މާކަނޑުގެ ދިރުންތަކާއި ސަރަޙައްދުތައް ޙިމާޔަތްކޮށް ރައްކާތެރިކުރުމާ އަދި ދެމެހެއްޓެނިވި ގޮތުގައި ބޭނުންކުރުމާގުޅޭ މުޢާހަދާ (ބީ.ބީ.އެން.ޖޭ. މުޢާހަދާ) ދިވެހިރާއްޖެއިން ތަސްދީގުކޮށްފި އެވެ.
އ.ދ. ގެ އާންމު މަޖިލީހުގެ 79 ވަނަ ސެޝަންގެ ހަވާސާގައި އިއްޔެ ބޭއްވި ހާއްސަ ރަސްމިއްޔާތެއްގައި، މި މުއާހަދާ ތަސްދީގްކުރުމަށް ބޭނުންވާ ”އިންސްޓްރޫމަންޓް އޮފް ރެޓިފިކޭޝަން“ ރާއްޖޭގެ ފަރާތުން އދއާ ހަވާލުކޮށްދެއްވީ މިނިސްޓަރ އޮފް ފޮރިން އެފެއާޒް، މޫސާ ޒަމީރު އެވެ. މިއާއެކު ރާއްޖެވެފައިވަނީ މި މުޢާހަދާ ތަޞްދީޤުކުރި 9 ވަނަ ޤައުމަށެވެ.
މިއަހަރުގެ ފެބްރުއަރީ މަހުގެ 11 ވަނަ ދުވަހު ބޭއްވި ވަޒީރުންގެ މަޖިލީހުގައި މި މުޢާހަދާގައި ދިވެހިރާއްޖެއިން ސޮއިކޮށް، ތަޞްދީޤުކުރުން މުހިންމު ކަމަށް ނިންމިއެވެ. އަދި، އެ މަސައްކަތް ކުރިއަށް ގެންދިޔުމަށްޓަކައި ފެބްރުވަރީމަހުގެ 29 ވަނަ ދުވަހު ސަރުކާރުން ރައްޔިތުންގެ މަޖްލީހުގެ ރުހުން ހޯދުމަށް ހުށަހެޅިއެވެ. އެކަން ދިރާސާކޮށް މުޢާހަދާގައި ދިވެހިރާއްޖެއިން ބައިވެރިވުމަށް ރައްޔިތުންގެ މަޖިލީހުން ރުހުން ދިނީ 13 މެއި 2024 ގައެވެ. ދިވެހިރާއްޖެއިން ބީ.ބީ.އެން.ޖޭ މުޢާހަދާގައި ސޮއިކޮށްފައިވަނީ 3 ސެޕްޓެމްބަރ 2024 ގައެވެ.
ދިވެހިރާއްޖެއަކީ ކަނޑުތައް ރައްކާތެރިކޮށް، އެ ސަރަޙައްދު ޙިމާޔަތްކޮށް އަދި ދެމެހެއްޓެނިވި ގޮތެއްގައި ބޭނުންކުރުމަށް ކަށަވަރުކުރުމަށް ބާރުއަޅައި، އަހަންމިއްޔަތުކަން ދޭ ޤައުމެއްގެ ގޮތުގައި ސާބިތުކަމާއެކު ދެމިއޮންނާނެކަން ދިވެހި ސަރުކާރުން ވަނީ ޔަޤީންކަން ދީފަ އެވެ.
ދިވެހިރާއްޖޭގެ ކަނޑުގެ ސަރަޙައްދުގައި ހިމެނޭ އެންމެހައި ޤުދުރަތީ ވަސީލަތްތައް ޚިމާޔަތްކުރުމަކީ ދިވެހިރާއްޖޭގެ ވަރަށް މަތީ މަސްޢޫލިއްޔަތެއް ކަމުގައިވާއިރު، އެ ކަނޑުގެ ސަރަޙައްދު ހިމާޔަތްކުރުމުގައި ދިވެހިރާއްޖޭގެ ކަނޑުގެ ސަރަޙައްދު ބޭރުގައި ހިމެނޭ ސަރަޙައްދު ޙިމާޔަތްކޮށް ދެމެހެއްޓެނިވި ގޮތެއްގައި ބޭނުންކުރަމުންދާކަން ކަށަވަރުކުރުމަކީ މަސްޢޫލިއްޔަތު އަދާކުރުމުގެ ތެރޭގައި ހިމެނޭ ކަމެކެވެ.
އެގޮތުން، ތަސްދީގްކުރި މި މުޢާހަދާގެ ދަށުން ބޮޑެތި ކަނޑުގެ ސަރަޙައްދުތައް ޙިމާޔަތްކުރުމުގެ އިޖުރާއަތު ޤާއިމުކޮށްފައި ވެއެވެ. އަދި މީގެ އިތުރުން ކަނޑާ ގުޅޭ ފަންނީ މަޢުލޫމާތު ހިއްސާކުރުމާގުޅޭ ކަންތައްތައްވެސް އެ މުޢާހަދާގައި ހިމެނިފައިވާ ކަމާއި، މޫސުމަށް އަންނަ ބަދަލުތަކާ ގުޅިގެން ފިޔަވަޅުތައް އެޅުމާ ގުޅޭ ޝަކްލީ ކަންތައްތައް އެ މުޢާހަދާގައި ހިމެނިފައި ވެއެވެ. އަދި މި އެންމެހާ ކަންތައްތަކީ ދިވެހިރާއްޖޭގެ ކަނޑުގެ ސަރަޙައްދުން ލިބޭ މަންފާތައް ޙިމާޔަތްކުރުމަށް މުހިންމު ކަންތައްތަކެއް ކަމުގައިވާތީ، މި މުޢާހަދާ ތަސްދީގްކުރުމާއެކު ދިވެހިރާއްޖެ އަށް ނުހަނު ގިނަ ފައިދާތަކެއް ލިބިގެންދާ އެވެ.
19 ޖޫން 2023 ގައި އ.ދ. ގެ އާންމު މަޖިލީހުގައި ފާސްކުރި ބީ.ބީ.އެން.ޖޭ. މުޢާހަދާގައި ޤައުމުތަކަށް ސޮއިކުރެއްވުމަށް ހުޅުވާލައްވާފައިވަނީ 20 ސެޕްޓެމްބަރ 2025 ގެ ނިޔަލަށެވެ.