މަސްއޮޑީގެ ވަތުގައި ގިނަ ދުވަހު އެން ގެންގުޅޭނެ ގޮތުގެ މައުލޫމާތު މަސްވެރިންނަށް ފޯރުކޮށްދީފި އެވެ.
މިމަހުގެ 14 އިން 16 އަށް ކ. ހިންމަފުށިގައި ހުންނަ ބިގްފިޝް މޯލްޑިވްސްގައި ކުރިޔަށް ގެންދިޔަ މި ސެޝަން ތަކަކީ، ދިވެހި ސަރުކާރާއި ޖަޕާން އިންޓަރނޭޝަނަލް ކޯޕަރޭޝަން އޭޖެންސީ (ޖައިކާ)އާ ގުޅިގެން ހިންގާ ”ޕްރޮމޯޝަން އޮފް ބްލޫ އިކޮނަމީ އިން ފިޝަރީޒް ސެކްޓަރ އޮފް ދަ މޯލްޑިވްސް“ ޕްރޮޖެކްޓުގެ ދަށުން މަސްވެރިކަމުގައި ބޭނުންކުރާ އެން ގިނަ ދުވަހު ގެންގުޅެވޭގޮތަށް އޮޑީގެ އެންވަތަށް ބަދަލު ގެނެސް، އެބަދަލާއެކު ދޯނީގައި އެން ރަނގަޅު ގޮތުގައި ގެންގުޅޭނެގޮތުގެ މަޢުލޫމާތު މަސްވެރިންނަށް ފޯރުކޮށްދިނުމުގެ ގޮތުން ކުރިޔަށްގެންދިޔަ ސެޝަންތަކެއްކަމަށް ފިޝަރީޒް މިނިސްޓްރީން ބުނެފައި ވެއެވެ.
ފިޝަރީޒް މިނިސްޓްރީން ބުނީ، މިސެޝަން ތަކުގައި، މަސްއޮޑި ފަހަރުގެ އެންވަތް ފަރުމާކޮށްފައި ހުންނަ ގޮތުންނާއި، މިހާރު ބޭނުންކުރާ އެންވަށިން އެން ނެގުމުން، އެން މަރުވުމަށް މެދުވެރިވާ ސަބަބުތަކާއި، އެކަން ހައްލުކުރަން ކުރެވިދާނެ ކަންތައްތައް މަސްވެރިނަށް އަމަލީގޮތުން ދަސްކޮށްދީފައިވާކަމަށެވެ. އަދި، މި ޕްރޮޖެކްޓްގެ ދަށުން ފަރުމާކޮށްފައިވާ އެންވަތުގެ މޮޑެލް އާއި ޖަޕާނުގައި، އެންނެގުމަށް ބޭނުންކުރާ އެންވަށީގެ ފަރުމާއަށް ތައްޔާރުކޮށްފައިވާ އެންވަށި ބޭނުންކުރާގޮތާއި އަދި އެންވަތުގެ ޙަރަކާތްތައް ހުންނަގޮތުގެ މައުލޫމާތުވެސް މަސްވެރިންނަށް ފޯރުކޮށްދީފައިވާކަަމަށް މިނިސްޓްރީން ބުނެފައި ވެއެވެ. މި ސެޝަންތަކުގައި 7 ދޯންޏެއްގެ މަސްވެރިން ބައިވެރިވެފައިވާއިރު، އަމަލީ ތަމްރީނާއި، މަޢުލޫމާތު ދެއްވީ ޖައިކާއާއި ފިޝަރީޒް މިނިސްޓްރީގެ ބޭފުޅުންނެވެ.
މަސްވެރިކަމުގައި ބޭނުންކުރާ އެން ގިނަ ދުވަހު ގެންގުޅުމަށް މަސްއޮޑިފަަހަރުގެ އެންވަތަށް ގެންނަން ޖެހޭ ބަދަލުތައް ދެނެގަތުމުގެ މަޝްރޫޢުގެ ދަށުން، ގދ. ފަރެސް މާތޮޑާގައި ދުއްވަމުން އަންނަ ”ސަފީނާ“ ދޯންޏާއި، ގދ. މަޑަވެލި ’ކަމަނަ‘ ދޯންޏާއި، ޅ. ނައިފަރު ހުދުހުދު ދޯނީގެ އެންވަތަށްވަނީ ބަދަލުގެނެސްފައެވެ. މި މަޝްރޫއުގެ ދަށުން، މި 3 އޮޑީގެ އެންވަތަށް ގެނައި ބަދަލުތަކުގެ ތެރޭގައި، އެންވަތުގެ ލޮނުގަނޑު ދައުރުވާ ގޮތް ހެދުމާއި، މަރުވެފައި ހުންނަ އެން، ވަތަށް ނުފައިބާ ވަތުން ނެގޭ ގޮތް ހެދުން ހިމެނެއެވެ.
ޖަޕާންގެ ހިލޭ އެހީގެ ދަށުން ކުރިއަށް ގެންދާ މިޕްރޮޖެކްޓްގެ ނަތީޖާއަށް ބަލައި ރާއްޖޭގެ އޮޑިފަހަރުގެ އެންވަތް ބަދަލުކުރުމަށް ބޭނުންވާ އެހީ ތެރިކަން ފޯރުކޮށްދިނުމުގެ މަޝްރޫޢެއްވެސް އެކުލަވާލުމުގެ މަސައްކަތްކުރަމުންދާކަމަށް ފިޝަރީޒް މިނިސްޓްރީން މީގެކުރިން ބުނެފައި ވެއެވެ.