މަސްވެރިންނަށް ދޭން ހުރި ފައިސާ ނުދީގެން މަސްވެރިން އެކަމާއި އިހުތިޖާޖު ކުރަމުން ދިޔައިރު މަސްވެރިންނާއި ބައްދަލު ކުރައްވައި މަސްވެރިންގެ އަޑު އައްސަވައި ކަންކަން ހަމަޖައްސަވައިދެއްވާނެ ކަމަށް ފިޝަރީޒް މިނިސްޓަރ އަހްމަދު ޝިޔާމް ވިދާޅުވި ނަމަވެސް އެކަން އެގޮތަށް ނުދާކަމަށް މަސްވެރި އާއިލާތަކުން ބުނެފި އެވެ.
ވަޒީރު މަސްވެރިންނާއި ބައްދަލު ކުރެއްވި އިރު މަސްވެރިންގެ އެންމެ ބޮޑު ޝަކުވާ އަކީ ކަންމަތީ ފިހާރައަށް ދަރާފައި އޮތުމާއި، ބޭންކު ލޯނަށް ފައިސާ ނުދެއްކޭ ވާހަކަޔާއި، ކަރަންޓް ބިލާއި ފެންބިލު ކަނޑާލާ ވާހަކައެވެ. އޭރު ވަޒީރު ވިދާޅުވީ މަސްވެރި އެއްވެސް އާއިލާއެއްގެ ގެޔަކުން ފެން އަދި ކަރަންޓު ކަނޑާލާކަށް އެތަންތަނުން ނާންނާނެކަމަށެވެ. އެހެންނަމަވެސް މިއަދު މި ފެންނަނީ ފެން ބިލު ކަނޑާ ތަނެވެ.
”މިނިސްޓަރު އެހެދީ ދޮގެއްނު؟ މިގެން ފެންކަނޑަން އައި. ގައިމު ވޯޓަރ ސަޕްލައި އަށް އެކަން އަންގާފަ އޮތް ނަމަ އެކަން އެގޮތަކަށް ނުވީސް.ދެން ފެން ކަނޑާލާއިރަކަށް މިނިސްޓަރަށް ގުޅަންވީ؟ އެބޭފުޅާ ފޯނެއް ނުވެސް ނަގާނެ.“ މަސްވެރިއަކު ބުންޏެވެ.
ރާއްޖޭގެ އާބާދީގެ ސަތާރަހާހެއްހާ މަސްވެރިން އުޅޭ އިރު އެމީހުންގެ އާއިލާތަކުން މާލޭގައި ވެސް ދިރިއުޅެއެވެ. ތަންތަން ބޮޑު އަގުގައި ކުއްޔަށް ހިފައިގެން ދިރިއުޅޭ އިރު ގޭގެ ކުލި މިސަރުކާރު އައިފަހުން މަހުން މަހަށް ނުދެއްކެ އެވެ. ގޭ ވެރިމީއާހަށް ދަރާ ބައެއް ހާލަތްތަކުގައި ނޯޓިސް ދީ ގެއިން ނެރެފައިވެސް އެބަހުއްޓެވެ. މަސްވެރި އާއިލާތަށް މަގުމަތިވެފައިވާއިރު ސަރުކާރުން މިކަމަށް ސަމާލުކަމެއް ނުދެއެވެ. ކުލި އެކަންޏެއް ނޫނެވެ. ކަރަންޓު ބިލާ ފެން ބިލު ނުދެއްކިގެން މަސްވެރި އާއިލާތައް ވަނީ ހައްގުތަކުން މަހުރޫމުވެފަ އެވެ. އެކަމު މިސަރުކާރުން ބުނަނީ އެއްވެސް ރައްޔިތެއްގެ ހައްގު ގެއްލޭ ފަދަ އަމަލެއް ސަރުކާރުން ނުކުރާނެކަމަށެވެ.
މާލޭގައި ދިރިއުޅޭ މަސްވެރި އާއިލާއެއްގެ އަންހެނަކު މިއަދު ބުނީ އެމްޑަބްލިއު އެސްސީން މިއަދު ފެން ކަނޑާލަން އައިމާ ސީދާ އެމްޑަބްލިއުއެސްސީއަށް ގުޅާ މިއީ މަސްވެރިއެއްގެ ދަރިއެކޭ ބުނިކަމަށެވެ. އަދި ސަރުކާރުން ހޯމަ ދުވަހު ފައިސާދޭން ވައުދުވެފައި އޮތީމައި ހޯމަށް ފެން ނުކަނޑާ މަޑުކޮށްލަދޭން ބުނިކަމަށެވެ. އެކަމަކު އެކުންފުނިން އެއީ އޮންނަ އުޞޫލެއް ނޫންކަމަށް ޖަވާބު ދިން ކަމަށެވެ.
”މިގެއިން ފެން ކަނޑަން އައިމަ އަހަރެން ބައްޕައާއި އަހަރެންގެ ނަން ބުނެފަ ވަރަށް އާދޭސް ކުރިން. ބުނީ ހެދޭނެ ގޮތެއް ނެތްކަމަށް. ކޯލް ރިކޯޑުވެސް ކުރިން. އެއީ އެމީހުން ފަހުން ދޮގު ހާދާނެތީ. އަސްލު އަހަރުމެންނެއް ނޫން ދޯ އާދޭސް ކުރަން ޖެހޭނީ. ސަރުކާރުން އަންގަންވާނެއްނުން ތިމަންނަ މެންނަށް ލާރި ނުދެވިގެންނޭ މިއުޅޭނީ މަސްވެރިންގެ ގޭ ބިލުތައް ހިފަހައްޓާލާށޭ. ދެން ރަށްޓެހިން އަތުން ފަހު ދަރަންޏަށް ނަގައިގެން ބިލުތައް މިދައްކަން ޖެހެނީ. ލާރި ލިބޭއިރު މިއޮންނަނީ ދަރަންޏާއިގެން ޢަޅުބޯކައިފަ. މަސްވެރި އާއިލާގެ މެންބަރަކު ބުންޏެވެ.
މަސްނިމޭ އަތަށް އަޅާފައިވާއިރު، ބިލުގެ މައްސަލަތަކާއި އެހެނިހެން ދިރިއުޅުމުގެ ޒަރޫރީ ކަންތައް ފުއްދުމުގައި މަސްވެރިން ވަނީ ނުކުޅެދިފައެވެ. ކާންށާއި، ކުއްޔަށާއި، ކުދިން ކޮލެޖު ފީއާއި، ސްކޫލް ފީ ދައްކާނެ ގޮތެއްވެސް ނެތެވެ. ބިލުތައް މައްސަލައިގައި މަސްވެރިން މިހާރު ދަނީ އަޑު އުފުލަމުންނެވެ.
މިއަދު މަސްވެރި އާއިލާތަކުގެ ގޭގެއިން ފެންކަނޑާލަން ވަނީ @MWSC_Official މުވައްޒަފުން އައިސްފަ!
އަޅުގަނޑުމެންގެ ވަޒީރު @Shiyamaldives ބައްދަލު ކުރި ދުވަހުގެ ވަޒީރު ވަނީ ބުނެފަ މަސްވެރި އެއްވެސް އާއިލާއެއްގެ ގެޔަކުން ފެން އަދި ކަރަންޓު ކަނޑާލާކަށް ނާންނާނެ އަދި ބޭންކުގެ ލޯނު… https://t.co/BLtAQtfezD— 𝑨𝒍𝒊 𝑺𝒂𝒋𝒊𝒅 (@AliSajidMV) February 24, 2024
މަސްވެރިން މިހާރު ތިބީ ވަރަށް މާޔޫސްކަން މަތީގަ އެވެ. ސަރުކާރުން ބޮޑެތި ޕްރޮޖެކްޓްތައް ލޯންޗުކުރަމުން، ރައީސް އަތޮޅުތަކަށް ދަތުރުކުރައްވަމުން ދަނީ ދައުލަތުގެ ފައިސާއިންނެވެ. މަސްވެރިންނަށް ފައިސާ ނުދީ މިކަންކަން މިގޮތަށް ކުރަނީ މަސްވެރިންނަށް ޖެއްސުން ކުރަންކަމަށް މަސްވެރިން ބުނެއެވެ. މި ސަރުކާރު އައީ މަސްވެރިންގެ ވަރަށް ބޮޑު ސަޕޯޓަކާއެކު އެވެ. އެކަމަކު ރައީސް މުއިއްޒު މިހާރު މަސްވެރިން ދޫކޮށް މަސްވެރިންނާމެދު އަމަލު ކުރައްވާ ގޮތުން މަސްވެރިން ވަނީ ތާއީދު ދޫކޮށްލާ ފައެވެ.
މަސްވެރިންގެ އެދުމަކީ މަސްވެރިންނަށް ފައިސާ ދެވެންދެން މަސްވެރިންގެ ފެންބިލުތަކާއި ކަރަންޓް ބިލުތައް ހިފެހެއްޓުމެވެ. އަދި ސަރުކާރުން މިކަންކަން ޔުޓިލިޓީސް ކުންފުނިތަކަށް އެންގުމެވެ. މާޗު ފަހެއްގެ ނިޔަލަށް މިގޮތަށް ކަންކަން ކޮށްދެއްވުމަކީ މަސްވެރިން ވަރަށް އާދޭހާއެކު އެދޭކަމެކެވެ.