މަސްވެރިން އަތުން މިފްކޯއަށް ގަތް މަހަށް ނުދެވި ހުރި ފައިސާގެ ތެރެއިން މިހާތަނަށް މި ސަރުކާރުން 522 މިލިއަން ރުފިޔާ މަސްވެރިންނަށް ދޫކޮށްފައިވާ ކަމަށް ފިޝަރީޒް މިނިސްޓަރ އަހްމަދު ޝިޔާމް ވިދާޅުވެއްޖެ އެވެ.
އިހަވަންދޫގެ ރައްޔިތުންނާއި ބައްދަލުކުރުމަށް ބޭއްވި ރަސްމިއްޔާތުގައި މަސްވެރިންނަށް ސަރުކާރުން ދޭން ހުރި ފައިސާގެ ތަފުސީލު ހާމަކުރައްވަމުން މިނިސްޓަރ ވިދާޅުވީ މިދިޔަ އަހަރުގެ ނޮވެންބަރު މަހުގެ ސަތާރަވަނަ ދުވަހުން ފެށިގެން މިހާތަނަށް ސަރުކާރުން 522 މިލިއަން ރުފިޔާ މަސްވެރިންނަށް ދޫކޮށްފައިވާ ކަމަށެވެ. އަދި، މިއަދަދު ގުނާފައި މިވަނީ މަސްވެރިން ސަރުކާރުގެ ފެސިލިޓީސް ތަކުން ދޫކޮށްފައި ހުރި ތެލާއި، ކްރެޑިޓަށް ދޫކުރި އައިސްއަށް ވާ ފައިސާ ހިމަނައިގެން ކަމަށް މިނިސްޓަރު ވިދާޅުވި އެވެ.
ސަރުކާރުން ވަނީ މިދިޔަ ބުދަ ދުވަހު މަސްވެރިންނަށް ދޭން ހުރި ފައިސާގެ ތެރެއިން ހަތްދިހަ މިލިއަން ރުފިޔާ ދޫކޮށްފަ އެވެ. އަދި އަންނަ ހޯމަ ދުވަހު ތިރީސް މިލިއަން ރުފިޔާ ދޫކުރަން ސަރުކާރުން ވަނީ ނިންމާފަ އެވެ. އަދި ބާކީ ހުރި ފައިސާ އަންނަ މަހުގެ ފަސްވަނަ ދުވަހުގެ ކުރިން ދައްކާ ޚަލާސް ކުރައްވާނެކަމުގެ ޔަގީންކަން މިނިސްޓަރު ވަނީ ދެއްވާފަ އެވެ.