ދިވެހިރާއްޖޭގެ މަސްވެރިކަމުގެ ސިނާއަތު ތަރައްގީކުރުމަށް ވޯލްޑް ބޭންކުން އިތުރަށް އެހީތެރެވެދެވޭނެ ގޮތްތަކާމެދު މަޝްވަރާ ކޮށްފި އެވެ.
މި މަޝްވަރާތައް ބޭއްވީ، މިހާރު ރާއްޖެ ވަޑައިގެން އުޅުއްވާ ވޯލްޑް ބޭންކުން އިރުމަތީ އޭޝިއާއައި ޕެސިފިކް ސަރަހައްދަށް ކަނޑަައަޅުއްވާފައި ހުންނަވާ، ޕްރެކްޓިސް މެނޭޖަރ ފޯ އެންވަޔަރަންމަންޓް، ނެޗުރަލް ރިސޯސަސް، އެންޑް ދަ ބްލޫ އިކޮނޮމީ، އޭން ޖެނެޓް ގްލޯބަރ އާއެކު މިއަދު ފިޝަރީޒް މިނިސްޓަރު ޝިޔާމް ބޭއްވެވި ބައްދަލުވުމެއްގަ އެވެ.
ފިޝަރީޒް މިނިސްޓްރީގައި މިއަދު ބޭއްވެވި މި ބައްދަލުވުމުގައ، މިނިސްޓްރީގެ އިސް ވެރިންނާއި، ވޯލްޑް ބޭންކްގެ ވަފްދުގެ ބޭފުޅުން ބައިވެރިވަޑައިގެންނެވި އެވެ.
މި ބައްދަލުވުމުގައި، މައިގަނޑުގޮތެއްގައި މަޝްވަރާކުރެއްވީ، ވޯލްޑް ބޭންކުން ފައިސާ ދޭ ޓްރާންސްފޯމް މަޝްރޫއުގެ ކުރިއެރުންތަކުގެ މައްޗަށް ބިނާކޮށް ރާއްޖޭގެ މަސްވެރިކަމުގެ ދާއިރާ ތަރައްގީ ކުރުމަށް ވޯލްޑް ބޭންކުން އިތުރަށް އެހީތެރިވެދެވޭނެ ގޮތްތައް ހޯދުމާއި ގުޅޭގޮތުންނެވެ. އެގޮތުން މަޝްވަރާކުރެވުނު މުހިންމު ކަންތައްތަކުގެ ތެރޭގައި މަސްވެރިކަމުގެ ދާއިރާ ކުރިއަރުވަން އިނޮވޭޓިވް ސޮލިއުޝަންތަކާއި، ރާއްޖެއިން އިން ދެމެހެއްޓެނިވި ގޮތެއްގައި ކުރިއަށް ގެންދިއުމަށް ކުރާ މަސްވެރިކަމާ ގުޅުންހުރި މަސައްކަތުގެ ބޭނުން ހިފޭނެ ގޮތްތައް ހޯދުން ހިމެނެއެވެ.
މި ބައްދަލުވުމުގައި ވަޒީރު ވިދާޅުވީ، މިފްކޯއަށް ގަންނަ މަހުގެ %65 އަކީ ރާއްޖެއިން އެކްސްޕޯޓް ކުރާ ރޯ މަސްކަމަށާއި، ސަރުކާރުގެ އަމާޒަކީ މަސް ޕްރޮސެސްކޮށް މި އަދަދު މަދުކުރުން ކަމަށެވެ. އަދި، ރާއްޖޭގެ 3 ސަރަހައްދެއްގައި މަސް ޕްރޮސެސްކުރާ ފެސިލިޓީތައް ގާއިމުކުރުމުގެ މަސައްކަތް ކުރިޔަށްދާކަން ފާހަގަކުރެއްވި އެވެ. މީގެ އިތުރުންކު، ންފުނިތަކުގައި ބޭނުންކުރާ ތެލުގެ %35 ޚަރަދު އިއާދަކުރަނިވި ހަކަތައަށް ބަދަލުކުރުމަކީ ރައީސް ޑރ. މުޙައްމަދު މުޢިއްޒުގެ ސިޔާސަތެއްކަމަށް ވެސް ވަޒީރު ފާހަގަކުރެއްވި އެވެ.
މި ބައްދަލުވުމުގައި މިސް އޭން ޖީނެޓް ގްލޯބަރ ވިދާޅުވެފައިވަނީ، ތިމާވެށީގެ ދާއިރާއިންނާއި، އަންހެނުން ބާރުވެރިކުރުވުމާއި އަދި އެހެނިހެން ދާއިރާތަކުން ކުރާ މަސްވެރިކަމާ ގުޅުންހުރި ދެމެހެއްޓެނިވި މަސައްކަތްތަކަށް ފައިނޭންސް ލިބޭނެ ގޮތްތައް އެބަހުރިކަމަށާއި ވުޒާރާއާ ގުޅިގެން މިއަހަރުގެ ނޮވެމްބަރު މަހުގެ ތެރޭގައި ޕްލޭނެއް އެކުލަވާލުމަށް ވޯލްޑްބޭންކުގެ ޓީމެއް ރާއްޖެ އަންނާނެ ކަމަށެވެ.