މޫސުމާބެހޭ ޤައުމީ މަރުކަޒުން، ރ އަތޮޅުން ފެށިގެން މ އަތޮޅަށް ހުދުސަމާލު ނެރެފިއެވެ.
މިރޭ 00:45 އިން ފެށިގެން ހެނދުނު 6:45 އަށް ރ އަތޮޅުން ފެށިގެން މ އަތޮޅަށް ހުދުސަމާލު ނެރެފައިވަނީ، ކަނޑުތައް ގަދަވާނެކަމަށް ލަފާކޮށެވެ.
ވައިޖެހޭނެ ކަމަށް ލަފާކުރެވެނީ، ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައެވެ. އަދި ވިލާގަނޑުގައި ގަޑިއަކު 40 މޭލަށް ވައި ގަދަވެ، ކަނޑުތައް ގަދަވާނެ ކަމަށްވެސް ލަފާކުރެވެއެވެ.
މި ސަރަޙައްދުތަކުގައި ދަތުރުފަތުރު ކުރާ ފަރާތްތަކުން ސަމާލުވުމަށާއި، ކަނޑަށް ނުކުތުމުގައި ފަރުވާތެރިވުމަށް މޫސުމާބެހޭ ޤައުމީ މަރުކަޒުން އިލްތިމާސްކޮށްފައިވެއެވެ.