އެސްއެމްއީ ޑެވަލޮޕްމެންޓް ފައިނެންސް ކޯޕަރޭޝަން(އެސްޑީއެފްސީ) ގެ ’މުރާބަޙާ އާރްއެސްޑަބްލިއު“ ފެސިލިޓީގެ ދަށުން މަސްދޯނިފަހަރުގައި އާރްއެސްޑަބްލިއު ގާއިމުުކުރުމަށް ދެމިލިއަން ރުފިޔާއާ ހަމަޔަށް ފައިސާ ދޫކުރުމަށް ހަމަޖެހިފައިވާކަމަށް އެކުންފުނިން ބުނެފި އެވެ.
މަސްވެރިކަންކުރާ އުޅަނދުފަހަރުގައި ރެފްރިޖަރޭޓެޑް ސީ ވޯޓަރ (އާރްއެސްޑަބްލިއު) ސިސްޓަމް ހަރުކުރުމަށް، އިސްލާމީ ޝަރީޢާ ހުއްދަކުރާ މުރާބަޙާ އުސޫލުން ފައިނޭންސްކޮށްދިނުމުގެ ފުރުޞަތު އެސްޑީއެފްސީގެ އިސްލާމިކް ވިންޑޯއިން ވަނީ މިމަހުގެ 22 ވަނަ ދުވަހު ހުޅުވާލާފަ އެވެ. މި ޚިދުމަތް ހޯދުމަށް ޝައުޤުވެރިވާ ފަރާތްތަކަށް އެސްޑީއެފްސީގެ އޮންލައިން ޕޯޓަލް https://portal.sdfc.mv މެދުވެރިކޮށް އެކަމަށް އެދި އެޕްލިކޭޝަން ހުށަހެޅޭނެއެވެ. އެޕްލިކޭޝަން ބަލައިގަތުމުގެ ސުންގަޑިއަކީ 30 ނޮވެމްބަރ 2024 އެވެ. އެޕްލިކޭޝަންތައް ލިބޭ މިންވަރަކުން ޝަރުތުހަމަވާ ފަރާތްތަކުގެ އެޕްލިކޭޝަންތައް ޕްރޮސެސްކުރުމުގެ މަސައްކަތް ކުރިއަށް ގެންދާނެކަމަށް އެސްޑީއެފްސީން ބުނެފައި ވެއެވެ.
ރާއްޖޭގައި މިހާރު މަސްވެރިކަން ކުރަމުންގެންދާ އުޅަނދު ފަހަރުތަކަށާއި، މަސްވެރިކަމަށް ބޭނުންކުރެވޭ ހާލަތުގައި ހުރި އުޅަނދުފަހަރުތަކަށް އަމާޒުކޮށް އެކުަލަވާލާފައިވާ، މި ފެސިލިޓީގެ ދަށުން ފައިނޭންސްކޮށްދޭނީ 50 ފޫޓު ނުވަތަ އެއަށްވުރެ ބޮޑު މަސްދޯނިފަހަރުތަކަށެވެ. އަދި އެ ދޯންޏެއްގައި، މަދުވެގެން 15 ޓަނުގެ މަސް ރައްކާކުރެވޭ ވަރުގެ ޖާގަ ހުންނަންވާނެކަމަށް އެސްޑީއެފްސީން ބުންޏެވެ. މި ފެސިލިޓީގެ ދަށުން ފައިނޭންސްކޮށްދެނީ، މަސްދޯނިފަހަރުގައި ލޮނުފެނުން މަސްފިނިކުރާ ނިޒާމް (އާރް.އެސް.ޑަބްލިއު ސިސްޓަމް) ޤާއިމްކުރުމަށާއި، ޖެނެރޭޓަރ ސެޓް ގަތުމަށާއި، ސޯލާ ޕަވަރ ޕެނަލް ސިސްޓަމް ގަތުމަށެވެ.
’މުރާބަޙާ އާރްއެސްޑަބްލިއު‘ ފައިނޭންސިންގ ގެ ދަށުން، 2,000,000 ރުފިޔާ އާއި ހަމައަށް ފައިސާ ދޫކުރާއިރު، ފައިދާ ހިސާބު ކުރަނީ އަހަރަކަށް %6 ގެ މަގުންނެވެ. ގިނަވެގެން 10 އަހަރު ދުވަހުގެ ތެރޭގައި ދައްކާ ޚަލާސްކުރާ ގޮތަށް މި ފެސިލިޓީގެ ދަށުން ފައިނޭންސްކޮށްދޭއިރު، 6 މަސް ދުވަސް ގްރޭސް ޕީރިއެޑްގެގޮތުގައި ހަމަޖައްސައި ދެއެވެ. މި ފެސިލިޓީން ފައިނޭންސް ހޯދުމަށް ރަހުނެއް ބަހައްޓަން ނުޖެހޭނެކަމަށާއި، މިމަޝްރޫއުގެ ދަށުން ހޭދަ ކުރަންޖެހޭ އަދަދު ފެސިލިޓީގެ އަދަދަށް ވުރެ ބޮޑުވާނަމަ، އިތުރަށް ކުރަންޖެހޭ ޚަރަދެއް ކުރަންވާނީ ފެސިލިޓީއަށް އެދޭ ފަރާތުންކަމަށްވެސް އެސްޑީއެފްސީން ބުނެފައި ވެއެވެ.
މުދާ ގަތުމަށް ކޯޓޭޝަން ހުށަހެޅޭނެ ގޮތްތައް:
- ރާއްޖޭގެ ސަޕްލަޔަރެއްގެ ކޯޓޭޝަން ހުށަހަޅާނަމަ އެމްޕެނެލްޑް ވެންޑަރ އެއްގެ ކޯޓޭޝަން ހުށަހެޅުން.
- އެމްޕެނެލްޑް ލިސްޓްގައި ނުހިމެނޭ ފަރާތަކުން މުދާ ގަންނަން ބޭނުންވާނަމަ، މުދާ ވިއްކާ ފަރާތް އެމްޕެނަލްމަންޓް މަރުހަލާ ފުރިހަމަ ކުރުން.
- ފެސިލިޓީއަށް އެދޭ ފަރާތް ’އެޖެންޓް‘ އެއްގެ ގޮތުގައި ރާއްޖެއިން ބޭރުން މުދާ ގަތުން.
’މުރާބަޙާ އާރްއެސްޑަބްލިއު ފައިނޭންސިންގ’، ފެސިލިޓީއަކީ އެސްޑީއެފްސީއާއި، މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއާއި، މާލީ ވުޒާރާއާއި، އިސްލާމިކް ޑިވެލޮޕްމެންޓް ބޭންކާއި ގުޅިގެން މަސްވެރިކަމުގެ ސިނާއަތް ދިރުވާ ކުރިއެރުވުމަށް އެކުލަވާލާފައިވާ ޕްރޮޑަކްޓަކެވެ. މި ފެސިލިޓީގެދަށުން، އަލަށް ފަށާ ވިޔަފާރިތަކަށާއި، މިހާރު ކުރަމުންދާ ވިޔަފާރިތަކަށްވެސް ފައިނޭންސް ހޯދުމަށް ހުށަހެޅެއެވެ.
އެސްޑީއެފްސީ އަކީ، އެންމެ ކުދި، ކުދި އަދި މެދު ފަންތީގެ ވިޔަފާރިތަކަށް ދިމާވާ ދަތިތައް ހައްލުކުރުމަށްޓަކައި ފަސޭހައިން ލޯނު ލިބޭނެ މަގު ފަހިކޮށްދިނުމުގެ ގޮތުން ޤާއިމްކޮށްފައިވާ ކުންފުންޏެކެވެ. އެކުންފުނިންދަނީ، ދިވެހިރާއްޖޭގައި އަލަށް އުފައްދާ އަދި ކުރިއަރަމުން އަންނަ ކުދި އަދި މެދު ފަންތީގެ ވިޔަފާރިތަކަށް ބޭނުންވާ މާލީ އެހިތެރިކަން ފޯރުކޮށްދިނުމުގެ ގޮތުން ތަފާތު އިޤްތިޞާދީ ދާއިރާތަކަށް އަމާޒުކޮށް ލުއިގޮތަކަށް ލިބޭނޭ ލޯނު ތައާރަފްކޮށް އެމަސައްކަތް ދެމެހެއްޓެނިވި ގޮތެއްގައި ކުރަމުންނެވެ.