ރާއްޖޭގެ އެކި އެކިހިސާބަށް މިއަދުވެސް ވިއްސާރަކޮށް، ބައެއް ރަށްތަކަށް ގުގުރާނެކަމަށް މޫސުމާ ބެހޭ އިދާރާއިން ބުނެފި އެވެ.
މޫސުމާބެހޭ އިދާރާއިން ވަނީ، ވައިގަދަވެ ކަނޑުތައް ގަދަވާނެކަމަށް ލަފާކޮށް، މުޅި ރާއްޖެއަށް ނެރުނު މޫސުމީ ސަމާލުތައްވެސް މިހާރު ދަންމާލާފަ އެވެ.
މޫސުމާއި ބެހޭ ގައުމީ އިދާރާއިން މި ވަގުތު، ރީނދޫ ސަމާލު ނެެރެފައި އޮތީ، ހއ އަތޮޅުން ފެށިގެން ވ އަތޮޅާ ހަމަޔަށެވެ. ހެނދުނު 11:00 ޖެހުމާހަމަޔަށް ސަމާލު ދަންމާލާފައިވަނީ، ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 50 މޭލަށް ވައިގަދަވެ، ކަނޑުތައް ވަރަށް ގަދަވާނެކަމަށް ލަފާކޮށްނެވެ.
ރާއްޖޭގެ އެހެން އަތޮޅުތަކަށް މިވަގުތު އޮތީ ހުދު ސަމާލު ނެރެފައެވެ. ވ އަތޮޅުން ފެށިގެން އައްޑޫ ސިޓީއާ ހަމަޔަށް ހުދު ސަމާލު ދަންމާލާފައިވަނީ މެންދުރުފަު 01:30 އާ ހަމަޔަށެވެ. އެއަތޮޅުތަކަށް ހުދު ސަމާލު ދަންމާލާފައިވަނީ ބޯކޮށް ވާރޭވެހުމާއެކު ގުގުރާނެކަމަށް ލަފާކޮށްނެވެ. އަދި، ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 40 މޭލަށް ވައިގަދަވެ، ކަނޑުތައް ގަދަވާނެކަމަށް ލަފާކޮށްނެވެ..
މެޓް އޮފީހުން މިއަދު ހުރިހައި ސަރަހައްދަކަށްވެސް ކަނޑު ގަދަވާނެކަމަށް ލަފާކޮށްފައިވާއިރު، ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދައިގެ އަސަރު ކުރުން އެކަށީގެންވާކަމަށް މެޓް އޮފީހުން ބުންޏެވެ. ރާޅު ނަގާނެކަމަށް ލަފާކޮށްފައިވަނީ، 5-8 ފޫޓު އުސްމިނުގަ އެވެ.
ރާއްޖޭގެ ހުރިހައި ސަރަހައްދަކަށް މޫސުމީ ސަމާލު ނެރެފައިވާއިރު، މެޓް އޮފީހުންވަނީ ހުރިހާ ފަރާތްތަކުން މޫސުމަށް ސަމާލުވުމަށް އެދިފަ އެވެ.