މަސްވެރިންގެ ގައުމީ ދަފްތަރުގައި ރަޖިސްޓްރީި ނުކުރާާ އުޅަނދުތަކަށް، އިއްޔެއިން ފެށިގެން ”މަސްވެރިކަމުގެ ލައިސަންސް“ އާ ނުކޮށްދޭގޮތަށް ފިޝަރީޒް މިނިސްޓްރީން ވަނީ ނިންމާފަ އެވެ.
ފިޝަރީޒް މިނިސްޓްރީން ބުނީ، 1 އޮކްޓޯބަރުން ފެށިގެން، މަސްވެރިކަމުގެ ލައިސަންސަށް ޝަރުޠު ފުރިހަމަވާނީ މަސްވެރިންގެ ގައުމީ ދަފްތަރުގައި ރަޖިސްޓްރީވެފައިވާ އުޅަނދުތަކަށް އެކަނިކަމަށެވެ. އަދި އެތާރީޚްގެ ފަހުން ރަޖިސްޓްރީ އާ ކުރުމަށް ހުށަހަޅާ މަސްދޯނިތަކުން ދަފްތަރުގައި ރަޖިސްޓްރީކޮށްފައި ނުވާނަމަ ލައިސަންސް އާ ނުކޮށްދޭނެކަމަށް މިނިސްޓްރީން ބުނެފައި ވެއެވެ.
މިކަމާއި ގުޅޭގޮތުން ފިޝަރީޒް މިނިސްޓްރީގެ ސްޓޭޓް މިނިސްޓަރު މުހައްމަދު މުއްޠަލިބް ވިދާޅުވީ، މިފަދަ ފިޔަވަޅެއް އަޅަން ނިންމީ އެއްވެސް ހާލެއްގައި މަސްވެރިންނަށް ދަތިކުރުމުގެގޮތުން ނޫންކަމަށާއި، އެއީ ބާނާމަހުގެ ރިކޯޑް ’ކެޔޮޅު‘ އެޕްލިކޭޝަން މެދުވެރިކޮށް ބެލެހެއްޓުމުގެ ބޭނުމުގައި ނިންމި ނިންމުމެއްކަމަށެވެ.
”ދަފްތަރު މެދުވެރިކޮށް އިންނާނެ ކެޗް ޑޭޓާ އަޅަން. އެހެންވީމައި ދަފްތަރުގައި ރަޖިސްޓްރީ ނުވާ އުޅަނދުތަކުގެ ކެޝް ޑޭޓާ ނޭޅޭނެއްނު؟ ކެޗް ޑޭޓާ ނޭޅޭކަމަށްވަންޏާމު ވާނެގޮތަކީ، ލައިސަންސްގެ ޝަރުޠު ފުރިހަމައެއް ނުވާނެ. އެހެންވީމައި އެ ރިސްޓްރިކްޝަންއެއް އެ އަންނަނީ. މިހާރު ވާގޮތަކީ އައިއޯޓީސީއަށް މައުލޫމާތު ފޮނުވުމުގައި ރިކުއަރމެންޓެއްގެ ގޮތުގައި މިއިންނަނީ އެމީހުން ބާނާމަހުގެ ޑޭޓާ ދުވަހުން ދުވަހަށް އަޅާގޮތަށް. ޑޭޓާ ކުރީގައި ލޮގްފޮތުގައި ލިޔުމުގެ ބަދަލުގައި މިހާރު މި ފޮނުވަނީ، އެޕް މެދުވެރިކޮށް. މިސަބަބުތަކާ ހުރެ ލައިސަންސް ދިނުމުގައި ރިސްޓްރިކް ވަނީ.“ މުއްޠަލިބް ވިދާޅުވި އެވެ.
މަސްވެރިންނަކީ ދައުލަތް ދަންނަ ބަޔަކަށް ހެދުމުގު މަޤްސަދުގައި މަސްވެރިންގެ ޤައުމީ ދަފުތަރެއް އެކުލަވައިލުމަށް [ކެޔޮޅު] ފޯނު އެޕްލިކޭޝަނެއް 16 ފެބްރުއަރީ 2024 ގައި އިފްތިތާޙްކޮށް، އެ ދަފްތަރު ފުރިހަމަކުރުމަށްޓަކައި ފިޝަރީޒް މިނިސްޓްރީން ވަނީ ގިނަ މަސައްކަތްތަކެއް ކޮށްފައެވެ. އެގޮތުން، މަސްވެރި އުޅަނދުތަކުގެ ޒިންމާވާ ފަރާތްތަކަށް ގުޅުމުގެ އިތުރުން، މަސްވެރި ރަށްރަށާއި މަސްކިރާ ބަނދަރުތަކަށް މިނިސްޓްރީގެ މުވައްޒަފުން ދަތުރުކޮށް ދަފްތަރުގައި ރަޖިސްޓަރީވުމުގައި ޢަމަލުކުރަންޖެހޭ ގޮތުގެ މައުލޫމާތު އޮޑިވެރިންނަށާއި މަސްވެރިންނަށް ފޯރުކޮށްދީފައި ވެއެވެ. އެހެންނަމަވެސް، ރާއްޖޭގައި މަސްވެރިކަމަށް ލައިސަންސް ނަގާފައިވާ 474 މަސް ދޯނި އޮންނައިރު، 1 އޮކްޓޯބަރުގެ ނިޔަލަށް ދަފްތަރުގައި ރަޖިސްޓްރީކޮށްފައިވަނީ 301 ދޯންޏެވެ.
މިނިސްޓްރީން ބުނީ، ’މަސްވެރިންގެ ގައުމީ ދަފްތަރު މެދުވެރިކޮށް އެއްކުރެވޭ މަޢުލޫމާތުތަކަކީ މަސްވެރިކަމާބެހޭ ތަރައްޤީގެ މަޝްރޫޢުތައް އެންމެ އެދެވޭ ގޮތެއްގައި ފަރުމާކުރުމަށާއި، މަސްވެރިންނަށް ބޭނުންވާ ޚިދުމަތްތައް އެކަށީގެންވާ ގޮތެއްގައި ފޯރުކޮށްދިނުމަށް ސަރުކާރުން ކަނޑައަޅާފައިވާ ސިޔާސަތުތައް ތަންފީޛުކުރުމަށްޓަކައި އެއްކުރެވޭ މުހިއްމު މަޢުލޫމާތުތަކެއް ކަމަށެވެ. އެހެންކަމުން، މިހާރު ދަފްތަރުގައި ރަޖިސްޓްރީ ނުކޮށް ތިބި މަސްދޯނިތައް ވީ އެންމެ އަވަހަކަށް ރަޖިސްޓްރީވުމަށް އެދޭކަމަށެވެ.
”އަޅުގަނޑުމެން މިއެދެނީ، ވީހާ އަވަހަކަށް ދަފްތަރުގައި ރަޖިސްޓްރީވާން. އޭގައި ދަތިކަމެއް އުޅެންޏާވެސް، މިނިސްޓްރީއަށް ގުޅައިގެން އެކަން ހައްލުކޮށްގެން ރަޖިސްޓްރީވާން. މިވާގޮތަކީ މަސްވެރިކަމުގެ ޕްރޮސެސް ކޮމްޕްލީޓްވާއިރު، މަސްވެރިއާއަށް އެލިބޭ ބެނެފިޓްގެ އިތުރުން، މަސްވެރިކަން މެނޭޖްކުރުމަށްޓަކައި، އެބޭނުންވާ ޑޭޓާ އެއްކުރުމަށްވެސް މުހިންމު. އެހެންވީމައި މީގެ ރަޖިސްޓްރީވެގެން ކުރިއަށް ދިއުމަކީ، މުޅި މަސްވެރިކަމުގެ ސިނާއަށް ބައްޓަން ކުރުމަށްޓަކައި މުހިންމުކަމެއް. މިއީ، ޑޭޓާތައް ކަލެކްޓްކުރާ އެޕަކަށް ވާތީ އެކަމުގައި މަސްވެރިންގެ އެއްބާރުލުން ފުރިހަމައަށް ބޭނުންވާ ވާހަކަ ބުނެލަން ބޭނުންވަނީ.“ މުއްޠަލިބް ވިދާޅުވި އެވެ.
ދަފްތަރުގައި ރަޖިސްޓަރީވާނެ ގޮތުގެ ގައިޑް މިނިސްޓްރީން ވަނީ އާންމުކޮށްފަ އެވެ. އަދި، ރަޖިސްޓަރީވުމާ ގުޅޭ ވީޑިއޯއެއްވެސް މިނިސްޓްރީގެ ވެބްސައިޓްގައި ޝާއިޢުކޮށްފައި ވެއެވެ. ދަފްތަރުގައި ރަޖިސްޓަރީވުމުގައި މައްސަލައެއް ދިމާވެއްޖެނަމަ، މިނިސްޓްރީގެ ފިޝަރީޒް ކޮމްޕްލަޔަންސް ސެކްޝަންގެ ވައިބަރ ނަންބަރ (7928721) އަށް މެސެޖް ކުރުމަށް މިނިސްޓްރީން އެދިފައި ވެއެވެ.
މަސްވެރިންގެ ޤައުމީ ދަފްތަރުގައި ރަޖިސްޓްރީވުމަށް އަމަލުކުރާނެ ގޮތް. pic.twitter.com/bjQcO7KMf7
— Ministry of Fisheries and Ocean Resources (@MFORmv) August 9, 2024
މަސްވެރިންނަށް ދިމާ ވެފައިވާ ގިނަ މައްސަލަތަކަށް ދަފްތަރު މެދުވެރިކޮށް ހައްލުކުރެވޭނެ އިންތިޒާމުތަކެއް ހަމަޖެހޭގޮތަށް އޮތްއިރު، ވީހާވެސް އަވަހަށް ދަފްތަރުގައި ރަޖިސްޓްރީވުން މުހިންމެވެ.