މިއަދު ހެނދުނު ”ހަމްދު“ ދޯނީގައި ރޯވި އަލިފާންގަނޑު ނިއްވާލާފައިވާ ކަމަށް މޯލްޑިވްސް ނެޝަނަލް ޑިފެންސް ފޯރސް(އެމްއެންޑީއެފް) އިން ބުނެފި އެވެ.
އެމްއެންޑީއެފް އިން ބުނީ، ކަނޑިންމަ ރިސޯޓަށް ފެން ހިފައިގެން ދަތުރުކުރަމުން ދިޔަ ”ހަމްދު“ ދޯނީގެ އިންޖީނު ރޫމުގައި އަލިފާނުގެ ރޯވެގެން، އެމްއެންޑީއެފް ސެންޓްރަލް އޭރިއާ ކޮމާންޑް، ދ.ކުޑަހުވަދޫ ފަޔަރ ސްޓޭޝަނަށް ރިޕޯޓްކުރީ ހެނދުނު 7:20 ހާއިރު އެވެ. އެ ރިޕޯޓް ލިބުމާއެކު، އެ ފަޔަރ ސްޓޭޝަނުގެ ފަޔަރ ފައިޓަރުން ހަރަކާތްތެރިވާން ފެށިކަމަށް އެމްއެންޑީއެފްއިން ބުންޏެވެ.
އެމްއެންޑީއެފްއިން ދެންމެ ބުނީ މިހާރު އެދޯނީގައި ރޯވި އަލިފާންގަނޑު ނިއްވާލާފައިވާކަމަށެވެ.
މި ހާދިސާ ހިނގިއިރު ދޯނިން ދަތުރުކުރަމުން ދިޔައީ 4 މީހުންނެވެ. އެ އެންމެންގެ ހާލުވެސް ރަނގަޅުކަމަށް އެމްއެންޑީއެފްއިން މައުލޫމާތުދެއެވެ. މި ހާދިސާގައި ދޯނި ވަނީ ވަރަށް ބޮޑަށް އަނދާފަ އެވެ.