މަސްދޯނިފަހަރުގައި ލޮނުފެނުން މަސް ފިނިކުރާ ނިޒާމު (އާރްއެސްޑަބްލިޔު) ގާއިމުކުރުމުގެ މަޝްރޫއާ ގުޅޭ މައުލޫމާތު ސެޝަންތަކެއް ތ އަތޮޅު ދެރަށެއްގައި ކުރިޔަށް ގެންގޮސްފި އެވެ.
ތ. ހިރިލަންދޫ އަދި ވޭމަންޑޫގައި ކުރިޔަށް ގެންދިޔަ މި ސެޝަންތަކަކީ، މަސްވެރިންނާއި ކައުންސިލްތަކަށް އާރްއެސްޑަބްލިއުއާގުޅޭ މައުލޫމާތު ދިނުމަށާއި، އާރްއެސްޑަބްލިއު އެޅުމަށް ދޫކުރާ ލުއި ލޯނަށް އެދި ހުށަހެޅުމަށް ބޭނުންވާ އޮޑިވެރިންނަށް އެހީތެރިކަން ފޯރުކޮށްދިނުމުގެގޮތުން ކުރިޔަށް ގެންދިޔަ ސެޝަންތަކެކެވެ. މިސެޝަންތަކުގައި މައުލޫމާތު ދެއްވާފައިވަނީ، އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އާއި މަސްވެރިކަމާއި ކަނޑުގެ ވަސީލަތްތަކާ ބެހޭ މިނިސްޓްރީގެ ޓީމްތަކުންނެވެ.
މިނިސްޓްރީން ބުނީ، ތ އަތޮޅަށް ދިޔަ ޓީމްތައް ސެޝަންތައް ނިންމާލުމަށްފަހު މިއަދު އެނބުރި މާލެ އަންނާނެކަމަށެވެ. އަދި މިވަގުތު ޅ. ނައިފަރާއި ، ށ. ކޮމަންޑޫގައިވެސް އާރްއެސްޑަބްލިއު ސެޝަންތައް ކުރިޔަށްގެންދިއުމަށް ޓީމްތައް ހަރަކާތްތެރިވަމުން އަންނަކަމަށާއި، އެޓީމުތައް އެނބުރި މާލެ އަންނާނީ އަންނަ ހޯމަ ދުވަހު ކަމަށް މިނިސްޓްރީން ބުންޏެވެ.
މަސް ދޯނިފަހަރުގައި އާރްއެސްޑަބްލިޔު އަޅަން، މަސްވެރި ވުޒާރާއާއި އެސްޑީއެފްސީ ގުޅިގެން ދޫކުރާ މި ލޯނަކީ އިސްލާމީ ޝަރީޢާގެ ހަމަތަކާ އެއްގޮތަށް ދޫކުރެވޭ ލޯނެކެވެ. މިއީ ރަހުނަކާ ނުލައި ހަ މަސް ދުވަހުގެ ގްރޭސްޕީރިއަޑާއެކު، ދެ މިލިއަން ރުފިޔާއާ ހަމައަށް ދޫކުރާ ލޯނެކެވެ. މިކަމަށް ފައިނޭންސިންގ ހަމަޖެހިފައިވަނީ އެސްޑީއެފްސީ އިން ”އާރްއެސްޑަބްލިޔު ފައިނޭންސިންގ“ ނަމުގައި ހުޅުވާފައިވާ އިސްލާމިކް ފައިނޭންސިންގ ސްކީމް މެދުވެރިކޮށް ކަމަށް މިނިސްޓްރީން ބުނެފައި ވެއެވެ. މި ލޯނަށް އެދި ހުށަހަޅާނީ، އެސްޑީއެފްސީގެ ޕޯޓަލް (https://portal.sdfc.mv) މެދުވެރިކޮށްނެވެ،
އަންނަމަހުގެ 30 ވަނަ ދުވަހުގެ ނިޔަލަށް މި ލޯނަށް އެޕްލިކޭޝަން ހުށަހެޅުމުގެ ފުރުސަތު އެބައޮތެވެ. އެޕްލިކޭޝަންތައް ލިބޭ މިންވަރަކުން ޝަރުތުހަމަވާ ފަރާތްތަކުގެ އެޕްލިކޭޝަންތައް ޕްރޮސެސްކުރުމުގެ މަސައްކަތް ކުރިއަށް ގެންދާނެކަމަށް އެސްޑީއެފްސީން މީގެކުރިން ބުނެފައި ވެއެވެ.