އިހަވަންދޫގައި ސަރުކާރުން ތަރައްޤީކުރުމަށް ނިންމާފައިވާ މަސްކިރާ ފެކްޓްރީ ގާއިމުކުރާނީ މުޅި އުތުރަަށް ކުރިއެރުން ލިބޭ ފެންވަރަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
ރައީސް މިހެން ވިދާޅުވީ އިހަވަންދޫއަށް ވަޑައިގެން އެެރަށުގެ ރައްޔިތުންނާއި ބައްދަލުކުރެއްވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ރައީސްގެ ވާޙަކަފުޅުގައި ވިދާޅުވީ އެރަށު އައިސް ޕްލާންޓުގެ މަސައްކަތް ކުރިއަށްދާނެކަމަށާއި، އުތުރުގެ ސަރަހައްދުގެ މަސްވެރިކަމުގެ ސިނާއަތަށް ކުރިއެރުން ލިބޭގޮތަށް، ސަރަހައްދުގެ ރައްޔިތުން ބޭނުންވާ ފުޅާ މިނުގައި ޤާއިމުކުރައްވާނެ ކަމަށެވެ.
”މި ސަރަޙައްދުގެ މަސްވެރިކަމުގެ ޞިނާޢަތަށް ކުރިއެރުން، ދާއިމީ ފެންވަރެއްގައި ގެންނަ ކަމަށްވަންޏާ، އަޅުގަނޑުމެން ޤާއިމުކުރާ އެސްޓެބްލިޝްމަންޓަށް ދިހަވަރަކަށް މިލިއަން ޑޮލަރު، 150 މިލިއަނެއްހާ ރުފިޔާ، މަދުވެގެން ޚަރަދުކުރަންޖެހޭނެ. އެހެންވީމާ، ދެ މިލިއަން ރުފިޔާ ބަޖެޓުގައި އޮތީ.“ ރައީސް ވިދާޅުވި އެވެ.
އަދި މިހާރު ބަލަމުންދަނީ ކޮންޓްރެކްޓަރ ފައިނޭންސް މޮޑެލްއަކުން ދިގު މުއްދަތަށް ބަހާލައިގެންވިޔަސް އެމަސައްކަތް ކުރެވޭނެ ގޮތެއް ހޯދުމަށްކަމުގައި ރައީސުލްޖުމްހޫރިއްޔާ ވިދާޅުވި އެވެ.
”އަޅުގަނޑުމެން މިހާރު ބަލަން މިއުޅެނީ، އިންވެސްޓަރެއް ގެނެސްގެން، އިންވެސްޓަރ ފައިނޭންސް، ނޫނީވިއްޔާ ކޮންޓްރެކްޓަރެއްގެ ގޮތުގައި، ކޮންޓްރެކްޓަރަކު ފައިސާދީގެން، ކޮންޓްރެކްޓަރ ފައިނޭންސް މޮޑެލްއަކުން، ދިގު މުއްދަތަށް ބަހާލައިގެން އެ މަސައްކަތް ކުރެވޭނެ ގޮތެއްވިޔަސް ހޯދޭތޯ. އެހެންވީމާ، މިހާ ތަފްޞީލުކޮށްވެސް މި ދަންނަވާލީ، ތިޔަބޭފުޅުންނަށް ޔަޤީންކަން އެރުވުމުގެ ގޮތުން. އިރާދަކުރެއްވިއްޔާ އެ މައްސަލައަށް ދާއިމީ ޙައްލެއް، އެ ޕްރޮޖެކްޓުން އިރާދަކުރެއްވިއްޔާ މި އަހަރު ހަމަ ފުލް ސްކޭލްގައި ފަށާނެ ވާހަކަ ހަމަ ދަންނަވަން.“ ރައީސް ވިދާޅުވި އެވެ.
ރައީސް ވިދާޅުވީ، އިހަވަންދޫގައި މަސްކިރާ ފެކްޓްރީއެއް ގާއިމުކުރުމުގެ ހުވަފެން ހަގީގަތަކަށް ހައްދަވައިދެއްވާނެކަމަށް ވިދާޅުވިއެވެ.