ރާއްޖޭގެ ކަނޑުގެ ސަރަހައްދުގައި ގަވާއިދާ ޚިލާފަށް މަސްވެރިކަން ކުރަން އުޅެނިކޮށް އަތުލައިގަނެފައިވާ ސްރީލަންކާގެ މަސް ބޯޓެއް ދިވެހި ދައުލަތައް ނެގުމަށް ހުކުމްކޮށްފި އެވެ.
ރާއްޖޭގެ ކަނޑުގެ ސަރަހައްދުގައި، ގަވާއިދާ ހިލާފަށް މަސްވެރިކަމުގެ ހަރަކާތްތަކުގައި ބޭނުންކުރި ސްރީލަންކާގެ އުޅަނދު ”ޕުޝްޕާ ކުމާރާ“ ދައުލަތަށް ނެގުމަށް އަމުރުކޮށް، އެ ބޯޓުގެ ވެރިފަރާތް ތަމަންތާ ރުކުމަލް ޕެރޭރާގެ މައްޗަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްއިން ޖޫރިމަނާގެ ގޮތުގައިި ކަނޑައަޅާފައިވާ 400،000 ރުފިޔާ ދެއްކުމަށް ސިވިލް ކޯޓުން ހުކުމްކޮށްފައިވަނީ، މިދިޔަ ބުދަ ދުވަހު އެވެ.
ތަމަންތާގެ ޣައިރު ހާޒިރުގައި ކޯޓުން ހުކުމް އިއްވީ ޖޫރިމަނާއަކީ ސާބިތު ދަރަންޏެއްގެ ގޮތުގައި ކަނޑައަޅައިގެންނެވެ. އަދި، މިފައިސާ އޮކްޓޯބަރު 15 އިން ފެށިގެން 30 ދުވަހުގެ ތެރޭގައި ދެއްކުމަށް އޭނާގެ މައްޗަށް އަމުރުކޮށްފައި ވެއެވެ.
ރާއްޖޭގެ ކަނޑުގެ ސަރަހައްދަށް ވަދެ ގަވާއިދާ ހިލާފަށް މަސްވެރިކަން ކުރަން އުޅުނު ސްރީލަންކާގެ ފަސް ބޯޓެއް މިދިޔަ އަަހަރުގެ ސެޕްޓެމްބަރުމަހު އަތުލައިގަނެފައިވާއިރު، މިއަހަރުގެ ޖެނުއަރީމަހުވެސް ސްރީލަންކާގެ ދެ މަސް ބޯޓެއް އަތުލައިގަނެފައި ވެއެވެ. މިގޮތަށް އަތުލައިގަންނަ ބޭރުގެ އުޅަނދުތައް ހިފަހައްޓައި ކުށްވެރިންނަށް ހަރުކަށި އަދަބު ދިނުމަކީ، ރާއްޖޭގެ ކަނޑުގެ ވަސީލަތްތައް ރައްކާތެރިކުރުމަށް އެޅޭ މުހިންމު ފިޔަވަޅެކެވެ.