ފިޝަރީޒް މިނިސްޓްރީން ކުރިޔަށްގެންދާ، މަސްވެރިކަމުގައި ބޭނުންކުރާ އެން ގިނަ ދުވަހު ގެންގުޅުމަށް އެންވަތަށް ގެންނަން ޖެހޭ ބަދަލުތައް ދެނެގަތުމުގެ މަޝްރޫޢުގެ ދަށުން، ގދ. ފަރެސް މާތޮޑާގައި ދުއްވަމުން އަންނަ ”ސަފީނާ“ ދޯނީގެ އެންވަތަށް ބަދަލު ގެނެސްފި އެވެ.
ފިޝަރީޒް މިނިސްޓްރީން ބުނީ، އެ ދޯނި އެހެލައި އެންވަތް ބަދަލުކުރުމުގެ މަސައްކަތް މިނިސްޓްރީއާއި ޖަޕާންގެ ޓީމުން ކުރިޔަށް ގެންދިޔައީ މިދިޔަ ހަފްތާގެ ތެރޭގައި ކަމަށެވެ.
”ސަފީނާ“ ދޯންޏަކީ، މި މަޝްރޫއުގެ ދަށުން އެންވަތަށް ބަދަލު ގެނެވުނު ދެވަނަ ދޯންޏެވެ. މި މަޝްރޫއު ނުވަތަ ދިރާސާ ފެށުމުގެ ގޮތުން ގދ. މަޑަވެލި ’ކަމަނަ‘ ދޯނީގެ އެންވަތް ޖެނުއަރީ މަހު ވަނީ ބަދަލުކޮށްފަ އެވެ.
މި މަޝްރޫއުގެ ދަށުން، މި 2 ދޯނީގެ އެންވަތަށް ގެނައި ބަދަލުތަކުގެ ތެރޭގައި، އެންވަތުގެ ލޮނުގަނޑު ދައުރުވާ ގޮތް ހެދުމާއި، މަރުވެފައި ހުންނަ އެން، ވަތަށް ނުފައިބާ ވަތުން ނެގޭ ގޮތް ހެދުން ހިމެނެއެވެ.
ޖަޕާންގެ ހިލޭ އެހީގެ ދަށުން ކުރިއަށް ގެންދާ މިޕްރޮޖެކްޓްގެ ނަތީޖާއަށް ބަލައި ރާއްޖޭގެ އުޅަނދުފަހަރުގެ އެންވަތް ބަދަލުކުރުމަށް ބޭނުންވާ އެހީ ތެރިކަން ފޯރުކޮށްދިނުމުގެ މަޝްރޫޢެއްވެސް އެކުލަވާލުމުގެ މަސައްކަތްކުރަމުންދާކަމަށް ފިޝަރީޒް މިނިސްޓްރީން ބުންޏެވެ.