ވިއެޓްނާމްގެ މަސްވެރިކަމުގެ އެކްސްޕޯޓްއިން މިއަހަރުގެ ފުރަތަމަ ނުވަ މަސް ދުވަހު ހަތް ބިލިއަން ޑޮލަރަށްވުރެ މަތިން އާމްދަނީ ހޯދައިފި އެވެ.
ވިއެޓްނާމް އެސޯސިއޭޝަން އޮފް ސީފުޑް އެކްސްޕޯޓާސް އެންޑް ޕްރޮޑިއުސާސް(ވީއޭއެސްއީޕީ) އިން އާންމުކޮށްފައިވާ ޑޭޓާތަކަށް ބަލާއިރު، މިއަހަރުގެ ސެޕްޓެމްބަރު މަހު މަސްވެރިކަމުގެ އެކްސްޕޯޓުން ހޯދި 866 މިލިއަން ޑޮލަރުގެ އާމްދަނީއާއެކު، މިއަހަރުގެ ފުރަތަމަ ނުވަމަހުގެ މަސްވެރިކަމުގެ އެކްސްޕޯޓްއިން ލިބުނު އާމްދަނީގެ އަދަދު ވަނީ 7.16 ބިލިއަން އެމެރިކާ ޑޮލަރަށް އަރާފަ އެވެ. މިއީ، 2023 ވަނަ އަހަރާ އަޅާ ބަލާއިރު %8.5 ގެ ކުރިއެރުމެކެވެ.
ކޮވިޑް-19 އާލަމީ ވަބާއާއި، އިންފްލޭޝަންގެ ސަބަބުން އަހަރުތަކެއް ވަންދެން މަސްވެރިކަމުގެ އެކްސްޕޯޓަށް ބުރޫއެރުމަށްފަހު، ދުނިޔޭގެ ބާޒާރުތައް ހަމައަކަށް އެޅެމުންދާއިރު، ވިއެޓްނާމްގެ މަސްވެރިކަމުގެ އެކްސްޕޯޓް ރަނގަޅުވެ، ޚާއްޞަކޮށް އަހަރުގެ ދެވަނަ ކުއާޓަރުގައި ވިއެޓްނާމްގެ މަސްވެރިކަމުގެ އެކްސްޕޯޓްވަނީ ވަރުގަދަވެފަ އެވެ. ނިމިގެން ދިޔަ މާލީ ތިންވަނަ ކުއާޓަރުގައި އެކަނިވެސް ވިއެޓްނާމްގެ މަސްވެރިކަމުގެ އެކްސްޕޯޓް 2.76 ބިލިއަނަށް އެރިއެވެ. މިއީ، މިދިޔަ އަހަރުގެ ތިންވަނަ ކުއާޓަރާ އަޅާކިޔާއިރު،%13 ގެ ކުރި އެރުމެކެވެ.