ކުދި ޖަޒީރާ ޤައުމުތަކުގެ ކަނޑުތަކާއި ދިރޭތަކެތީގެ ނަސްލު ހިމާޔަތްކޮށް ބެލެހެއްޓުމަށް މާލީ އެހީތެރިކަން ބޭނުންވާކަމަށް އެންވަޔަރަންމަންޓް މިނިސްޓަރު ޠޯރިގް އިބްރާހިމް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ މިހާރު ކުރިޔަށްދާ އދގެ އާންމު މަޖިލީޙުގެ 79 ގެ ތެރޭގައި ބޭއްވި ”30×30 އަދި އޭގެ ފަހުން“ އަމާޒު ހާސިލުކުރުމަށް ބޭއްވުނު ފައިނޭންސް ރައުންޑްޓޭބަލްގައި ވާހަކަފުޅު ދައްކަވަމުންނެވެ.
މި ބައްދަލުވުމުގައި މިނިސްޓަރ ތޯރިގް ވަނީ، ކުދި ޖަޒީރާ ޤައުމުތަކުގެ ކަނޑުތަކާއި ދިރޭތަކެތީގެ ނަސްލު ހިމާޔަތްކޮށް ބެލެހެއްޓުމަށް ފައިނޭންސް ލިބުމުގެ މުހިންމުކަން ފާހަގަކުރައްވާފަ އެވެ. އަދި، މިކަމަށް ފަންޑިންގ ލިބުމުގެ މުހިންމުކަން ވަރަށް ބޮޑުކަމަށް ވިދާޅުވިއެވެ.
”އަޅުގަނޑުމެންގެ ކަނޑުތަކާއި ދިރޭތަކެތީގެ ނަސްލު ރައްކާތެރިކޮށް ބެލެހެއްޓުމަށް ސިޑްސް ޤައުމުތަކަށް ފައިނޭންސް ލިބުމަކީ ވަރަށް މުހިންމު ކަމެއް.މިކަމަށް އެކަށީގެންވާ ފަންޑިންގ ނުލިބިއްޖެނަމަ، އަޅުގަނޑުމެންގެ މަސައްކަތްތަކަށް ބޮޑެތި ގޮންޖެހުންތަކާ ކުރިމަތިލާން ޖެހޭނެ.“ މިނިސްޓަރު ވިދާޅުވި އެވެ.
މި ބައްދަލުވުމުގައި ބައިވެރިވި އެހެން ގައުމުތަކުގެ ބޭފުޅުންވެސް ވަނީ، ކުދި ޖަޒީރާ ޤައުމުތަކަށް ދިމާވެފައިވާ ގޮންޖެހުންތަކާއި، އެ ޤައުމުތަކުގެ ތިމާވެށި ރައްކާތެރިކުރުމަށް ކުރަމުންދާ މަސައްކަތްތަކަށް އެއްބާރުލުން ދިނުމުގެ މުހިންމުކަން ފާހަގަކުރައްވާފަ އެވެ.
”30×30 އަދި އޭގެ ފަހުން“ ރައުންޑްޓޭބަލްއަކީ ދުނިޔޭގެ ތިމާވެށި ރައްކާތެރިކުރުމަށް މަސައްކަތްކުރާ ޤައުމުތަކާއި ޖަމިއްޔާތަކުގެ މެދުގައި މަޝްވަރާކޮށް، އެއްބާރުލުން އިތުރުކުރުމަށް ބޭއްވި މުހިންމު ބައްދަލުވުމެކެވެ.