މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ(މިފްކޯ) ގެ ފެސިލިޓީސްތަކަށް އޮޑިފަހަރުން ކިރުވި މަހަށްވާ ފައިސާ މި ހަފުތާގައިވެސް ދޫކުރެވޭނެކަމުގެ ޔަގީންކަމެއް ނެތްކަމަށް އެ ކުންފުނިން ބުނެފި އެވެ.
އޯގަސްޓްމަހުގެ 24 އިން ފެށިގެން މިފްކޯގެ ފެސިލިޓީސްތަކަށް އޮޑިފަހަރުން ކިރުވި މަހަށް ފައިސާ ނުދައްކާ މައްސަލައިގައި، ޖަވާބެއް ހޯދަން ކެޔޮޅާއިން ކުރި މަސައްކަތުން ޖަވާބެއް ލިބޭވަރުވީ މިއަދު އެވެ. މިފްކޯއިން ދިން ޖަވާބުގައި ބުނެފައިވަނީ މި ހަފްތާގައި ލާރި ދޫކުރެވޭނެކަމަށް ނުބެލެވޭކަމަށެވެ.
”މި ހަފްތާގެ ނިޔަލަށް ދައްކަންޖެހޭ ފައިސާ ދެއްކޭނެ ކަމަކަށް ނުބެލެވޭ.“ މިފްކޯގެ ޖަވާބުގައި ވެއެވެ.
މިފްކޯއަށް އޮޑިފަހަރުގެ ބިލުތައް ނުދެއްކިގެން އުޅެނީ އެ ކުންފުނީގެ ކޭޝް ފްލޯވއަށް ކުރިމަތިވެފައިވާ ދަތިތަކާ ގުޅިގެންނެވެ. މިފްކޯއިން މީގެ ކުރިން ބުނެފައިވަނީ، މަސްވެރިންގެ އިހްސާސްތައް ވަޒަންކުރެވޭކަމަށާއި، އެހެންނަމަވެސް ކުންފުނީގެ މިހާރުގެ މާލީ ހާލަތު ހުރިގޮތުން މަސްވެރިންނަށް ފައިސާ ދެއްކުމުގައި ދަތިތަކެއް ކުރިމަތިވަމުން އަންނަކަމަށެވެ. އަދި، މިކަމުގައި ސަރުކާރާއި ފިނޭންސް މިނިސްޓްރީއާއި، ފިޝަރީޒް މިނިސްޓްރީއާ ވެސް މަޝްވަރާކޮށްގެން އޮޑިފަހަރަށް ވާ ފައިސާ ދޫކުރަން ބޭނުން ވާކަމަށް މިފްކޯއިން ބުނެފައި ވެއެވެ.
ކެޔޮޅުން ބުނަނީ، މިފްކޯއިން މަސް ގަންނަނަމަ، އެއަށް ވާ އަގު ދައްކަން ޖެހޭނެކަމަށެވެ. އެއީ، އެ ގަންނަ މަސް ޕްރޮސެސްކޮށްގެންނާއި، ރޯމަހުގެ ގޮތުގައި އެކްސްޕޯޓްކުރާކަން ކަސްޓަމްސްއަޢި އެމްއެމްއޭގެ ތަފާސް ހިސާބުން ފެންނަން އޮންނާތީ، މިފްކޯއަށް މަސްވެރިންގެ މަސައްކަތުން ވައްދާ މުދަލުން އާމްދަނީ ލިބޭކަން ކެޔޮޅުންނަށް ކަށަވަރުވާތީ ކަމަށެވެ.
”މިފްކޯ ހާލުގަ ޖެހިގެން 16 ރުފިޔާއަށް މަސް ގަންނަން ބުނީމަވެސް އަހަރުން އެއްބަސްވީ. އެހެން ވީމައި، އަހަރުމެން ވައްދާ އެއްޗަކުން އެމީހުން ފައިސާ އެ ހޯދަނީ. އެހެން ޚަރަދުތައް ބަރާބަރަށް އެބަކުރޭ. އަހަރުމެންނަށް ފައިސާ ދޭންވީމައި ފައިސާއެއް ނެތް. މީ ދެން ފުކެއް ބޮޑު ވަރެއްނު؟“ ރުޅި އައިއްސަ ހުރި ކެޔޮޅަކު ބުންޏެވެ.
މިފްކޯއަށް މަސް ކިރަމުންދާ ހުރިހައި އޮޑިތަކެއްގެ ކެޔޮޅުންވެސް މިހާރު ތިބީ ވަރަށް ރުޅި ގަދަވެފަ އެވެ. އޮޑިވެރިން ތިބީ ކުރާނެކަމެއް ނެތި ގޮތް ހުސްވެފަ އެވެ. އޮޑި މަހަށް ފުރުވަން، ޚަަރަދު ކުރާނެ އެއްގޮތެއްވެސް މިހާރަކު ނެތެވެ. އެންމެ ކުޑަމިނުން، އޮޑީގެ ފަޅުވެރިންނަށް ބޭނުންވާ ”ކޮއްތު“ ވެސް އޮޑިއަށް އެރުވޭނެ ހާލަތެއް ނެތެވެ.
މިފްކޯގެ ހާލަތު ދަށްވެ، ފައިސާ ނުދޭތީއާއި މަސް ގަންނަ އަގު ދަށްކަމުން ބައެއް އޮޑި ފަހަރުތަކުން މިހާރު މަސް ކިރަމުންދަނީ އަމިއްލަ ކުންފުނިތަކަށެވެ. ލ. މާންދޫގައި ހުންނަ ހޮރައިޒަން އިން މިހާރު މަސް ކިލޯއެއް ގަންނަނީ 18 ރުފިޔާއަށެވެ. އަދި، އެންސިސްއިން ވެސް ދަނީ މިފްކޯއަށް ވުރެ ހެޔޮ އަގުގައި މަސް ގަތުމުގެ އިތުރުން މަސްވެރިންނަށް ކޮންމެވެސް ވަރަކަށް ހިލޭ އައިސް ދޫކުރަމުންނެވެ.
ކެޔޮޅުން ބުނީ، އަމިއްލަ ކުުންފުނިތަކުގެ ތެރެއިން ސީޕްރިއާ ފިޔަވައި އެހެން ކުންފުނިތަކުން މިހާރު މަސްގަނެފައި ވަގުތުން ލާރި ނުދޭކަމަށެވެ.
”ސީޕްރިއާއިން މަސްކިލޯއެއް މި ގަންނަނީ 15 ރުފިޔާއަށް. އެކަމު އެތަނުން ވަގުތުން އެބަ ލާރިދޭ. އެހެން އަމިއްލަ ތަންތަނުންވެސް ކުރިން ބަރާބަރަށް ލާރިދޭ. މިހާރު މިފްކޯއިން މިހަދާ އެއްޗަކުން، އެމީހުންވެސް ފަރުވާ ކުޑަކުރަން ފަށައިފި. މިހާރު އެމީހުންވެސް މިދެނީ އެއް ހަފްތާ ދެ ހަފުތާ ފަހުން.“ ކެޔޮޅަކު ބުންޏެވެ.
ކެޔޮޅުން ބުނީ، ކަންތައް މިދާގޮތުން ދެން މަޑުން ތިބެވެން ނެތް ކަމަށެވެ. އެމީހުންގެ ފަހަތުގައި އެތައް ފަޅުވެރިންނާއި، އެތައް އާއިލާއެއް ތިބިއިރު، ގޭގެ ކުލި ނުދެއްކި، ބިލުތައް ނުދެއްކި، ލޯނު ފައިސާ ނުދެއްކި، ބަނޑު ފުރާނަ މުއްތިކުރާނެ ގޮތް ނެތި، މިހާރު ހަނާވާން ގާތްވެއްޖެކަމަށް ކެޔޮޅުން ބުންޏެވެ. މިކަންކަން ހަމަޖައްސަން ދެން ތެދުވުން ނޫން ގޮތެއް ނެތް ކަމަށްވެސް ކެޔޮޅުން ބުންޏެވެ.