ރާއްޖޭގެ 11 ރަށެއްގައި އައިސް ޕްލާންޓް ގާއިމުކުރުމަށް ސަރުކާރުން ކުރަމުންދާ މަސައްކަތުގެ ދަށުން، 3 ރަށެއްގައި އައިސް ޕްލާންޓު ތަރައްގީކުރުމަށް، ފިޝަރީޒް މިނިސްޓްރީގެ ފަރާތުން ކޮންޓްރެކްޓަރާ ހަވާލުކޮށްފި އެވެ.
ދ. މީދޫ، ދ.ބަނޑިދޫ އަދި ށ. ފުނަދޫގައި އައިސްޕްލާންޓް އެޅުމުގެ މަޝްރޫއުގެ މަސައްކަތް ހަވާލުކުރީ މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) އާއެވެ. އިއްޔެ ފިޝަރީޒް މިނިސްޓްރީން ވަނީ މިފްކޯއާއެކު މަސައްކަތް ހަވާލުކުރުމުގެ އެއްބަސްވުމުގައި ސޮއިކޮށްފަ އެވެ. މި އެއްބަސްވުމުގައި މިނިސްޓްރީގެ ފަރާތުން ޑިރެކްޓަރ ޖެނެރަލް އީނާސް ނަސީރު ސޮއިކުރެއްވިއިރު މިފްކޯގެ ފަރާތުން ސޮއިކުރެއްވީ، އެ ކުންފުނީގެ ޗީފް ފައިނޭންޝަލް އޮފިސަރ (ސީއެފްއޯ) އިލްޔާސް ޙަނީފެވެ.
މިފްކޯއާއި މި ތިން މަޝްރޫއުގެ މަސައްކަތް ހަވާލުކޮށްފައިވަނީ 24 މިލިއަން ރުފިޔާ އަށެވެ. އެއީ، ކޮންމެ އައިސް ޕްލާންޓެއް 8 މިލިއަން ރުފިޔާގެ މަގުންނެވެ. މި ޕްލާޏްޓްތަކުގެ މަސައްކަތް 8 މަސް ދުވަސްތެރޭގައި ނިންމުމަށް ދެ ފަރާތުން އެއްބަސްވެފައިވެއެވެ.
ފިޝަރީޒް މިނިސްޓްރީން ބުނީ، މި މަޝްރޫޢުގެ ދަށުން ކޮންމެ ރަށެއްގައިވެސް ތަރައްގީކުރާނީ ދުވާލަކު 30 ޓަނުގެ އައިސް އުފެއްދޭވަރުގެ ޕްލާންޓެއްކަމަށެވެ. އަދި، އައިސް ޕްލާންޓަކާއެކު 50 ޓަނުގެ އައިސް ރައްކާކުރާ ސްޓޯރޭޖެއް ވެސް ކޮންމެ ރަށެއްގައި އަޅާނެ ކަމަށް މިނިސްޓްރީން ބުނެފައި ވެއެވެ.
“ މި ތިން އައިސްޕްލާންޓް ނިމުމުން ދުވާލަކު ޖުމްލަ 80 ޓަނުގެ އައިސް އުފެއްދޭނެ އިންތިޒާމު ހަމަޖެހިގެންދާނެ.“ މިނިސްޓްރީން ބުނެފައި ވެއެވެ.
ށ. ފުނަދޫ، ދ. މީދޫ އަދި ދ. ބަނޑިދޫގައި އައިސްްޕްލާންޓް ތަރައްގީކުރަން މިފްކޯއާ ހަވާލުކޮށްފައި މިވަނީ، މަސްވެރިންނަށް އައިސް ލިބުމުގައި ދިމާވަމުން އަންނަ ދަތިތައް ހައްލުކޮށް، ރާއްޖޭގެ ހުރިހައި ސަރަހައްދަކުން މަސްވެރިންނަށް އެއްވެސް ތަކުލީފަކާ ނުލައި އައިސް ލިބޭނެ އިންތިޒާމު ހަމަޖައްސައިދިނުމަށްޓަކައި، 11 ރަށެއްގައި އައިސް ޕްލާންޓް ގާއިމުކުރުމަށް ސަރުކާރުން ކުރަމުންދާ މަސައްކަތުގެ ދަށުންނެވެ. ސަރުކާރުގެ ޚަރަދުގައި މި ތިން ރަށުގެ އިތުރުން، ކުޅުދުއްފުށި ސިޓީ، މ. ވޭވަށް، އަދި ޅ. ނައިފަރުގައިވެސް އައިސް ޕްލާންޓު ގާއިމުކުރާނެއެވެ.
މި ޕްރޮޖެކްޓްގައި ހިމެނޭ އަނެއް 5 އައިސް ޕްލާންޓް ގާއިމުކުރަނީ ސައުދީ އަރަބިއްޔާގެ، ސައުދީ ފަންޑް ފޮރ ޑެވެލޮޕްމެންޓް(އެސްޑީއެފް) ގެ އެހީގަ އެވެ. އެއީ، ހއ. އިހަވަންދޫ، ހއ. ދިއްދޫ، ށ. ކޮމަންޑޫ، އއ. ރަސްދޫ އަދި ގދ. ރަތަފަންދޫގައި ތަރައްގީ ކުރާ އައިސް ޕްލާންޓްތަކެވެ.
މަސްވެރިންނަށް ބޭނުންވާ ވަރަށް އައިސް ނުލިބުމާއި، މިހާރު ހުރި ބައެއް އައިސް ޕްލާންޓްތަކުން އައިސް ލިބެންނެތުމާއި، އައިސް ހޯދަން ދުރު ރަށްރަށަށް ތެޔޮ އަންދާފައި ދަތުރުކުރުމަކީ މަސްވެރިންނަށް މިހާރު ކުރިމަތިވެފައިވާ ވަރަށް ބޮޑު ގޮންޖެހުމުކެވެ. އާ އައިސްޕްލާންތްތަކާއެކު މަސްވެރިން އައިސް ހޯދުމުގައި މިހާރު އުފުލަމުންދާ ތަކުލީފަށް ބޮޑު ލުޔެއް އަންނާނެކަމަށް ބެލެވެއެވެ.