އުތުުރުގައި ކަނޑު ދަތުރުކުރާ ފަރާތްތަކަށް ސަމާލުވުމަށް މޫސުމާބެހޭ ގައުމީ އިދާރާއިން އިލްތިމާސްކޮށްފި އެވެ.
މެޓް އޮފީހުން ބުނީ މިރޭ އުތުރުގެ ރަށްތަކަށް ކެރީގެ އަސަރު ފޯރުމާއެކު، ގުގުރުން އެކަށީގެންވާކަމަށެވެ. އަދި މެދުރާއްޖެތެރެއާއި އުތުރުގެ އަތޮޅުތަކަށް، ހުޅަނގާއި، ހުޅަނަގު އުތުރުން ގަޑިއަކު 13 މޭލާއި، 20 މޭލާއި ދެމެދުގެ ބާރުމިނުގައި ވައިޖެހޭނެކަމަށާއި ވިލާގަނޑުގައި އިތުރަށް ގަދަވާނެކަމަށެވެ.
”ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވޭ.“މެޓް އޮފީހުން ބުނެފައި ވެއެވެ.
މެދުރާއްޖެތެރެއާއި އުތުރުގެ އަތޮޅުތަކަށް، ކަނޑު އާދައިގެ ވަރަކަށް ގަދަވެފައި، ވިލާގަނޑުގައި ގަދަވާނެކަމަށްވެސް ލަފާކޮށްފައި ވެއެވެ. ރާޅު ނަގާނެކަމަށް ލަފާކޮށްފައިވަނީ 4-7 ފޫޓްގެ އުސްމިނުގައެވެ.
މެޓް އޮފީހުން ބުނީ، މެދު ރާއްޖެތެރެއާއި ދެކުނުގެ ހިސާބަށް ވެސް މިރޭ ވިއްސާކުރާނެކަމަށެވެ. އަދި ބައެއް ރަށްތަކަށް ގުގުރުމާއެކު ވާރޭވެހުންވެސް އެކަށީގެންވާކަމަށެވެ. ބައެއް ރަށްތަކަށް ގުގުރާ ބޯކޮށް ވާރޭވެހޭނެކަމަށް ލަފާކުރެވޭތީ މޫސުމަށް ސަމާލުވުމަށް މެޓް އޮފީހުން އެދިފައި ވެއެވެ.
ދެކުނުގެ އަތޮޅުތަކަށް، ވައި ޖެހޭނީ ދެކުނާއި ހުޅަނގުދެކުނުން، ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ކަމަށް ލަފާކުރެވޭއިރު، ކަނޑު އާދައިގެ ވަރަކަށް ގަދަވެފައި، ވިލާގަނޑުގައި ގަދަވާނެކަމަށްވެސް ލަފާކޮށްފައި ވެއެވެ. އަދި، ރާޅު ނަގާނެކަމަށް ލަފާކޮށްފައިވަނީ 3-6 ފޫޓްގެ އުސްމިނު ގައެވެ.