އައްޑޫ ސިޓީގައި ބައިނަލްއަގުވާމީ ފެންވަރުގެ ’ސީފުޑް ހަބް’އެއް ގާއިމުކުރުމުގެ ވިސްނުން ގެންގުޅުއްވާ ކަމަށް މޯލްޑިވްސް ޕޯޓް ލިމިޓެޑްގެ ސީއީއޯ އަހްމަދު ވަޖީހް އިބްރާހިމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ރާއްޖޭގެ އެންމެ އުތުރުގައި އޯފްޝޯ ބަންކަރިންގެ ޚިދުމަތް ފެށުމުގެ ގޮތުން މިއަދު ބޭއްވި ރަސްމިއްޔާތުގައި ރާއްޖޭގެ ޕޯޓްތައް ތަރައްގީ ކުރުމަށް ގެންގުޅުއްވާ ތަސައްވަރު ހާމަކުރައްވަމުންނެވެ.
އެމަނިކުފާނުގެ ވާހަކަފުޅުގައި ވިދާޅުވީ، ރާއްޖޭގެ އެންމެ ދެކުނު އައްޑޫ އަތޮޅުގެ ޕޯޓް މިހާރު ހިންގަނީ ގެއްލުމުގައި ކަމުން، ފައިދާ ކުރަނިވި ގޮތަކަށް ބޮޑު ބަދަލެއް ގެންނަން ބޭނުންވާކަމަށެވެ.
”ޕޯޓެއް އޮތުމަކުން ނުއެއް ފުދޭނެ. ޕޯޓަށް ކޯލްކުރާ ވެސެލްތައް ނުދާކަމަށް ވާނަމަކޮބައިތޯ ޕޯޓެއްގެ ބޭނުމަކީ؟ އައްޑޫގައި އަދި ކުޅުދުއްފުށީގައިވެސް ޕޯޓެއް އޮންނަތާ 19 އަހަރު. ގެއްުލުމުގައި ހިންގަނީ އެމްޕީއެލްއިން ޚަރަދުކޮށްގެން. އެހެންވީމައި މިއީ ވިޔަފާރިއެއް ނޫން.ވިޔަފާރިއަކީ ފައިދާވާގޮތަށް ހިންގައިގެން ކުރާކަމެއް.“ ވަޖީހް ވިދާޅުވި އެވެ.
ވަޖީހް އިތުރަށް ވިދާޅުވީ، އައްޑޫ ޕޯޓަށް ފައިދާވާނެގޮތެއް ހޯދުމަކީ، މަސްއޫލިއްޔަތު އަދާކުރަންޖެހޭ މީހުންގެ ޒިންމާއެއްކަމުން، މިސަރުކާރުގެ ވިސްނުންހުރީ، އައްޑޫ ޕޯޓަށް ފައިދާވާގޮތަށް އެތަން އެހެން ގޮތަކަށް ބައްޓަން ކުރުމަށް ކަަމަށެވެ. އެގޮތުން، ހަމައެކަނި އެއްކަމަކަށް ބަރޯސާވެ ނަފާ ހޯދުމުގެ ބަދަލުގައި، ޕޯޓަށް އިތުރު ނަފާ ހޯދަން ކުރެވެން ހުރީ ކޮންކަމެއްތޯ ބަލައި އިތުރު ކަންކަން ތައާރަފްކުރުމަށް ވިސްނަމުން ގެންދަވާ ކަމަށް ވިދާޅުވިއެވެ.
ވަޖީހްގެ ވާހަކަފުޅުގައި،ދިވެހި ރާއްޖޭގައި މަސްވެެރިކަން ވަކިގޮތަކަށް ކުރަމުން ދާތާ އެއްތައް ޒަމާނެއް ވެއްޖެކަން ފާހަގަކުރައްވައި ވިދާޅުވީ، ރައްޖޭގައި މިއޮތް ހުރިހައި ދުވަހު، ރިސޯޓްތަކަށް ބޭނުންވާ ހުރިހައި ސީފުޑް އިމްޕޯޓް ކުރަނީ ރާއްޖެއިން ބޭރުންކަމަށެވެ. އެހެންކަމުން، އައްޑޫ ޕޯޓަށް ނަފާލިބޭނެ ކަންކަން ބަލަމުން އަންނައިރު، އައްޑޫސިޓީގައި ބައިނަލްއަގުވާމީ ފެންވަރުގެ ސީފުޑް ހަބެއް ގާއިމުކުރުމުގެ ވިސްނުން ގެންގުޅުއްވާކަމަށް ވިދާޅުވިއެވެ.
”އަޅުގަނޑުމެން ވިސްނުން މި ބަދަލުކޮށްލަނީ، އައްޑޫ އަތޮޅުގައި އިންޓަނޭޝަނަލް ސީފުޑް ހަބެއް ގާއިމުކުރުމަށްޓަކައި. މިކަން ކުރަން ވިސްނުން އައީ، ދުނިޔޭގެ މިކަމާބެހޭ ބޮޑު ޖަމްއިއްޔާއަކުން ކުރި ދިރާސާއަކުން ދައްކަނީ އޭޝިއާ ބައްރުގައި، މިހިސާބުގައިވެސް އިންޓަނޭޝަނަލް ފިޝް ހަބެއް ހިންގަން އެންމެ މުހިންމީ ސަރަހައްދަކީ އައްޑޫ ހިތަދޫ އޭރިއާކަމަށް. އެހެންވީމައި މިކަމުގެ މަންފާ މި ގައުމަށް ހޯދައިދިނުމުގެ ވިސްނުމުގެ މަސައްކަތް މި ކުރަނީ.“ ވަޖީހް ވިދާޅުވި އެވެ.
ވަޖީހް ވިދާޅުވީ މިއަދު އެންމެ އުތުރުގައި ފެއްޓި ބަންކަރިން ޚިދުމަތުގެ ސަބަބުން ރާއްޖޭގެ އިގުތިސާދަށް ރަނގަޅު ކުރިއެރުމެއް ލިބިގެންދާނެކަމަށެވެ. ރާއްޖޭގެ ތާރީޚުގައިވެސް މިއަދު ފުރަތަމަ ފަހަރަށް ބަންކަރިންގެ ޚިދުމަތް އެސްޓީއޯއިން ދޭން ފެށީ އެމްޕީއެލްއާ ގުޅިގެންނެވެ. އެސްޓީއޯއިން ތެޔޮ ވިއްކާއިރު، އެ ތެޔޮ ގަންނަ އުޅަނދު ފަހަރަށް ބޭނުންވާ ހުރިހައި މެރިޓައިމް ޚިދުމަތެއް ފޯރުކޮށް ދޭނީ އެމްޕީއެލްއިންނެވެ.