅޭ ހަރަކާތްތައް ހއ އިހަވަންދޫއާއި ނައިފަރުގައިވެސް ކުރިޔަށްދާކަމަށް މިނިސްޓްރީން ބުނެފައި ވެއެވެ.
މަސް ދޯނިފަހަރުގައި އާރްއެސްޑަބްލިޔު އަޅަން، މަސްވެރި ވުޒާރާއާއި އެސްޑީއެފްސީ ގުޅިގެން ދޫކުރާ މި ލޯނަކީ އިސްލާމީ ޝަރީޢާގެ ހަމަތަކާ އެއްގޮތަށް ދޫކުރެވޭ ލޯނެކެވެ. މިއީ ރަހުނަކާ ނުލައި ހަ މަސް ދުވަހުގެ ގްރޭސްޕީރިއަޑާއެކު، ދެ މިލިއަން ރުފިޔާއާ ހަމައަށް ދޫކުރާ ލޯނެކެވެ. މިކަމަށް ފައިނޭންސިންގ ހަމަޖެހިފައިވަނީ އެސްޑީއެފްސީ އިން ”އާރްއެސްޑަބްލިޔު ފައިނޭންސިންގ“ ނަމުގައި ހުޅުވާފައިވާ އިސްލާމިކް ފައިނޭންސިންގ ސްކީމް މެދުވެރިކޮށް ކަމަށް މިނިސްޓްރީން ބުނެފައި ވެއެވެ. މި ލޯނަށް އެދި ހުށަހަޅާނީ، އެސްޑީއެފްސީގެ ޕޯޓަލް (https://portal.sdfc.mv) މެދުވެރިކޮށްނެވެ،
އަންނަމަހުގެ 30 ވަނަ ދުވަހުގެ ނިޔަލަށް މި ލޯނަށް އެޕްލިކޭޝަން ހުށަހެޅުމުގެ ފުރުސަތު އެބައޮތެވެ. އެޕްލިކޭޝަންތައް ލިބޭ މިންވަރަކުން ޝަރުތުހަމަވާ ފަރާތްތަކުގެ އެޕްލިކޭޝަންތައް ޕްރޮސެސްކުރުމުގެ މަސައްކަތް ކުރިއަށް ގެންދާނެކަމަށް އެސްޑީއެފްސީން މީގެކުރިން ބުނެފައި ވެއެވެ.