އޮޑިފަހަރުގައި ހަރުކޮށްފައި ހުންނަ އާލާތްތައް ނިވިފައި ހުންނަ ވަގުތު، ފިޝަރީޒް މިނިސްޓްރީން އަންގައިފި ހިނދެއްގައި، އޮޑިފަހަރުގެ ހަރަކާތްތައް ކޮންމެ 4 ގަޑީއިރަކުން ރިޕޯޓްކުރަން ޖެހޭގޮތަށް، ކަނޑުމަހުގެ މަސްވެރިކަން ރާވައި، ހިންގައި، ބެލެހެއްޓުމާ ގުޅޭ ގަވައިދަށް އިސްލާހު ގެނެސްފި އެވެ.
މިއަދު ސަރުކާރުގެ ގެޒެޓްގައި ޝާއިއުކޮށް އަމަލުކުރަން ފަށާފައިވަނީ، ކަނޑުމަހުގެ މަސްވެރިކަން ރާވައި، ހިންގައި، ބެލެހެއްޓުމާ ގުޅޭ ގަވައިދުގެ 20 ވަނަ މާއްދާގެ (ބ) އަށް ގެނައި އިސްލާހަށެވެ.
އެ އިސްލާހުގައި ބުނެފައިވަނީ، މަސްވެރިކަންކުރަން ލައިސަންސް ދޫކޮށްފައިވާ އުޅަނދެއްގައި ހަރުކޮށްފައި ހުންނަ ވީއެލްޑީ އެއްވެސް ސަބަބަކާހުރެ ނިވިއްޖެނަމަ ނުވަތަ މިނިސްޓްރީއަށް އެ އުޅަނދުގެ ޖީޕީއެސް ޕޮޒިޝަން ނުފެންނަކަމަށް، އުޅަނދު އޮޕަރޭޓްކުރާ ފަރާތަށް ނުވަތަ ކެޔޮޅަށް މިނިސްޓްރީން އަންގައިފިނަމަ، އުޅަނދު އޮތް ސަރަހައްދު މިނިސްޓްރީއަށް ރިޕޯޓް ކުރަން ޖެހޭނެކަމަށެވެ.
އެގޮތުން، މިނިސްޓްރީން އަންގައިފި ހިނދެއްގައި، އުޅަނދު އޮތް ސަރަހަައްދު، ތޫލާއި އަރުޟު އިނގޭނެހެން، އުޅަނދުގެ ދުވެއްޔާއި އުޅަނދުގެ ހަރަކާތުގެ މައުލޫމާތު، ކޮންމެ 4 ގަޑީއިރަކުން، މިނިސްޓްރީން ކަނޑައަޅާ ގޮތެއްގެ މަތިން ފޮނުވަންވާނެކަމަށް އިސްލާހުގައި ބުނެފައި ވެއެވެ.