މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އިން މަސްވެރިން އަތުން މަސްގަތް ފައިސާ ދޫކުރަން ފަށައިފި އެވެ.
މިފްކޯއިން ބުނީ، މިއަދު ދޫކުރަނީ، 24 އޮގަސްޓުން 25 ސެޕްޓެމްބަރު މަހުގެ ނިޔަލަށް ގަތް މަހަށްވާ ފައިސާކަމަށެވެ. އެގޮތުން މިއަދު 17,350,903 (ސަތާރަ މިލިއަން ތިން ލައްކަ ފަންސާސް ހާސް ނުވަ ސަތޭކަ 3 ރުފިޔާ) ޖަމާކުރަމުންދާނެކަމަށް މިފްކޯއިން ބުނެފައި ވެއެވެ.
”ސަރުކާރުގެ އެހީތެރިކަމާއެކު މި ފައިސާ އެއްކޮށް އޮޑިވެރީންނަށް މިއަދު ޖަމާވަމުންދާނެ.“ މިފްކޯއިން ބުންޏެވެ.
މިފްކޯއިން މަސްވެރިންނަށް ފައިސާ މިއަދު ދޫކުރަން ފަށާފައި މިވަނީ، ފައިސާ ދޫކުރުން ލަސްވެ މަސްވެރިން އެކަމާއި ނުރުހުން ފާޅުކުރަމުން ދަނިކޮށްނެވެ. މިފްކޯއިން ބުނަމުންދަނީ މަސްވެރިންނަށް ފައިސާ ދިނުމުގައި ލަސްވަނީ އެކުންފުނީގެ ކޭޝްފްލޯވްއަށް ދިމާވި މައްސަލައަކާ ގުޅިގެން ކަމަށެވެ.
މިފްކޯއިން ބުނީ، މިމަހުގެ ކުރީކޮޅުން ފެށިގެން މަސްއޮޑިފަހަރުގެ ޕެންޑިންގ ބިލްތަކާ ގުޅޭގޮތުން ފިޝަރީޒް މިނިސްޓްރީއާއި ފިނޭންސް މިނިސްޓްރީއާއެކު މަޝްވަރާކޮށްގެން މިވަގުތަށް ހައްލުތަކެއް ހޯދިފައިވާކަމަށެވެ. އަދި، ސަރުކާރުން ކެނޑިނޭޅި މިފްކޯއަށް ދޭންޖެހޭ ސަޕޯޓު ފޯރުކޮށްދެމުން އަންނަކަން މިފްކޯއިން ފާހަގަކޮށްފައި ވެއެވެ.