ރާއްޖެއިން ބޭރަށް ފަރުމަސް އެކްސްޕޯޓްކުރާ ފަރާތްތަކަށްް ކެޗް ސެޓިފިކެޓް ދޫކުރާގޮތަށް މިނިސްޓްރީ އޮފް ފިޝަރީޒް އިން ނިންމައިިފި އެވެ.
މިނިސްޓްރީން މިގޮތަށް ނިންމާފައިވަނީ، ޤާނޫނާ ޚިލާފަށް ރިޕޯޓުކޮށް، ބެލެހެއްޓުމެއް ނެތި ކުރާ މަސްވެރިކަން ހުއްޓުވުމަށް އަޅާ ފިޔަވަޅެއްގެގޮތުންނެވެ. މިނިސްޓްރީން ބުނީ، މި ނިންމުމާއެކު، ކެޗް ސެޓުފިކެޓު ދޫކުރުމުގެ ނިޒާމުގެ ތެރެއިން އެކްސްޕޯޓު ކުރާ ކޮންމެ ފަރުމަހުގެ ޝިޕްމަންޓަކާ އެކު މިނިސްޓްރީން ދޫކޮށްފައިވާ ކެޗް ސެޓުފިކެޓެއް އޮތުން ލާޒިމުކުރާނެކަމަށެވެ.
މިނިސްޓްރީން ބުނީ، ކެޗް ސެޓުފިކެޓު ދޫކުރުމުގެ ނިޒާމު މެދުވެރިކޮށް އެކްސްޕޯޓުކުރާ ފަރުމަހުގެ ބާވަތްތައް ބާނައިފައިވާ އުޅަނދުގެ މަޢުލޫމާތާއި، މަސް ބޭނި ތާރީޚު އަދި މަސް ޕްރޮސެސްކުރި ފަރާތުގެ މަޢުލޫމާތު އެއްކުރެވޭނެކަމަށެވެ. އަދި، އެ މަޢުލޫމާތުގެ އަލީގައި މަސް ބޭނީއްސުރެ މަހާއި މަހުގެ އުފެއްދުންތައް ގަންނަ ފަރާތްތަކަށް ފޯރުކޮށްދެވެންދެން އެއުފެއްދުންތައް ކަޑައްތުކޮށްފައިވާ އެންމެހައި މަރުޙަލާތައް، ދެނެގަތުމުގެ މަގުފަހިވެގެންދާނެ ކަމަށެވެ.
ދިވެހިރާއްޖޭގެ މަސްވެރިކަމުގެ ވިޔަފާރީގައި ބަދަލުކުރެވޭ މަހާއި މަހުގެ އެންމެހައި އުފެއްދުންތަކަކީ ހަރުދަނާ ނިޒާމެއްގެ ތެރެއިން ބެލެހެއްޓިފައިވާ މަސްވެރިކަމަކުން ބާނައި، ތައްޔާރުކޮށްފައިވާ އުފެއްދުންތަކެއްކަން ކަށަވަރުކުރުމަށްޓަކައި ކެޗް ސެޓުފިކެޓު ދޫކުރުމުގެ ނިޒާމެއް ޤާއިމުކުރުމަކީ މުހިންމު ފިޔަވަޅެއްކަމަށް މިނިސްޓްރީން ބުނެފައި ވެއެވެ.
ރާއްޖޭގައި ފަރުމަހުގެ މަސްވެރިކަމާއި، ފަރުމަހުގެ ވިޔަފާރީގެ ހަރަކާތްތައް ހަރުދަނާ ނިޒާމެއްގެ ތެރެއިން މޮނިޓަރކޮށް ބެލެހެއްޓުމަށްޓަކައި ލައިސަންސްކުރުމުގެ ނިޒާމުގެ ދަށުން، ފަރުމަހުގެ މަސްވެރިކަމުގައްޔާއި ފަރުމަހުގެ ވިޔަފާރީގައި ހަރަކާތްތެރިވަމުންދާ ފަރާތްތައް ލައިސަންސްކުރުމުގެ މަސައްކަތްވެސް މިނިސްޓްރީން ދަނީ ކުރަމުންނެވެ.
އެގޮތުން، ވިޔަފާރި ބޭނުމަށް ފަރުމަހުގެ މަސްވެރިކަންކުރާ އުޅަނދުފަހަރު؛ ފަރުމަސް ޕްރޮސެސްކުރާ ފެސިލިޓީތައް؛ އަދި އެކްސްޕޯޓު ކުރާ ފަރާތްތަކަށާއި ރިސޯޓުތަކަށް މެދުވެރިއެއްގެ ގޮތުން ފަރުމަހުގެ ބާވަތްތައް ވިއްކާ ފަރާތްތައް ލައިސަންސް ހޯދަން ޖެހެއެވެ. އެގޮތުން،، ލައިސަންސަށް އެދުމާއި، ދޫކުރުމާއި، އައުކުރުމާއި އަދި ބާޠިލުކުރުމުގައި ޢަމަލުކުރާނެ ގޮތާއި، ލައިސަންސްގެ މުއްދަތާއި ފީ އަދި ލައިސަންސް ލިބިފައިވާ ފަރާތްތަކުން ޢަމަލުކުރަންޖެހޭނެ ގޮތް، ފަރުމަހުގެ މަސްވެރިކަން ރާވައި، ހިންގައި، ބެލެހެއްޓުމާބެހޭ ގަވާއިދުގައި ބަޔާންކުރާނެކަމަށް މިނިސްޓްރީން ބުނެފައި ވެއެވެ. އަދި ފަރުމަހުގެ މަސްވެރިކަންކުރުމަށް ލައިސަންސް ދޫކުރެވޭ އެންމެހައި އުޅަނދުފަހަރާއި އުޅަނދުފަހަރުގެ ކެޔޮޅުންނާއި ފަޅުވެރީންގެ މަޢުލޫމާތު ހިމެނޭ ދަފުތަރެއް މިނިސްޓްރީން އެކުލަވައިލައި ބެލެހެއްޓޭނެކަމަށްވެސް މިނިސްޓްރީން ބުނެފައި ވެއެވެ.
މީގެ އިތުރުން، ފަރުމަހުގެ މަސްވެރިކަން ބެލެހެއްޓުމާއި، ދެމެހެއްޓެނިވި ގޮތެއްގައި ތަރައްޤީ ކުރުމާ ގުޅޭ ސިޔާސަތުތަކާއި، ފަރުމަހުގެ ބާވަތްތަކުގެ އާބާދީ ޙިމާޔަތްކުރުމާއި، މެނޭޖްކުރުމާއި، ފަރުމަހުގެ ދިރާސާތައް ކުރުމާއި، އޭގެ ވިޔަފާރި ކުރުމާގުޅޭ ސިޔާސަތުތަކާ ގުޅޭގޮތުން، މިނިސްޓްރީއަށް ލަފާ ދިނުމަށްޓަކައި ލަފާދޭ ކޮމިޓީއެއް އުފައްދައި، އެ ކޮމިޓީގެ ޖަލްސާތައް މަދުވެގެން އަހަރަކު ދެފަހަރު ބޭއްވުމަށްވެސް މިނިސްޓްރީން ނިންމާފައި ވެއެވެ.